ଜୟପୁର,୧୩ା୧୨(ନି.ପ୍ର.): କୋରାପୁଟ ଜିଲା ଜୟପୁର ନିକଟସ୍ଥ ପାତ୍ରପୁଟଠାରେ ଥିବା ବ୍ରିଟିଶ ଅମଳର ପୋଲ ଏବେ ବିପଦସଙ୍କୁଳ ଅବସ୍ଥାରେ ରହିଛି। ଏପରିକି ଭାରୀଯାନ ଏହା ମଧ୍ୟଦେଇ ଗଲେ ପୋଲ ଥରୁଛି। ଏହି ପୋଲ ବୈପାରିଗୁଡ଼ା, ମାଲକାନଗିରି, ଲମତାପୁଟ ଓ ମାଛକୁଣ୍ଡକୁ ସଂଯୋଗ କରୁଛି। ବିପଦରେ ଥିବା ଯୋଗୁ ଏଠାରେ ନୂଆ ପୋଲ ନିର୍ମାଣ କରିବା ପାଇଁ ଜାତୀୟ ରାଜପଥ ପ୍ରାଧିକରଣ ପକ୍ଷରୁ ସର୍ବୋଚ୍ଚ ଯନ୍ତ୍ରୀଙ୍କୁ ଗତ ୨୯ ତାରିଖରେ ପ୍ରସ୍ତାବ ଦିଆଯାଇଥିଲା। ଏହି ପ୍ରସ୍ତାବ ପରେ ତତ୍ପରତା ପ୍ରକାଶ କରି ସର୍ବୋଚ୍ଚ ଯନ୍ତ୍ରୀ ତୁରନ୍ତ ଡିପିଆର ପ୍ରସ୍ତୁତ କରିବାକୁ ଜୟପୁର ଜାତୀୟ ରାଜପଥ ନିର୍ବାହୀ ଯନ୍ତ୍ରୀ ଅଜୟ ମହାନ୍ତିଙ୍କୁ ନିର୍ଦ୍ଦେଶ ଦେଇଛନ୍ତି।
ବର୍ତ୍ତମାନ ବିଭାଗ ଏହି ପୁରାତନ ପୋଲ ନିକଟରେ ନୂତନ ପୋଲ କରିବ ନା ସେହିଠାରେ ହେବ, ସେଥିପାଇଁ ପ୍ରସ୍ତୁତ ହେବ ଡିପିଆର। ଯଦି ନୂତନ ପୋଲ ନିର୍ମାଣ କରାଯାଏ, ତେବେ ପୁରାତନ ବ୍ରିଟିଶ ଅମଳର ପୋଲଟିକୁ ଐତିହ୍ୟ ଭାବେ ମାନ୍ୟତା ଦିଆଯିବ। ଏହା ପର୍ଯ୍ୟଟକଙ୍କ ପାଇଁ ଆକର୍ଷଣ ହେବ କାରଣ ପାତ୍ରପୁଟ ପୋଲ ନିକଟସ୍ଥ ଅଞ୍ଚଳ ପିକନିକ୍ ସ୍ପଟ୍ ଭାବେ ମଧ୍ୟ ପରିଚିତ। ଉଲ୍ଲେଖଯୋଗ୍ୟ, ୧୯୩୧ରେ କୋଲାବ ନଦୀ ଉପରେ ଏହି ପୋଲ ନିର୍ମାଣ କରାଯାଇଥିଲା। ଦୀର୍ଘ ୮୮ ବର୍ଷ ଧରି ଏହି ପୋଲ ଉପରେ ଦୈନିକ ଶହ ଶହ ଭାରୀଯାନ ଚଳାଚଳ କରୁଥିଲା। ଲୁହାରେ ତିଆରି ହୋଇଥିବା ଏହି ପୋଲ ବର୍ତ୍ତମାନ ବିପଦସଙ୍କୁଳ ହୋଇପଡ଼ିଛି। ପ୍ରବଳ ବର୍ଷାରେ ଏଥିରେ ଗର୍ତ୍ତ ସୃଷ୍ଟି ହେବା ସହ କ୍ଷମତାଠାରୁ ଅଧିକ ସଂଖ୍ୟକ ମାଲବାହୀ ଟ୍ରକ୍ ଏହା ଉପରେ ଯାତାୟତ କରୁଥିବାରୁ ଏହାର ସ୍ଥାୟିତ୍ୱ ନଷ୍ଟ ହେବାରେ ଲାଗିଥିଲା। ଏହି ପୋଲ ରାଞ୍ଚତ୍-ବିଜୟଓ୍ବାଡ଼ା କରିଡରକୁ ସଂଯୋଗ କରୁଥିବାରୁ ଆକସ୍ମିକ ଭାବେ ଏହା ଭାଙ୍ଗିଗଲେ ଗମନାଗମନ ଓ ପରିବହନର ମୁଖ୍ୟ ରୁଟ୍ ବିଚ୍ଛିନ୍ନ ହେବାର ଆଶଙ୍କା ରହିଛି। ତେଣୁ ତୁରନ୍ତ ନୂତନ ପୋଲ ନିର୍ମାଣ କରାଯିବା ପାଇଁ ଦାବି ହୋଇଥିବା ବେଳେ ସର୍ବୋଚ୍ଚ ଯନ୍ତ୍ରୀଙ୍କ ନିର୍ଦ୍ଦେଶ ପରେ ପ୍ରଶାସନିକ ତତ୍ପରତା ପ୍ରକାଶ ପାଇଛି।