ବିବାହ ବନ୍ଧନରେ ଆବଦ୍ଧ ହେଲେ ଟିଏମ୍‌ସି ଏମ୍‌ପି

ବଶୀରଘାଟ,୨୦।୬: ଅଭିନେତ୍ରୀରୁ ଏମ୍‌ପି ହୋଇଥିବା ପଶ୍ଚିମ ବଙ୍ଗର ନୁସରତ ଜହାଁ ବିବାହ ବନ୍ଧନରେ ବାନ୍ଧି ହୋଇଛନ୍ତି। ବଶିରଘାଟର ତୃଣମୃଳ କଂଗ୍ରେସ(ଟିଏମ୍‌ସି)ର ଏମ୍‌ପି ନୁସରତ ଜହାଁ କୋଲକାତାର ବ୍ୟବସାୟୀ ନିଖିଲ ଜୈନଙ୍କୁ ବିବାହ କରିଛନ୍ତି। ବୁଧବାର ତୁର୍କୀର ବୋଡରମରେ ନୁସରତ ଓ ନିଖିଲଙ୍କ ବିବାହ ଅନୁଷ୍ଠିତ ହୋଇଥିଲା। ଏହି ବିବାହରେ ପରିବାର ଲୋକ ଓ ନିକଟତର ବନ୍ଧୁ ସାମିଲ ହୋଇଥିଲେ। ଏଥିସହ ଅଭିନେତ୍ରୀ ତଥା ଯାଦବପୁରର ଟିଏମ୍‌ସି ଏମ୍‌ପି ମିମି ଚକ୍ରବର୍ତ୍ତୀ ମଧ୍ୟ ଏହି ବିବାହରେ ଯୋଗ ଦେଇଥିଲେ। ରେଡ କଲରର ଲେହେଙ୍ଗାରେ ନୁସରତ ବେଶ୍‌ ସୁନ୍ଦର ଦେଖାଯାଉଥିବା ବେଳେ ନିଖିଲ ଅଫ୍‌ ହ୍ବାଇଟ କଲରର ଶେରଓ୍ବାନୀରେ ବେଶ୍‌ ହ୍ୟାଣ୍ଡସମ୍‌ ଦେଖାଯାଉଛନ୍ତି। ନବବିବାହିତା ଯୋଡିଙ୍କ କିଛି ଫଟୋ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ନୁସରତଙ୍କ ବୟସ ୨୯ ହୋଇଥିବା ବେଳେ ତାଙ୍କୁ ଯୁବା ଏମ୍‌ପିରେ ଗଣତି କରାଯାଏ। ନୁସରତଙ୍କ ବଙ୍ଗଳା ଫିଲ୍ମରେ ବହୁ ନାଁ ରହିଛି। ୨୦୧୧ରେ ଫିଲ୍ମ ଶତ୍ରୁରୁ ସେ ଡେବ୍ୟୁ କରିଥିଲେ।