ଚୌଦ୍ୱାର,୧୫।୩(ଡି.ଏନ୍.ଏ.): ଚୌଦ୍ୱାର ପୌରପାଳିକା କପାଳେଶ୍ୱର ୟୁ.ପି. ସ୍କୁଲ ଠାରୁ ୪ନଂ. ଓ୍ବାର୍ଡ ଦେଇ ଯାଇଥିବା ୩୩ କେଭି ବିଦ୍ୟୁତ୍ ତାର ବିପଦସଙ୍କୁଳ ଅବସ୍ଥାରେ ରହିଛି। ଏହି ତାରକୁ ସ୍ଥାନାନ୍ତର ପାଇଁ ଅଞ୍ଚଳବାସୀ ଦାବି କରିଛନ୍ତି। ଏ ନେଇ ସ୍ଥାନୀୟ ଅଞ୍ଚଳବାସୀ ଚୌଦ୍ୱାର ସେସୁ ଅଧିକାରୀଙ୍କୁ ଅବଗତ କରାଇଥିଲେ ମଧ୍ୟ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଉନାହିଁ। ଫଳରେ ସାଧାରଣରେ ଅସନ୍ତୋଷ ପ୍ରକାଶ ପାଇଛି ।
ସୂଚନାଥାଉ କି, ଏହି ୩୩ କେଭି ତାର ପ୍ରାଥମିକ ବିଦ୍ୟାଳୟ ପରିସର, ମନ୍ଦିର, ବାଳିକା ବିଦ୍ୟାଳୟ ପରିସର ଓ ଲୋକଙ୍କ ଘର ଉପରେ ଯାଇଛି। ଫଳରେ ବର୍ଷା ଓ ପବନ ସମୟରେ ତାରକୁ ତାର ଘଷିହୋଇ ନିଅଁାଝୁଲ ଖସିବା ସହିତ ଶର୍ଟ ସର୍କିଟ ହୋଇ ଘରେ ଥିବା ବିଦ୍ୟୁତ୍ ସାମଗ୍ରୀ ନଷ୍ଟ ହେଉଛି। ତୁରନ୍ତ ବିଭାଗୀୟ କର୍ତ୍ତୃପକ୍ଷ ଏହି ଉଚ୍ଚ ଶକ୍ତିସମ୍ପନ୍ନ ତାରକୁ ସ୍ଥାନାନ୍ତର ନ କରାଇଲେ ଆଗାମୀ ଦିନରେ ଓ୍ବାର୍ଡବାସୀ ଆନ୍ଦୋଳନକୁ ଓହ୍ଲାଇବେ ବୋଲି ବିମଳ ବେଉରା, ମହେଶ୍ୱର ସାହୁ, ଜିତେନ୍ଦ୍ର ବେଉରା, ପୂର୍ଣ୍ଣଚନ୍ଦ୍ର ବେହେରା, ଶ୍ରୀକାନ୍ତ ଶତପଥୀ, ମୁରଲୀଧର ବେଉରା, ଆଲୋକ ମିଶ୍ର, ହରିହର ବେଉରା ପ୍ରମୁଖ ଚେତାବନୀ ଦେଇଛନ୍ତି। ଏ ନେଇ କଟକସ୍ଥିତ ସେସୁ ମୁଖ୍ୟ କାର୍ଯ୍ୟାଳୟ ନିର୍ବାହୀ ଅଧିକାରୀ ଅମରଜିତ୍ ପଟ୍ଟନାୟକ କହିଛନ୍ତି, ସ୍ଥାନାନ୍ତରର ଆବଶ୍ୟକତା ରହିଛି। ଅଣ୍ଡର ଓ୍ବାରିଂ ମାଧ୍ୟମରେ ତାର ବିଛାଯିବ। ଗତ ଏକମାସ ପୂର୍ବରୁ ଏଥିଲାଗି ପ୍ରାୟ ୭୮ଲକ୍ଷ ଟଙ୍କା ଖର୍ଚ୍ଚ ହେବ ବୋଲି ଏକ ପ୍ରସ୍ତାବ ଉପରିସ୍ଥ ଅଧିକାରୀଙ୍କୁ ଦିଆଯାଇଛି ା ସ୍ଥାନୀୟ ଲୋକେ ସାହାଯ୍ୟ କଲେ କାମ ସମ୍ପୂର୍ଣ୍ଣ ହୋଇପାରିବ।