ଆଠମଲ୍ଲିକ,୨୫।୧୨(ଡି.ଏନ.ଏ.): ଆଠମଲ୍ଲିକ ଉପଜିଲାପାଳ ଡ.ରଜନୀକାନ୍ତ ବିଶ୍ୱାଳ ବୁଧବାର ଆଠମଲ୍ଲିକ ଓ କିଶୋରନଗର ଅଞ୍ଚଳର ବିଭିନ୍ନ ଧାନମଣ୍ଡି ପରିଦର୍ଶନ କରିଛନ୍ତି। ଏହି ଅବସରରେ ମଣ୍ଡିକୁ ଧାନ ଆଣିଥିବା ପଞ୍ଜିକୃତ ଚାଷୀମାନଙ୍କ ସହ ସେ କଥା ହୋଇ ତାଙ୍କର ସୁବିଧା ଅସୁବିଧା ସମ୍ପର୍କରେ ପଚାରି ବୁଝିଥିଲେ। ଏଥିସହିତ ସେମାନେ ଯେଭଳି ଅସୁବିଧାର ସମ୍ମୁଖୀନ ନ ହୁଅନ୍ତି ସେଥିପ୍ରତି ଯତ୍ନବାନ ହେବା ପାଇଁ ସମବାୟ ସମିତିର ସମ୍ପାଦକ ଏବଂ କର୍ମକର୍ତ୍ତାମାନଙ୍କୁ ପରାମର୍ଶ ଦେଇଥିଲେ। ପରେ ମାଧପୁର ଧାନମଣ୍ଡି ପରିଦର୍ଶନ କରିଥିଲେ। ଏହି ମଣ୍ଡିରେ ୨୪ ଜଣ ପଞ୍ଜିକୃତ ଚାଷୀ ଧାନ ଦେଇପାରିବେ ବୋଲି ଜଣାଯାଇଛି। ଏହି ସମୟରେ ସହକାରୀ ଯୋଗାଣ ଅଧିକାରୀ ଦାଶରଥି ସୋରେନ, ସମବାୟ ସମିତ ସଭାପତି ବିଶ୍ୱାମିତ୍ର ମହାକୁଡ, ସମ୍ପାଦକ ସର୍ବେଶ୍ୱର ଗୁରାଣ୍ଡି ଆଦି ଉପସ୍ଥିତ ଥିଲେ। ଏହାପରେ ବାମୁର ପ୍ରାଥମିକ ସେବା ସମବାୟ ସମିତି ଧାନମଣ୍ଡି ପରିଦର୍ଶନ କରିଥିଲେ। ୨୨ ଜଣ ପଞ୍ଜିକୃତ ଚାଷୀ ଧାନ ମଣ୍ଡିକୁ ଆଣିଥିଲେ। ବାମୁରରେ ସମବାୟ ସମିତିର ସଭାପତି ସଞ୍ଜୀବ ପ୍ରଧାନ, ସହକାରୀ ନିବନ୍ଧକ ସମବାୟ ସଂସ୍ଥା ସୁରେଶ ଚନ୍ଦ୍ର ଜେନାଙ୍କ ସହ ବହୁ ଚାଷୀ ଉପସ୍ଥିତ ଥିଲେ।