ଭଟଲି,୨୭। ୩(ଡି.ଏନ.ଏ.): କରୋନା ପାଇଁ ସମଗ୍ର ଦେଶରେ ଲକ୍ଡାଉନ୍ ଜାରି ହୋଇଛି। ଘରୁ ନ ବାହାରିବା ସହିତ କୌଣସି ପ୍ରକାର ଭୋଜି ମହୋତ୍ସବ ନ କରିବା ପାଇଁ କଟକଣା ଜାରି କରାଯାଇଛି । ଏହି କଟକଣାକୁ ନ ମାନିଲେ ଦଣ୍ଡବିଧାନର ବ୍ୟବସ୍ଥା ରହିଛି । ଏହି ପରିପ୍ରେକ୍ଷୀରେ ଜଣେ ଶିକ୍ଷକ ଓ ତାଙ୍କ ବାପା ଅଡ଼ୁଆରେ ପଡିଛନ୍ତି। ଉଭୟଙ୍କୁ ପୋଲିସ ବିବାହ ଭୋଜିରୁ ଉଠାଇନେବା ଘଟଣା ଏଠାରେ ଚର୍ଚ୍ଚାର ବିଷୟ ହୋଇଛି ।
ସୂଚନା ଅନୁଯାୟୀ, ଗୁରୁବାର ବରଗଡ଼ ଜିଲା ଭଟଲି ଥାନା ଅଞ୍ଚଳରେ ଜଣେ ଶିକ୍ଷକଙ୍କ ବିବାହ ଭୋଜିର ଆୟୋଜନ କରାଯାଇଥିଲା। ଖବର ପାଇ ଭଟଲି ପୋଲିସ ଭୋଜିସ୍ଥଳରୁ ବର ଏବଂ ତାଙ୍କ ବାପାଙ୍କୁ ଉଠାଇ ଆଣିଥିଲା । ସାମାଜିକ ଦୂରତା ଉଲ୍ଲଂଘନ ସହିତ କୋରନା କଟକଣା ନ ମାନିବା ଯୋଗୁ ପୋଲିସ ଏପରି କାର୍ଯ୍ୟାନୁଷ୍ଠାନ ଗ୍ରହଣ କରିଛି । ଏ ନେଇ ଭଟଲି ଥାନାରେ ଦଫା ୧୮୮, ୨୬୯, ୨୭୦ରେ ଏକ ମାମଲା(ନଂ. ୫୧/୧୯) ରୁଜୁ ହୋଇଛି । ସୂଚନାଯୋଗ୍ୟ, ଉକ୍ତ ଶିକ୍ଷକଙ୍କ ବୁଧବାର ବିବାହ ସମ୍ପନ୍ନ ହୋଇଥିଲା। ଗୁରୁବାର ଭୋଜି ପାଇଁ ସେ ଅନୁମତି ମାଗିଥିଲେ ମଧ୍ୟ ପୋଲିସ ପ୍ରଶାସନ ମନା କରିଥିଲା। ଏହା ସତ୍ତ୍ୱେ ସେ ନିମନ୍ତ୍ରିତ ଅତିଥିମାନଙ୍କୁ ଗୋଟିଏ ସ୍ଥାନରେ ଠୁଳ କରି ଭୋଜିର ଆୟୋଜନ କରିଥିଲେ । ଖବର ପାଇ ପୋଲିସ ଭୋଜିସ୍ଥଳରେ ଚଢ଼ାଉ କରି ଏପରି କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା । ଟ୍ରେନିଂ ଡିଏସ୍ପି ଦିନେଶ କୁମାର ନାୟକ, ସ୍ଥାନୀୟ ତହସିଲଦାର ପ୍ରଶାନ୍ତ କୁମାର ମହାପାତ୍ର, ଭଟଲି ଥାନାଧିକାରୀ ରଞ୍ଜିତ କୁମାର ନାୟକ ପ୍ରମୁଖ ଏହି ଚଢ଼ାଉରେ ସାମିଲ ହୋଇଥିଲେ ।