ଲାଠୋର, ୨୭ା୮ (ଡି.ଏନ୍.ଏ):
ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଅଧୀନ ଲାଠୋର ପଁଚେତ୍ ସଦର ଗୁଦାମପଡ଼ାରେ ବାସ କରୁଛନ୍ ଭଗବାନ ଛତ୍ରିଆ। ପରିବାର କହେଲେ ମାଏକିନା ବାସନ୍ତି ଆର ଗୁଟେ ବଲି ଝି’ ସେବତୀ। ପରିବାରଟା ନିହାତି ଗରିବ୍। ଇ ଗରିବ୍ ଦମ୍ପତି ଲାଗ୍ବରମସ କରି ଗୁଟେବଲି ଝି’କେ ବିହାକଲେ। ପଛେ ଦୁଖ୍ସୁଖ କରି ଦମ୍ପତି ଲୁକ୍କର ଲାଗ୍ବରମସ ସୁଝ୍ଲେ। ଝି’କେ ବିହା କଲା ଉତାରୁ ଇ ଦମ୍ପତି ଫିବଛର ଦାଦନ ଯାଇ ପେଟ୍ ପାଲୁଥିଲେ। ହେଲେ ବଏସ୍ ହେଲାରୁ ସେମାନେ ଦାଦନ ଯିବାକେ ଆର ସାହାସ ଯୁଟେଇ ନାଇଁ ପାରଲେ। ସେଦିନ୍ଠାନୁ ଭଗବାନ ଆସର ପାସର ଗଁାଗଁଡ଼ାରୁ ପନିପରିବା ଠୁଲେଇ ସେଟା ବଜାରମାନକେ ବିକି ଦୁଇ ପଏସା ରୁଜଗାର କରୁଛନ୍। ବାପ୍ ଅଜା ଅମଲୁ ୬୮ ଡେସିମିଲ ଘର ଡିହ ରହିଛେ। ହେଲେ ସେଟା ଦୁଇ ଭାଇ ଭିତରେ ଭାଗ୍ବଁଟା ନାଇଁହେଇ। ଯେନ୍ଥିରଲାଗି ଭଗବାନ ନିଜର ବଡ଼ବପାକଁର ଗୁଟେ ଡିହରେ ଧାର ଉଧାର କରି ଇଟା ଆର ମାଏଟ୍ରେ ଗୁଟେ ଘର ତିଆରିଛନ୍। ସେ ଘର ଆଘେ ଖୁଁଟା ଗାଡ଼ି ତାର ଉପରେ ତାଲବରଡା ଆର ତାରପୋଲିନ୍ ଢାପିଛନ୍। ସେଠାନେ ତାକର ରଁଧାବଢ଼ା ହେଉଛେ। ଇଆଡ଼େ ସରକାର ଗରିବ୍ ଦୁଖି, ବାସହୀନ ପରିବାରମାନକୁ ଘର ଯୁଗେଇ ଦେଉଛନ୍। ଭଗବାନ ଘରଖଁଡ଼େ ପାଏବାର ଆଶ୍ରେ ସରକାରୀ କରମଚାରୀକୁଁ ଭେଟି, ଗୁହାରି କରି ନିରାଶ ହେଇଛନ୍। ଶେଷେ ଉପେ ଶୂଇନ୍ ଗରିବ୍ ଦମ୍ପତି ନିଜର ଭାଏଗ୍କେ ଆଦ୍ରି ସେ ଦଦ୍ରା ଘରେ ମୁଡ଼ଗୁଁଜିଛନ୍। ହେଲେ ଘରଟା କେତେବେଲେ ମାଡି ବସବା କିଛି ଠିକ୍ନା ନଁାଇଁନ ବଲି ଭଗବାନ ଦୁଖିତ ହେଇ କହିଛନ୍। ଇ ବାବ୍ଦେ ଲାଠୋର ସରପଁଚ୍ ପ୍ରବିଣ ଅଗ୍ରଓ୍ବାଲକୁଁ ପଚରାଲାରୁ ଇ ପରିବାରକେ ପକାଘର ଯୁଗେଇ ଦେବାର ଲାଗି ତାକର ଲିଷ୍ଟ ପଠାବାର ସଂଗେ ପରଶାସନକେ ଅନୁରୋଧ କରିଛୁଁ ବଲି ସେ କହିଛନ୍।