Trump
ଓ୍ବାଶିଂଟନ,୩୦ା୧(ଏଏଫ୍ପି): ଇସ୍ରାଏଲ୍ ଓ ପାଲେଷ୍ଟାଇନ୍ ମଧ୍ୟରେ ଦୀର୍ଘଦିନ ଧରି ରହିଥିବା ବିବାଦର ସମାଧାନ ଲାଗି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ମଧ୍ୟପ୍ରାଚ୍ୟ ଶାନ୍ତି ଯୋଜନା ଆଣିଛନ୍ତି। ତାଙ୍କର ଏହି ବହୁପ୍ରତୀକ୍ଷିତ ଇସ୍ରାଏଲ-ପାଲେଷ୍ଟାଇନ ଶାନ୍ତି ଯୋଜନା ସେଠାରେ ଏକ ନୂତନ ସକାଳ ଆଣିବ ବୋଲି ଏଥିରେ ପ୍ରତିଶ୍ରୁତି ଦିଆଯାଇଛି। ତେବେ ଟ୍ରମ୍ପ୍ଙ୍କ ଏହି ଶାନ୍ତିନୀତିକୁ ନେଇ ବିବାଦ ଦେଖାଦେଇଛି। ଏଥିରେ ପାତରଅନ୍ତର କରାଯାଇଥିବା କ୍ଷୁବ୍ଧ ପାଲେଷ୍ଟିନୀୟମାନେ ଅଭିଯୋଗ କରି ଏହା ଇତିହାସର ଅଳିଆଗଦାକୁ ଯିବା ଯୋଗ୍ୟ ବୋଲି କହିଛନ୍ତି।
ହ୍ବାଇଟ୍ ହାଉସ୍ର ଇଷ୍ଟ୍ ରୁମ୍ରେ ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ସହ ଟ୍ରମ୍ପ୍ ତାଙ୍କ ମଧ୍ୟପ୍ରାଚ୍ୟ ଶାନ୍ତିନୀତି ସମ୍ପର୍କରେ ଘୋଷଣା କରି ଏହା ଦ୍ୱାରା ଆମେରିକାର ଦୀର୍ଘବର୍ଷର ପ୍ରୟାସ ସଫଳ ହେବାକୁ ଯାଉଛି ବୋଲି କହିଥିଲେ। ଆମେ ଏକାଠି ମିଶି ମଧ୍ୟପ୍ରାଚ୍ୟରେ ନୂତନ ସୂର୍ଯ୍ୟୋଦୟ ଆଣିପାରିବା ବୋଲି ସେଠାରେ ଉପସ୍ଥିତ ଇସ୍ରାଏଲୀ ଓ ଇହୁଦୀ ଆମେରିକୀୟ ଅତିଥିମାନଙ୍କୁ ଉଦ୍ବୋଧନ ଦେଇ ଟ୍ରମ୍ପ୍ କହିଥିଲେ। ସେଠାରେ ପାଲେଷ୍ଟାଇନ୍ର କୌଣସି ପ୍ରତିନିଧି ନ ଥିଲେ। ଏହି ଶାନ୍ତିନୀତିକୁ ପାଲେଷ୍ଟାଇନ୍ ପ୍ରତ୍ୟାଖ୍ୟାନ କରିଦେଇଛି। ଦୀର୍ଘବର୍ଷ ଧରି ଅନ୍ତର୍ଜାତୀୟ କୂଟନୀତିରେ ଇସ୍ରାଏଲ୍ ଯାହା ଦାବି କରିଆସୁଥିଲା ତାହାକୁ ଟ୍ରମ୍ପ୍ ତାଙ୍କ ଯୋଜନାରେ ମଞ୍ଜୁର କରିଛନ୍ତି। ଅବିଭାଜ୍ୟ ରାଜଧାନୀ ଭାବେ ଜେରୁଜେଲମ୍ ଉପରେ ଇସ୍ରାଏଲ୍ର ଅଧିକାର ସାଙ୍ଗକୁ ଆନେକ୍ସ ଓ୍ବେଷ୍ଟ ବ୍ୟାଙ୍କକୁ ମଧ୍ୟ ଉକ୍ତ ଦେଶକୁ ଦେବା ପାଇଁ ଟ୍ରମ୍ପ୍ଙ୍କ ଯୋଜନାରେ ପ୍ରସ୍ତାବ ରହିଛି। ଶାନ୍ତି ପାଇଁ ଇସ୍ରାଏଲ୍ର ପ୍ରୟାସକୁ ଆମେରିକା ରାଷ୍ଟ୍ରପତି ଉଚ୍ଚପ୍ରଶଂସା କରିଛନ୍ତି। ଏଥିରେ ଭବିଷ୍ୟତ ପାଲେଷ୍ଟିନୀୟ ରାଷ୍ଟ୍ର ପାଇଁ କେତେଗୁଡ଼ିଏ କଠୋର ସର୍ତ୍ତ ରଖାଯାଇଛି।
ଏଭଳି ଷଡ଼ଯନ୍ତ୍ରମୂଳକ ଚୁକ୍ତିନାମାକୁ ଅନୁମୋଦନ ହେବାକୁ ଦିଆଯିବ ନାହିଁ। ଆମ ଲୋକମାନେ ଏହାକୁ ଇତିହାସର ଅଳିଆଗଦାକୁ ନେଇଯିବେ ବୋଲି ପାଲେଷ୍ଟାଇନ୍ ରାଷ୍ଟ୍ରପତି ମହମ୍ମଦ ଆବ୍ବାସ କହିନ୍ତି। ସେହିପରି ଟ୍ରମ୍ପ୍ଙ୍କ ଶାନ୍ତିନୀତି ଆଦୌ ଗ୍ରହଣୀୟ ନୁହେଁ ବୋଲି ତୁର୍କୀ ରାଷ୍ଟ୍ରପତି ରେସେପ୍ ତାୟିପ୍ ଏର୍ଡୋଗାନ କହିଛନ୍ତି। ଜେରୁଜେଲମ୍ ମୁସଲମାନଙ୍କର ପବିତ୍ର ସ୍ଥାନ। ଏହାକୁ ଇସ୍ରାଏଲ୍କୁ ଦିଆଯିବା ଯୋଜନା ଗ୍ରହଣଯୋଗ୍ୟ ନୁହେଁ। ଏହା ପାଲେଷ୍ଟିନୀୟଙ୍କ ଅଧିକାରକୁ ଅଣଦେଖା କରୁଛି ବୋଲି ଏର୍ଡୋଗାନ କହିଛନ୍ତି। ଅନ୍ୟପକ୍ଷରେ ପାଲେଷ୍ଟାଇନ ଓ ଇସ୍ରାଏଲ ମଧ୍ୟରେ ଲାଗି ରହିଥିବା ବିବାଦକୁ ଜାତିସଂଘ ସଂକଳ୍ପନାମା ଆଧାରରେ ସମାଧାନ କରିବାରେ ସମସ୍ତ ସହଯୋଗ ଯୋଗାଇଦିଆଯିବ ବୋଲି ଜାତିସଂଘ ମହାସଚିବ ଆଣ୍ଟୋନିଓ ଗୁଟେରେସ୍ କହିଛନ୍ତି।