କର୍ଲାମୁଣ୍ଡା,୨୩।୮(ଡି.ଏନ୍.ଏ.): କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକ ସଦରସ୍ଥିତ ବିଭିନ୍ନ ଶିକ୍ଷାନୁଷ୍ଠାନରେ ଶୁକ୍ରବାର ଜନ୍ମାଷ୍ଟମୀ ପାଳିତ ହୋଇଯାଇଛି। ଏହି ଅବସରରେ ଆୟୋଜିତ ଉତ୍ସବରେ ମୁଖ୍ୟ ଅତିଥି ଭାବେ ଶିକ୍ଷକ ସୋମନାଥ ସାହୁ , ସମ୍ମାନିତ ଅତିଥି ଭାବେ ଶିଶୁମନ୍ଦିର କୋଷାଧ୍ୟକ୍ଷ ଡୋଳାମଣି ଭୋଇ, ସଂପାଦକ ଗୁରବାରୁ ସାହୁ, ମୁଖ୍ୟବକ୍ତା ଭାବେ ଗୁରୁଜୀ ତୁମେଶ୍ୱର ସାହୁ ପ୍ରମୁଖ ଯୋଗଦେଇ ଜନ୍ମାଷ୍ଟମୀ ପାଳନର ଲକ୍ଷ୍ୟ/ଉଦ୍ଦେଶ୍ୟ କହିବା ସହ ଭାଇଭଉଣୀମାନଙ୍କୁ ଆଧ୍ୟାତ୍ମିକ ଭାବନା ପ୍ରତି ମନ ନିବେଶ କରିବାକୁ ପରାମର୍ଶ ଦେଇଥିଲେ। ଏଥିରେ ସରସ୍ବତୀ ଶିଶୁମନ୍ଦିର ପ୍ରଧାନ ଆଚାର୍ଯ୍ୟ ଶାନ୍ତନୁ କୁମାର ମିଶ୍ର ସ୍ବାଗତ ଭାଷଣ ଦେଇଥିବାବେଳେ ଗୁରୁଜୀ ଲକ୍ଷ୍ମୀକାନ୍ତ ଜ୍ୟୋତିଷ ସଂଯୋଜନା କରିଥିଲେ। ପ୍ରତିଯୋଗିତାରେ ୨୮ଜଣ ଭାଇ ଭଉଣୀ କୃଷ୍ଣ, ବଳରାମ, ରାଧା, ସୁଦାମାଙ୍କ ବିଭିନ୍ନ ବେଶରେ ସଜ୍ଜିତ ହୋଇ ଡୁକେରମାଲ ଓ ବ୍ଲକ କଲୋନୀ ନଗର ପରିକ୍ରମା କରିଥିଲେ। ସେହିପରି ବ୍ଲକ ସଦରସ୍ଥିତ ସ୍ବାମୀ ବିବେକାନନ୍ଦ ପବ୍ଲିକ ସ୍କୁଲ, କୁର୍ଶୁଲା ସରସ୍ବତୀ ଶିଶୁମନ୍ଦିର, ଭଟାପଲା ସରସ୍ବତୀ ଶିଶୁମନ୍ଦିର, ରିଷିଡ଼ା ସରସ୍ବତୀ ଶିଶୁମନ୍ଦିରରେ ମଧ୍ୟ ଜନ୍ମାଷ୍ଟମୀ ପାଳିତ ହୋଇଯାଇଛି।
