ଅନୁଗୋଳ ଅଫିସ, ୧୦।୧- ଅନୁଗୋଳ ପୌରପାଳିକାକୁ ବିଭିନ୍ନ ଅଭିଯୋଗ ନେଇ ଆସୁଥିବା ସହରବାସୀ ଅନେକ ସମୟରେ ବିଭାଗୀୟ କର୍ମଚାରୀଙ୍କୁ ଅଫିସରେ ପାଉନାହାନ୍ତି। କାର୍ଯ୍ୟାଳୟ ଖୋଲାଥିଲେ ବି ବିଭିନ୍ନ ବିଭାଗର କେତେଜଣ କର୍ମଚାରୀ ତାଙ୍କ ଆସନରେ ଅଧିକାଂଶ ସମୟ ରହୁ ନ ଥିବା ସାଧାରଣରେ ଅଭିଯୋଗ ହେଉଛି। ବିଶେଷକରି ଜନ୍ମ ମୃତ୍ୟୁ ବିଭାଗରେ ଏପରି ଅବ୍ୟବସ୍ଥା ଏବେ ଅସନ୍ତୋଷର କାରଣ ହୋଇଛି। ଏ ନେଇ ପୌରନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା କହିଛନ୍ତି, କର୍ମଚାରୀଙ୍କ ଉପରେ ତୀକ୍ଷ୍ଣ ନଜର ରଖାଯାଇଛି। ଖୁବ୍ଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଅନୁଗୋଳ ପୌରପାଳିକାରେ ବାୟୋମେଟ୍ରିକ ଉପସ୍ଥାନ ବ୍ୟବସ୍ଥା କରାଯାଇଛି। କେତେକ ବିଭାଗରେ ସିସିଟିଭି ମଧ୍ୟ ଲଗାଯାଇଛି। କିନ୍ତୁ କେତେଜଣ ପୌର କର୍ମଚାରୀଙ୍କ ଉପରେ ଏହାର କୌଣସି ପ୍ରଭାବ ପଡ଼ୁନାହିଁ। ସେମାନେ ଉପସ୍ଥାନ ପକାଇବା ପରେ ଅଧିକାଂଶ ସମୟ ଆସନରେ ରହୁନାହାନ୍ତି। ଏ ନେଇ ଅଭିଯୋଗ ନେଇ ଆସୁଥିବା ଜନସାଧାରଣ ପ୍ରଶ୍ନ କଲେ କେତେବେଳେ ସମ୍ପୃକ୍ତ କର୍ମଚାରୀ ଜିଲାପାଳଙ୍କ କାର୍ଯ୍ୟାଳୟକୁ ଫାଇଲ ନେଇ ଯାଇଛନ୍ତି ତ ଆଉ କେତେବେଳେ ପିଡିଙ୍କ ପାଖକୁ ଯାଇଛନ୍ତି ବୋଲି ଅନ୍ୟ କର୍ମଚାରୀମାନେ କହୁଛନ୍ତି।