ମନମୁଣ୍ଡା, ୨୯।୬ (ଡି.ଏନ.ଏ):ଦ୍ୱୈତ ସହର ମନମୁଣ୍ଡା-ସୋନପୁର ମଝିରେ ଥିବା ତେଲ ନଦୀ ପୋଲ ପଶ୍ଚିମ ଏବଂ ପୂର୍ବଦକ୍ଷିଣ ଓଡିଶାକୁ ଯୋଗ କରୁଥିବାବେଳେ ବର୍ତ୍ତମାନ ତାହା ବିପଦଶଙ୍କୁଳ ଅବସ୍ଥାରେ ରହିଛି । ଏହି ପୋଲ ୧୯୭୩ ମସିହାରେ ନିର୍ମିତ ହୋଇଥିଲା। ପ୍ରଖର ସ୍ରୋତା ତେଲ ନଦୀର ଏହି ପୋଲର ଉପରିଭାଗ ବହ ସ୍ଥାନରେ ସିମେଣ୍ଟ ଫାଟି ଗଲାଣି ଏବଂ ଅନେକ ଜାଗାରେ ବଡ ବଡ ଖାଲ ହୋଇ ଲୁହାଛଡ ମାନ ବାହାରକୁ ଦିଶିଲାଣି । ଫଳରେ କ୍ଷିପ୍ରଗତିରେ ଯାଉଥିବା ବାଇକ ଆରୋହୀମାନେ ଉକ୍ତ ଖାଲରେ ପଡି ଗୁରୁତର ଆହତ ହେଉଛନ୍ତି । ନଦୀ ବଢ଼ି ସମୟରେ ଜଳସ୍ତର ବୃଦ୍ଧି ପାଇ ପାଣି ଛାତକୁ ଛୁଉଁଛି । ବିଗତ ୩ଟି ବଡ ବନ୍ୟା ବେଳେ ବଢ଼ିପାଣି ପୋଲ ଉପରକୁ ଛିଞ୍ଚା ମାରିଥିଲା । ତେଣୁ ପୋଲ ଛାତ ମରାମତିର ଆବଶ୍ୟକତ ରହିଛ । ସେହିପରି ୪୮ବର୍ଷର ଏହି ପୋଲର ବର୍ତ୍ତମାନ ସ୍ଥିତିକୁ ଦେଖିଲେ ଏଠାରେ ଦ୍ୱିତୀୟ ପୋଲ ନିର୍ମାଣର ଆବଶ୍ୟକ ଥିବା ମତପ୍ରକାଶ ପାଇଛି । ଅନ୍ୟପକ୍ଷେ ତେଲନଦୀରୁ ବାଲି ଉତ୍ତୋଳନ କରି ଶତାଧିକ ଟ୍ରାକ୍ଟର ଦୈନିକ ଯାତାୟତ କରୁଥିବାରୁ ବାଲି ସବୁ ପୋଲର ଉଭୟ ପାର୍ଶ୍ୱରେ ଜମା ହୋଇ ରହୁଛି । ଫଳରେ ପୋଲରୁ ବର୍ଷା ପାଣି ନିଷ୍କାସନ ପାଇଁ ଥିବା ଗାତରେ ବାଲି ଢ଼ାଙ୍କି ହୋଇ ରହୁଥିବାରୁ ପୋଲରୁ ପାଣି ନିଷ୍କାସନ ହୋଇପାରୁନାହିଁ । ଏତତ୍ବ୍ୟତୀତ ପୋଲ ଉପରେ ଗାଈଗୋରୁ ସଦାସର୍ବଦା ଶୋଇ ରହି ଟ୍ରାଫିକ ସମସ୍ୟା ସୃଷ୍ଟି କରୁଥିବା ବେଳେ ଗୋବର ଇତସ୍ତତ ହୋଇ ପଡି ରହିଛି । ବର୍ଷା ପାଣି ଜମା ହୋଇ ରହୁଥିବାରୁ ପଥିକ, ବାଇକ ଆରୋହୀ, ସାଇକେଲ ଚାଳକମାନେ ଅସୁବିଧା ଭୋଗୁଛନ୍ତି । ବର୍ଷା ପୂର୍ବରୁ ପୋଲ ଉପରେ ଥିବା ବାଲି, ଗୋବର ସବୁ ସଫା କରିବା ସହ ପୋଲ ମରାମତି କରିବା ପାଇଁ ଜନସାଧାରଣରେ ଦାବି ହୋଇଛି ।