ମାଡ୍ରିଡ,୬।୮: ବ୍ରିଟ୍ରିଶ ଏୟାରଓ୍ବେଜ୍ର ଏକ ବିମାନ ଲଣ୍ଡନରୁ ସ୍ପେନ ଯାଉଥିବା ବେଳେ ଇଞ୍ଜିନରେ ନିଅଁ। ଲାଗିବାରୁ ବିମାନ ଭିତରେ ହଠାତ୍ ଧୂଆଁମୟ ହୋଇଯାଇଥିଲା। ଏହାପରେ ସ୍ପେନର ଭାଲେନ୍ସିଆ ବିମାନବନ୍ଦରରେ ଏହାକୁ ଜରୁରୀ ଅବତରଣ କରାଯାଇଥିଲା। ଅବତରଣ କରିବା ସମୟରେ ଉକ୍ତ ବିମାନର କ୍ୟାବିନ୍ରେ ଅଧିକ ଧୂଆଁମୟ ହେବାରୁ ସମସ୍ତ ଯାତ୍ରୀ ଅଣନିଶ୍ୱାସୀ ହେବା ସହ ଭୟଭୀତ ହୋଇପଡ଼ିଥିଲେ। ଏହି ଧୂଆଁ ଏତେ ମାତ୍ରାରେ ରହିଥିଲା ଯେ ସାମ୍ନାରେ ବସିଥିବା ବ୍ୟକ୍ତି ମଧ୍ୟ ଦେଖାଯାଉ ନ ଥିଲେ। ଏହାପରେ ବିମାନକୁ ଜରୁରୀ ଅବତରଣ କରାଯାଇ ସେଥିରେ ଥିବା ୧୭୫ ଯାତ୍ରୀ, ୬କ୍ର୍ୟୁ ମେମ୍ବର ଓ ୨ପାଇଲଟଙ୍କୁ ସୁରକ୍ଷିତ ଭାବେ ବାହାର କରାଯାଇଥିଲା। ଏହି ଧୂଆଁରେ ଅଣନିଶ୍ୱାସୀ ହୋଇ ୩ଯାତ୍ରୀଙ୍କ ସ୍ବାସ୍ଥ୍ୟାବସ୍ଥା ବିଗିଡ଼ିଥିବା ବେଳେ ଜରୁରୀକାଳିନ ଦ୍ୱାର ଦେଇ ୧୦ରୁ ଊର୍ଦ୍ଧ୍ୱ ଯାତ୍ରୀ ବାହାରକୁ ବହାରୁଥିବା ସମୟରେ ଆହତ ହୋଇଥିଲେ। ସେମାନଙ୍କୁ ଉଦ୍ଧାର କରାଯାଇ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି। ଅନ୍ୟପଟେ ପୂର୍ବରୁ ବିମାନର ଇଞ୍ଜିନରେ ନିଆଁ ଲାଗିବାର ସୂଚନା ମିଳିଥିଲା ବେଳେ ସୁରକ୍ଷାକର୍ମୀଙ୍କୁ ବିମାନବନ୍ଦରରେ କେବଳ ଧୂଆଁ ଦେଖାଯାଇଥିଲା ବୋଲି ଭାଲେନ୍ସିଆ ସରକାରଙ୍କ ଉଦ୍ଧାରକାରୀ ଦଳ କହିଛନ୍ତି। ତେବେ ଏହି ଘଟଣାର ତଦନ୍ତ ନିର୍ଦ୍ଦେଶ ଦିଆଯାଇଛି।