ନୂଆଦିଲ୍ଲୀ,୬ା୫(ଆଇଏଏନ୍ଏସ୍): ଏକ ବିବାଦୀୟ ଘଟଣାକ୍ରମରେ ପୁଲିଜର ପ୍ରାଇଜ ବୋର୍ଡ କଶ୍ମୀର ଉପରେ ଭାରତର ବୈଧତାକୁ ନେଇ ପ୍ରଶ୍ନ ଉଠାଇଛି। ଏହି ଉପତ୍ୟକାକୁ ସ୍ବାଧୀନତାରୁ ବଞ୍ଚତ୍ତ ଏକ ‘ବିବାଦୀୟ ଭୂଖଣ୍ଡ’ ଭାବେ ଅଭିହିତ କରିଛି।
ସାମ୍ବାଦିକତା, ସାହିତ୍ୟ ଓ କଳା ଭଳି ୨୧ଟି କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ପ୍ରତିବର୍ଷ ପୁଲିଜର ପୁରସ୍କାର ଦିଆଯାଇଥାଏ। ପୁରସ୍କାର ବାବଦକୁ ୧୫,୦୦୦ ଡଲାର ଓ ମାନପତ୍ର ମଧ୍ୟ ପ୍ରଦାନ କରାଯାଇଥାଏ। ଏହି କ୍ରମରେ ଏଥର ଭ୍ରଷ୍ଟାଚାର, ଆଇନ ପ୍ରବର୍ତ୍ତନ ଓ ଆମେରିକାରେ ବୈଷମ୍ୟବାଦ ଭଳି ପ୍ରସଙ୍ଗ ଉଠାଇଥିବା ନ୍ୟୁଜ୍ ସଂସ୍ଥାଗୁଡ଼ିକୁ ଏହି ପୁରସ୍କାର ପ୍ରଦାନ କରାଯାଇଛି। ସେଗୁଡ଼ିକ ମଧ୍ୟରେ ରହିଛି ଦି ନ୍ୟୁୟର୍କର, ଦି ଓ୍ବାଶିଂଟନ ପୋଷ୍ଟ, ଆସୋସିଏଟେଡ୍ ପ୍ରେସ୍, ଦି ଲସ୍ ଏଞ୍ଜେଲସ ଟାଇମ୍ସ, ଦି ଓ୍ବାଲ୍ଟିମୋର ସନ୍ ଏବଂ ଦି ପାଲେଷ୍ଟାଇନ୍ ହେରାଲ୍ଡ ପ୍ରେସ୍।
ଆମେରିକାଭିତ୍ତିକ ପୁଲିଜର ପ୍ରାଇଜ୍ ୨୦୨୦ ପାଇଁ କଶ୍ମୀରର ମୁଖ୍ତାର ଖାନ୍ ଓ ୟାସିନ ଦାର୍ ଏବଂ ଜମ୍ମୁ ନିବାସୀ ଚନ୍ନି ଆନନ୍ଦଙ୍କୁ ଚୟନ କରାଯାଇଛି। ଏହି ୩ ଫଟୋଜର୍ନାଲିଷ୍ଟ ଆସୋସିଏଟେଡ୍ ପ୍ରେସ୍ (ଏପି)ରେ କାର୍ଯ୍ୟରତ। କେନ୍ଦ୍ର ସରକାର ସମ୍ବିଧାନର ଅନୁଚ୍ଛେଦ ୩୭୦ ଉଚ୍ଛେଦ କରିବା ପରେ ଜମ୍ମୁ-କଶ୍ମୀର ଓ ଲଦାଖ ଦୁଇଟି କେନ୍ଦ୍ରଶାସିତ ଅଞ୍ଚଳରେ ପରିଣତ ହୋଇଥିଲା। ଏହି ସମୟରେ ଉପତ୍ୟକାରେ କିପରି କଟକଣା ଜାରି କରାଯାଇଥିଲା ଓ କ’ଣ ସବୁ ଘଟିଥିଲା ଏହି ଫଟୋ ଜର୍ନାଲିଷ୍ଟମାନେ ତା’ର ନିଚ୍ଛକ ଛବି କ୍ୟାମେରାରେ କଏଦ୍ କରି ବିଶ୍ୱବାସୀଙ୍କ ସାମ୍ନାରେ ରଖିଥିଲେ। ସେହି ଫଟୋଗୁଡ଼ିକ ଜାତୀୟ ତଥା ଅନ୍ତର୍ଜାତୀୟ ସ୍ତରରେ ଉଚ୍ଚ ପ୍ରଶଂସିତ ହୋଇଥିଲା। ପୁଲିଜର ବୋର୍ଡ ଉପରୋକ୍ତ ୩ ଫଟୋଜର୍ନାଲିଷ୍ଟଙ୍କୁ ଏହି ପୁରସ୍କାର ପ୍ରଦାନ ସହ କଶ୍ମୀର ଉପରେ ଭାରତୀୟ ସାର୍ବଭୌମତ୍ୱର ବୈଧତାକୁ ନେଇ ପୁଲିଜର ବୋର୍ଡ ପ୍ରଶ୍ନ ଉଠାଇବା ଫଳରେ ବିବାଦ ସୃଷ୍ଟି ହୋଇଛି। ଏହାସହ ‘ନ୍ୟୁୟର୍କ ଟାଇମ୍ସ’ ପତ୍ରିକାର ନିକୋଲ୍ ହନ୍ନାହ-ଜୋନ୍ସଙ୍କୁ ବେଷ୍ଟ କମେଣ୍ଟାରି ଆଓ୍ବାର୍ଡ ପ୍ରଦାନ କରାଯିବା ମଧ୍ୟ ବିବାଦ ଘେରକୁ ଟାଣି ହୋଇଯାଇଛି। ନିକୋଲ୍ ନିଜ ମହତ୍ତ୍ୱାକାଂକ୍ଷୀ ପ୍ରବନ୍ଧ ‘ଦି ୧୬୧୯ ପ୍ରୋଜେକ୍ଟ’ରେ ଆଫ୍ରିକୀୟ କୃଷ୍ଣକାୟମାନଙ୍କୁ ଦାସ କରାଯିବାର ୪୦୦ତମ ବାର୍ଷିକୀ ସମ୍ପର୍କରେ ଉଲ୍ଲେଖ କରିଛନ୍ତି। ଆମେରିକା ପ୍ରତି କୃଷ୍ଣକାୟଙ୍କ ଅବଦାନ ଦେଶର ଇତିହାସକୁ ବଦଳାଇ ଦେଇଥିବାବେଳେ ତାକୁ ସ୍ବୀକୃତି ନ ଦେବା ଏକ ଐତିହାସିକ ଭୁଲ୍। ଆମେରିକୀୟ ସ୍ବାଧୀନତାର ବିଚାରଧାରା ପାଇଁ ସେମାନଙ୍କ ଭୂମିକା ଗୁରୁତ୍ୱପୂର୍ଣ୍ଣ ବୋଲି ନିକୋଲ୍ କହିଛନ୍ତି। ପୁରସ୍କାର ଘୋଷଣା ପରେ ସେ ଏହାକୁ ନିଜ ଜୀବନର ସର୍ବୋତ୍କୃଷ୍ଟ କୃତି ଭାବେ ଅଭିହିତ କରିଛନ୍ତି। ତେବେ ତାଙ୍କର ଏହି ପ୍ରୋଜେକ୍ଟକୁ କଞ୍ଜରଭେଟିଭ୍ଙ୍କ ସମେତ ବିଭିନ୍ନ ମହଲରେ ସମାଲୋଚନା କରାଯାଇଛି। ହାଉସ୍ ଅଫ୍ ରିପ୍ରେଜେଣ୍ଟେଟିଭ୍ର ପୂର୍ବତନ ସ୍ପିକର ଏହାକୁ ଏକ ପ୍ରୋପାଗାଣ୍ଡା ବୋଲି କହିଛନ୍ତି। ସେହିପରି ଆମେରିକାକୁ ଅବୈଧ ଓ ବିଭାଜନ କରି ନାଗରିକଙ୍କ ମନୋବଳକୁ ଦୁର୍ବଳ କରିବା ଏହି ପ୍ରୋଜେକ୍ଟର ଉଦ୍ଦେଶ୍ୟ ବୋଲି ଅନ୍ୟ ଜଣେ ସମାଲୋଚକ ଟୁଇଟ୍ କରିଛନ୍ତି।