ଭୋପାଳ,୧୧।୭: ଉତ୍ତରପ୍ରଦେଶରେ ଏକ ବିବାହ ଉତ୍ସବରେ ଅଘଟଣ ଘଟିଥିବା ପଦାକୁ ଆସିଛି। ବର ବିବାହ ହେବାକୁ ଯାଇଥିବା ବେଳେ କନ୍ୟାପକ୍ଷ ବରଯାତ୍ରୀଙ୍କୁ ଅଟକ ରଖିଥିବା ଘଟଣା ସାମ୍ନାକୁ ଆସିଛି। ହେଲେ ଏହି ଘଟଣା କୌଣସି ଯୌତୁକ ପାଇଁ ନୁହେଁ, ବରଂ ବରର ଅନ୍ୟତ୍ର ପ୍ରେମ ପାଇଁ ଘଟିଛି। ବାହା ବେଦିରେ ବର ସହ ୨ଶହ ବରଯାତ୍ରୀଙ୍କୁ କନ୍ୟାପକ୍ଷ ବନ୍ଦୀ କରି ରଖିଥିଲେ। ସୂଚନାଯୋଗ୍ୟ, ବୁଧବାର ମିରଟ ଜିଲାର ପରତାପୁର ଥାନା ଅଞ୍ଚଳରୁ ବରଯାତ୍ରୀ ନେଇ ବର ପରିବାରଲୋକେ ପାଞ୍ଚି ଗାଁରେ ଥିବା କନ୍ୟାଘରେ ପହଞ୍ଚିଥିଲେ। ଯଥାରୀତି ବିବାହ ଚାଲିଥିବା ବେଳେ ହଠାତ୍ ମଣ୍ଡପରେ ବରର ପ୍ରେମିକା ନିଜ ଅଢ଼େଇ ବର୍ଷର ଶିଶୁକୁ ନେଇ ପହଞ୍ଚିଥିଲେ। ପ୍ରେମିକା ଜଣକ ଯୁବକଙ୍କ କୋଳରେ ଶିଶୁଟିକୁ ବସାଇ ତା’ର ବାପା ବୋଲି ଦାବି କରିଥିଲେ। ଏହାପରେ ଝିଅଘର ଲୋକେ ଅଧାରୁ ବିବାହ ଭାଙ୍ଗିଦେବା ସହ ଯୁବକ ଓ ତାଙ୍କ ବାପାଙ୍କ ସମେତ ୨ଶହ ବରଯାତ୍ରୀଙ୍କୁ ଅଟକ ରଖିଥିଲେ। ଖବରପାଇ ପୋଲିସ ଘଟଣାସ୍ଥଳରେ ପହଞ୍ଚି ଦୁଇ ପକ୍ଷଙ୍କୁ ବୁଝାଶୁଝା କରିଥିଲେ। କିନ୍ତୁ ଆପୋସ ବୁଝାମଣା ପାଇଁ କେହି ରାଜି ହୋଇ ନ ଥିଲେ। ଅପରପକ୍ଷରେ ଏହି ମାମଲାରେ ଗୁରୁବାର ଦୁଇ ପକ୍ଷରୁ ପଞ୍ଚାୟତ ବସିଛି। ଏଥିରେ କିଛି ନିଷ୍କଷର୍ର୍ ବାହାରିପାରେ ବୋଲି ଗଁାଲୋକେ ଆଶା କରିଛନ୍ତି।
