ଚେନ୍ନାଇ, ୧୨।୮: ତାମିଲନାଡୁର ବିଲ୍ଲୁପୁରମ୍ରେ ଏକ ଅଜବ ଘଟଣା ଦେଖିବାକୁ ମିଳିଛି। ପିତାଙ୍କ ମୃତ୍ୟୁ ପରେ ତାଙ୍କ ମୃତଦେହକୁ ବେଦି ଉପରେ ରଖି ୭ ଘେରା ନେଇଛନ୍ତି ଜଣେ ପୁଅ। ବିଲ୍ଲୁପୁରମ୍ର ଟିଣ୍ଡିଓ୍ବନମ୍ରେ ଥିବା ସଙ୍ଗନୁର ଗାଁରେ ୩୧ ବର୍ଷୀୟ ଆଲେକଜେଣ୍ଡର(୩୧)ଙ୍କ ବିବାହ ଆଗାମୀ ସେପ୍ଟେମ୍ବର ୨ରେ ସ୍ଥିର କରାଯାଇଥିଲା। ହଠାତ୍ ଗତ ଶୁକ୍ରବାର ଆଲେକଜେଣ୍ଡରଙ୍କ ପିତା ଜେବାମଣିଙ୍କ ମୃତ୍ୟୁ ହୋଇଯାଇଥିଲା। ତାଙ୍କ ପିତା ପୁଅର ବିବାହକୁ ନେଇ ବହୁତ୍ ଖୁସି ଥିଲେ। ଏପରିକି ପିତାଙ୍କ ପସନ୍ଦର କନ୍ୟାକୁ ବିବାହ କରିବାକୁ ଯାଉଥିଲେ ପୁଅ। ପିତାଙ୍କ ହଠାତ୍ ମୃତ୍ୟୁ ହେବା ପରେ ଆଲେକଜେଣ୍ଡର କ୍ରିୟାକର୍ମ ପୂର୍ବରୁ ବିବାହ କରିବାକୁ ନିଷ୍ପତ୍ତି ନେଇଥିଲେ। ପିତାଙ୍କ ସ୍ବପ୍ନ ପୂରଣ ପାଇଁ ସେ ଏଭଳି ନିଷ୍ପତ୍ତି ନେଇଥିବା ପରିବାର ଲୋକେ କହିଛନ୍ତି। ଏନେଇ ଆଲେକଜେଣ୍ଡର ନିଜ ଭାବୀ ସ୍ତ୍ରୀ ଅନ୍ନପୂର୍ଣ୍ଣାଙ୍କୁ ପଚାରିଥିଲେ। ଏଥିରେ ସେ ରାଜି ହୋଇଯିବାରୁ ବିବାହ ପ୍ରସ୍ତୁତି ଆରମ୍ଭ ହୋଇଯାଇଥିଲା। ପ୍ରଥମେ ମୃତ ପିତାଙ୍କୁ ଏକ ନୂତନ ବସ୍ତ୍ର ଘୋଡାଇ ବରଯାତ୍ରୀ ସହ ବିବାହ ମଣ୍ଡପକୁ ନେଇଥିଲେ। ସେଠାରେ ବିବାହ ବେଦି ଆଗରେ ପିତାଙ୍କ ମୃତଦେହ ରଖାଯାଇଥିଲା। ପରେ ବିବାହ କାର୍ଯ୍ୟ ଆରମ୍ଭ ହୋଇଥିଲା। ଶେଷରେ ମୃତ ପିତାଙ୍କ ସହ ଫଟୋ ଉଠାଇଥିଲେ ନବଦମ୍ପତି।
