ଚଣ୍ଡିଖୋଲ,୨୬।୯(ଡି.ଏନ୍.ଏ.): ଯାଜପୁର ଜିଲା ଧର୍ମଶାଳା ବ୍ଲକ ଅନ୍ତର୍ଗତ ହରିଦାସପୁର ରେଳଷ୍ଟେଶନରେ ରବିବାର ଏକ ଶାନ୍ତିପୂର୍ଣ୍ଣ ଗଣ ଧାରଣା ଦିଆଯାଇଛି। ଓଡ଼ିଶାର ସମସ୍ତ ରୁଟ୍ରେ ଦୀର୍ଘ ଦେଢ଼ ବର୍ଷ ଧରି ଲୋକାଲ ଟ୍ରେନ୍ ଚାଳାଚଳ ବନ୍ଦ ରହିଛି। ଏଥିରେ ନିର୍ଭରକରୁଥିବା ଦିନମଜୁରିଆ, ବେସରକାରୀ କର୍ମଚାରୀ, କଲେଜ ଛାତ୍ରୀଛାତ୍ର, ନିଜେ ରେଳବାଇ ଷ୍ଟାଫମାନେ ନାହିଁ ନ ଥିବା ସମସ୍ୟା ଭୋଗୁଛନ୍ତି। ଗତ ମାର୍ଚ୍ଚ ୨୦୨୦ରୁ କରୋନା ଯୋଗୁ କେନ୍ଦ୍ରସରକାର ସାରା ଦେଶରେ ତାଲା ବନ୍ଦ କରିବା ସଙ୍ଗେସଙ୍ଗେ ଟ୍ରେନଗୁଡିକ ଚଳାଚଳ ବନ୍ଦ କରିଥିଲେ। ହେଲେ ପୁନଃଶ୍ଚ ଏପ୍ରିଲ ୭ ତାରିଖ ୨୦୨୧ରେ ଓଡ଼ିଶାର ସମସ୍ତ ସେକ୍ସନରେ ଲୋକାଲ ଟ୍ରେନ ପାଇଁ ଅନୁମତି ମିଳିଲା ତାହାପୁଣି ମେଲ/ଏକ୍ସପ୍ରେସ ଭଡା ଦେଇ। ପରେ ପୁଣି କରୋନା ପ୍ରଭାବକୁ ଦେଖି ମେ ୭ ୨୦୨୧ରୁ ଟ୍ରେନ ଚଳାଚଳ ବନ୍ଦ ହେଇଗଲା ଯାହାକି ଦୀର୍ଘ ୫ ମାସ ହେଲାଣି ଲକ୍ଡାଉନ୍ ଖୋଲିବା ସତ୍ତ୍ୱେ ଚାଲିବାର ନାଁ ଧରୁନି। ଅଳ୍ପ ଦିନ ହେବ ଭଦ୍ରକ ମେମୁ ଚାଲିଥିଲେ ମଧ୍ୟ ଏସ୍ସପ୍ରେସ ଭଡ଼ା ସାଙ୍ଗକୁ ମାସିକ, ତ୍ରୈମାସିକ ଟିକେଟ୍ ସୁବିଧା ମିଳୁନାହିଁ । ଏହି ସବୁ ସମସ୍ୟାର ସ୍ଥାୟୀ ସମାଧାନ ପାଇଁ ହରିଦାସପୁର ରେଳ ଷ୍ଟେଶନ ମାଷ୍ଟରଙ୍କ ଜରିଆରେ ରେଳମନ୍ତ୍ରୀ ଅଶ୍ବିନୀ ବୈଷ୍ଣବଙ୍କୁ ଏକ ୩ ଦଫା ସମ୍ବଳିତ ଦାବିପତ୍ର ପ୍ରଦାନ କରାଯାଇଛି। ଉକ୍ତ ଦାବିଗୁଡ଼ିକ ହେଲା, ପୂର୍ବଭଳି ସମସ୍ତ ଲୋକାଲ ଟ୍ରେନ ଚାଲୁ, ଲୋକାଲ ଟ୍ରେନ ଏକ୍ସପ୍ରେସ ଭଡ଼ା ପରିବର୍ତ୍ତେ ସାଧାରଣ ଟିକେଟ ପାଇଁ ଅନୁମତି ଏହା ସହ ମାସିକିଆ, ତ୍ରୈମାସିକ, ବାର୍ଷିକ ଟିକେଟ ପାଇଁ ଅନୁମତି । ଆଶୁତୋଷ କରଙ୍କ ଅଧ୍ୟକ୍ଷତାରେ ୫ ପଞ୍ଚାୟତର ନିର୍ଭରଶୀଳ ଗ୍ରାମବାସୀ ଏହି ଶାନ୍ତିପୂର୍ଣ୍ଣ ଧାରଣାରେ ସାମିଲଥିଲେ।