ରାୟପୁର,୨୯।୫: ଛତିଶଗଡ଼ରେ ବିବାହଯୋଗ୍ୟ ଯୁବକ ଚୋରି କରିବାକୁ ବାଧ୍ୟ ହେଉଛନ୍ତି। ସ୍ଥାନୀୟ ଆଦିବାସୀ ବହୁଳ ସରଗୁଜା, ଜଶପୁର ଆଦି ଜିଲାରେ ବାସକରୁଥିବା ନଟ ସମ୍ପ୍ରଦାୟରେ ଅବିବାହିତ ଯୁବକ ଚୋରି କରିବା ପରମ୍ପରା ରହିଛି। ଚୋରି ନ କଲେ ତାଙ୍କର ବିବାହ ଅସମ୍ଭବ। କେହି ସେଭଳି ଯୁବକଙ୍କୁ ଝିଅ ଦେବାକୁ ରାଜି ହୋଇ ନ ଥାନ୍ତି। ତାଙ୍କର କୌଣସି ଯୋଗ୍ୟତା ନାହିଁ ବୋଲି ଲୋକେ କୁହନ୍ତି। ଚୋରି, ଅପହରଣ, ହତ୍ୟା କରିବା ଏହି ସମ୍ପ୍ରଦାୟର କୌଳିକ ବୃତ୍ତି। ବର୍ଷା ଋତୁ ୪ ମାସ ଛାଡିଦେଲେ ଏହି ସମ୍ପ୍ରଦାୟ ବର୍ଷର ଅବଶିଷ୍ଟ ୮ ମାସ ଚୋରି କାମ କରନ୍ତି। ଚୋରି ଟଙ୍କାରେ ଏଠାରେ ନଟ ସମ୍ପ୍ରଦାୟ ଏକ ମନ୍ଦିର ନିର୍ମାଣ କରିଛନ୍ତି। ପୁରୁଷମାନେ ଚୋରି କରିବାକୁ ଯିବା ସମୟରେ ମହିଳାମାନେ ମନ୍ଦିରରେ ଭଜନ କରିଥାନ୍ତି। ଗାଁକୁ ପୋଲିସ ନ ଆସିବା ଏବଂ ଚୋରି କରି ଧରା ନ ପଡ଼ିବା ପାଇଁ ମହିଳାମାନେ ମାନସିକ କରନ୍ତି। ନଟ ସମ୍ପ୍ରଦାୟର ଏଭଳି କାର୍ଯ୍ୟ ନେଇ ସ୍ଥାନୀୟ ପ୍ରଶାସନ ପକ୍ଷରୁ ବିଭିନ୍ନ ବିକାଶମୂଳକ ପଦକ୍ଷେପ ଗ୍ରହଣ କରାଯାଇଥିବା କୁହାଯାଉଛି।