କୋଚି,୧୨।୭: କେରଳର ଜଣେ ଦମ୍ପତି ବିବାହର ୧୬ ବର୍ଷ ପରେ ଏହାର ପ୍ରମାଣପତ୍ର ପାଇଁ ବିବାହ ପଞ୍ଜିକରଣ କାର୍ଯ୍ୟାଳୟରେ ପହଞ୍ଚିଥିଲେ। ସେଠାରେ ଥିବା ୪ ଜଣ କର୍ମଚାରୀ ବେଶ୍ କିଛି ଦିନ ତାଙ୍କୁ ଦୌଡାଇବା ପରେ ଶେଷରେ କହିଥିଲେ ପୁଣି ଥରେ ବିବାହ କର ତା’ହେଲେ ଯାଇ ବିବାହ ପ୍ରମାଣ ପତ୍ର ମିଳିବ। ଏହି ଘଟଣାକୁ ଉକ୍ତ ବ୍ୟକ୍ତି ଜଣକ ସୋସିଆଲ ମିଡିଆରେ ପୋଷ୍ଟ କରିବା ପରେ ବିଭାଗୀୟ ମନ୍ତ୍ରୀ ଜି ସୁଧାକରନ ଦୁର୍ବବ୍ୟହାର ଓ କାର୍ଯ୍ୟରେ ଅବହେଳା ଦର୍ଶାଇ ଉକ୍ତ ୪ କର୍ମଚାରୀଙ୍କୁ ନିଲମ୍ବନ କରିଥିବା ଜଣାପଡିଛି। ଏହାପରେ ସୁଧାକରନ ଗୁରୁବାର ଏକ ଫେସବୁକ୍ ପୋଷ୍ଟ ମାଧ୍ୟମରେ କହିଛନ୍ତି କି ଯେତେବେଳେ ତାଙ୍କୁ ଏ ବିଷୟରେ ଜଣାପଡିଲା ସେତେବେଳେ ସେ ଏହାକୁ ସହି ନ ପାରି ନିଲମ୍ବନ ଆଦେଶ ଦେଲେ। ସୂଚନାଯୋଗ୍ୟ, ମଧୁସୂଦନ ନାମକ ଜଣେ ବ୍ୟକ୍ତି ୧୬ ବର୍ଷ ପୂର୍ବେ ଅର୍ଥାତ୍ ୨୦୦୩ ଫେବୃୟାରୀ ୨୭ରେ ବିବାହ କରିଥିଲେ। ଗତ ଜୁନ୍ ମାସରେ ତାଙ୍କର ବିବାହ ପଞ୍ଜିକରଣ ପ୍ରମାଣପତ୍ର ଆବଶ୍ୟକ ପଡିବାରୁ ସେ ବିବାହ ପଞ୍ଜିକରଣ କାର୍ଯ୍ୟାଳୟରେ ପହଞ୍ଚିଥିଲେ। ସେଠାରେ ଥିବା କର୍ମଚାରୀମାନେ ପ୍ରଥମେ ତାଙ୍କୁ ଥଟ୍ଟା କରିଥିଲେ ଓ କିଛିଦିନ ଦୌଡାଇବା ପରେ ଶେଷରେ କହିଥିଲେ ପୁଣିଥରେ ବିବାହ କର ତା’ହେଲେ ଆଉ ପୁରୁଣା ତଥ୍ୟ ନ ଖୋଜି ଶୀଘ୍ର ପ୍ରମାଣପତ୍ର ଦେଇ ହେବ। ହେଲେ କର୍ମଚାରୀଙ୍କ ଏଭଳି ବ୍ୟବହାର ଏବେ ସେମାନଙ୍କୁ ମହଙ୍ଗା ପଡିଛି।