ବାରିପଦା ଅଫିସ, ୨୯ା୩- ମୟୂରଭଞ୍ଜ ଜିଲାର ବିିଭିନ୍ନ ଅଞ୍ଚଳରୁ ଅନ୍ୟ ରାଜ୍ୟକୁ କାମ କରିବାକୁ ଯାଇଥିବା ଶତାଧିକ ଯୁବକ ଲକଡାଉନ ଯୋଗୁଁ ଫସି ରହିଛନ୍ତି। ଉଦ୍ଧାର ପାଇଁ ସେମାନେ ଭିଡ଼ିଓ ପୋଷ୍ଟ କରି ଆକୁଳ ନିବେଦନ କରିଛନ୍ତି। ସେହିଭଳି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସେମାନଙ୍କୁ ସାହାଯ୍ୟ କରିବା ନିମନ୍ତେ ବିଭିନ୍ନ ରାଜ୍ୟର ମୁଖ୍ୟମନ୍ତ୍ରୀମାନଙ୍କୁ ଚିଠି ଲେଖିଥିଲେ ମଧ୍ୟ ଫସି ରହିଥିବା ଯୁବକମାନେ କୌଣସି ସାହାଯ୍ୟ ପାଇ ନ ଥିବା ପ୍ରକାଶ କରିଛନ୍ତି। ଜିଲାର ୫୦ ଜଣ ଯୁବକ ତେଲେଙ୍ଗାନା ରାଜ୍ୟ କରେନନଗର ଜିଲାରେ ଫସି ରହିଛନ୍ତି। ଖାଇବା ଲାଗି ସେଠାରେ ସେମାନେ ବହୁତ ଅସୁବିଧାର ସମ୍ମୁଖୀନ ହେଉଛନ୍ତି। ସେହିଭଳି ବଡ଼ସାହି ନିର୍ବାଚନମଣ୍ଡଳୀର ୫୫ରୁ ଊର୍ଦ୍ଧ୍ୱ ଯୁବକ ତାମିଲନାଡ଼ୁ ରାଜ୍ୟ ପଣ୍ଡିଚେରିକୁ କାମ କରିବାକୁ ଯାଇ ସେଠାରେ ଅଟକି ରହିଛନ୍ତି। ଲକଡାଉନ ହେବା ଯୋଗୁଁ ଗାଁକୁ ଆସିପାରି ନାହାନ୍ତି। ରାଜ୍ୟ ସରକାର ସୁବିଧା କରିଥିଲେ ମଧ୍ୟ ତାଙ୍କୁ କୌଣସି ସହାୟତା ମିଳି ନ ଥିବା ସେମାନେ ପ୍ରକାଶ କରିଛନ୍ତି। ଏହିଭଳି ଜିଲାର ବହୁ ଯୁବକ ବିଭିନ୍ନ ରାଜ୍ୟରେ ଫସି ରହିଥିବା ବେଳେ ସେମାନଙ୍କୁ ଉଦ୍ଧାର କରିବା ପାଇଁ ମୁଖ୍ୟମନ୍ତ୍ରୀ ଓ ମୟୂରଭଞ୍ଜ ଜିଲାପାଳ ଦୃଷ୍ଟି ଦେବାକୁ ବୁଦ୍ଧିଜୀବୀ ମହଲରେ ଦାବି ହେଉଛି।