ଛେଣ୍ଡିପଦା,୧୨।୮(ସ୍ବ.ପ୍ର.): ଅନୁଗୋଳ ଜିଲା ଜରପଡ଼ା ଥାନା ଅନ୍ତର୍ଗତ ଜରଡ଼ାଠାରେ ସୋମବାର ଜିନ୍ଦଲ କ୍ଷତିଗ୍ରସ୍ତ ପ୍ରଜା ସଂଘ ପକ୍ଷରୁ ଜନ ଆନ୍ଦୋଳନ ଦେଖିବାକୁ ମିଳିଛି। ବିଭିନ୍ନ ମୌଳିକ ସୁବିଧାନେଇ କ୍ଷତିଗ୍ରସ୍ତ ପ୍ରଜା ସଂଘ ପକ୍ଷରୁ କମ୍ପାନୀ କର୍ତ୍ତୃପକ୍ଷଙ୍କୁ ବାରମ୍ବାର ଅଭିଯୋଗ କରାଯାଇଥିଲେ ମଧ୍ୟ ଏଥିପ୍ରତି ସେମାନେ ଦୃଷ୍ଟି ଦେଉ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି । ଏ ନେଇ ସଂଘ ପକ୍ଷରୁ ସୋମବାର ସକାଳ ୭ଟାରୁ ଅନୁଗୋଳ- ସମ୍ବଲପୁର ୫୫ ନଂ. ଜାତୀୟ ରାଜପଥରୁ ଜିନ୍ଦଲ ଯାଇଥିବା ରାସ୍ତାକୁ ଜରଡାଠାରେ ଅବରୋଧ କରାଯାଇଥିଲା। ଜରଡ଼ା କ୍ଷତିଗ୍ରସ୍ତ ପ୍ରଜା ସଂଘ ସଭାପତି ନରୋତ୍ତମ ସାହୁଙ୍କ ନେତୃତ୍ୱରେ ଜିନ୍ଦଲ କମ୍ପାନୀ ଅଧିକୃତ କରିଥିବା ଜମିର ଉଚିତ ମୂଲ୍ୟ ଏବଂ ବର୍ଦ୍ଧିତ ମୂଲ୍ୟ ପ୍ରଦାନ, ଜିନ୍ଦଲ କ୍ଷତିଗ୍ରସ୍ତ ପ୍ରଜାଙ୍କୁ ଥଇଥାନ ଓ ସ୍ଥାୟୀ ନିଯୁକ୍ତି, କ୍ଷତିଗ୍ରସ୍ତ ଗ୍ରାମଗୁଡିକରେ ଉନ୍ନୟନମୂଳକ କାର୍ଯ୍ୟ, ଜିନ୍ଦଲ କମ୍ପାନୀର ପ୍ରଦୂଷଣ ବନ୍ଦ ଆଦି ଦାବିରେ ଜରଡା, ହଳଧରପୁର, କେରଜାଙ୍ଗ ଆଦି ଗ୍ରାମର ଶତାଧିକ କ୍ଷତିଗ୍ରସ୍ତ ପ୍ରଜାମାନେ ଜନ ଆନ୍ଦୋଳନ କରିବା ସହ ଧାରଣାରେ ବସିଥିଲେ। ଖବର ପାଇ ଜରପଡ଼ା ପୋଲିସ ଘଟଣାସ୍ଥଳରେ ପହଞ୍ଚି ଆନ୍ଦୋଳନକାରୀଙ୍କ ସହିତ ଆଲୋଚନା ଜାରି ରଖିଥିବା ଜଣାପଡ଼ିଛି।