ରୋହତକ, ୨୩।୬: ବେଳେବେଳେ ଅଜବ ଖବର ଲୋକଲୋଚନକୁ ଆସିଥାଏ, ଯାହା ଶୁଣିଲେ ମଧ୍ୟ ବିଶ୍ୱାସ କରିହୁଏ ନାହିଁ। କିନ୍ତୁ ଘଟଣା ସତ୍ୟ। ଏହାର ସଦ୍ୟ ଉଦାହରଣ ଦେଖିବାକୁ ମିଳିଛି ହରିୟାଣାର ଜିନ୍ଦ୍ ଜିଲାରେ। ନିଜ ସ୍ବାମୀଙ୍କୁ ଲୁଟି ଫେରାର ହୋଇ ଯାଇଛନ୍ତି ସ୍ତ୍ରୀ। ଯୁବକଙ୍କୁ ବିବାହ କରିବାର ମାତ୍ର ୧୫ ଦିନ ପରେ ଘଟିଛି ଏଭଳି ଘଟଣା। ସମ୍ପୃକ୍ତ ଯୁବକ ହରିୟାଣା ମୁଖ୍ୟମନ୍ତ୍ରୀ ମନୋହରଲାଲ ଖଟ୍ଟରଙ୍କୁ ଚିଠି ଲେଖି ସାହାଯ୍ୟ ଭିକ୍ଷା କରିଛନ୍ତି। ସୂଚନାଯୋଗ୍ୟ, ୩୬ ବର୍ଷୀୟ ସୁରେନ୍ଦ୍ର ଦୁଇଜଣ ମଧ୍ୟସ୍ଥିଙ୍କ ଜରିଆରେ ୭୦ ହଜାର ଟଙ୍କା ଖର୍ଚ୍ଚ କରି ବିବାହ କରିଥିଲେ। ସୁରେନ୍ଦ୍ରଙ୍କ ପ୍ରଥମ ସ୍ତ୍ରୀଙ୍କ ମୃତ୍ୟୁ ହୋଇ ଯାଇଥିବାରୁ ମାତାପିତାଙ୍କ ଦେଖାଶୁଣା କରିବା ପାଇଁ ସେ ଦ୍ୱିତୀୟ ବିବାହ କରିବାକୁ ଚାହୁଁଥିଲେ। ମେ୧୭ରେ ସୁରେନ୍ଦ୍ରଙ୍କ ସହ ଯୋଗୀନ୍ଦର ଏବଂ ବୀରେନ୍ଦ୍ର ନାମକ ଦୁଇ ବ୍ୟକ୍ତିଙ୍କର ପରିଚୟ ହୋଇଥିଲା। ସେମାନେ ତାଙ୍କୁ ଲୁଧିଆନାର ଜଣେ ଗରିବ ଅନାଥ ଝିଅ ସହ ବିବାହ କରାଇ ଦେବେ ବୋଲି ପ୍ରତିଶ୍ରୁତି ଦେଇଥିଲେ। ଏଥିପାଇଁ ସେମାନେ ୭୦ ହଜାର ଟଙ୍କା ନେଇଥିଲେ। ଏହାପରେ ୨୮ ବର୍ଷୀୟା ଜନୈକା ଯୁବତୀଙ୍କୁ ଜିନ୍ଦ୍ ଜିଲାକୁ ଆଣି ବିବାହ କରି ଦେଇଥିଲେ। ଲୁଧିଆନାସ୍ଥ କୋର୍ଟରେ ବିବାହ ପଞ୍ଜୀକରଣ ମଧ୍ୟ ହୋଇଥିଲା। ୧୫ ଦିନ ଦାମ୍ପତ୍ୟ ସମ୍ପର୍କ ବିତାଇବା ପରେ ଯୁବତୀ ଜଣଙ୍କ ଲୁଧିଆନାରେ ଥିବା ତାଙ୍କ ମାଉସୀଙ୍କ ପାଖକୁ ଯିବାକୁ ସ୍ବାମୀକୁ କହିଥିଲେ। ସୁରେନ୍ଦ୍ର ଷ୍ଟେଶନକୁ ଛାଡିବାକୁ ଯାଇଥିବାବେଳେ ସେଠାରୁ ଯୁବତୀ ଜଣଙ୍କ ଚମ୍ପଟ ମାରିଥିଲେ। ଯିବା ପୂର୍ବରୁ ସୁରେନ୍ଦ୍ରଙ୍କଠାରୁ ଯୁବତୀ ଜଣଙ୍କ ଫୋନ୍, ସୁନା ଗହଣା ମଧ୍ୟ ମାଗି ନେଇଥିଲେ। ସୁରେନ୍ଦ୍ରେ ଏନେଇ ପୋଲିସରେ ଏତଲା ଦେଇଛନ୍ତି।
