ନୂଆଦିଲ୍ଲୀ,୩୧ା୮: ବିମୁଦ୍ରୀକରଣ ବେଳେ ୧ କୋଟି ୧୭ ଲକ୍ଷ ଅଚଳ ଟଙ୍କା ଜମା କରିପାରି ନ ଥିବା ତାମିଲନାଡୁର ଜଣେ ବ୍ୟବସାୟୀ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ଏହି ଟଙ୍କା ଗ୍ରହଣ କରିବା ନିମନ୍ତେ ରିଜର୍ଭ ବ୍ୟାଙ୍କ ଓ କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଦେବାକୁ ସେ ସର୍ବୋଚ୍ଚ ଅଦାଲତଙ୍କୁ ଅନୁରୋଧ କରିଛନ୍ତି। ତାଙ୍କ ପିଟିଶନ ଉପରେ ଜବାବ ଦାଖଲ କରିବା ଲାଗି କେନ୍ଦ୍ର ସରକାରଙ୍କୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି। ୨୦୧୬ ନଭେମ୍ବର ୮ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସେତେବେଳେ ପ୍ରଚଳିତ ୫୦୦ ଓ ୧୦୦୦ ଟଙ୍କିଆ ନୋଟ ଅଚଳ ହେଲା ବୋଲି ଘୋଷଣା କରିଥିଲେ। ବ୍ୟାଙ୍କରେ ଏହି ଟଙ୍କା ଡିସେମ୍ବର ୩୦ ସୁଦ୍ଧା ଜମା କରିବାକୁ ଜନସାଧାରଣଙ୍କୁ ସୁଯୋଗ ଦିଆଯାଇଥିଲା। ମଦୁରାଇର ବ୍ୟବସାୟୀ କେ. ରମଣ ୨୦୧୬ ଡିସେମ୍ବର ୩୦ରେ ଉକ୍ତ ଟଙ୍କା ଜମା କରିବାକୁ ତାମିଲନାଡୁର ମର୍କାଣ୍ଟାଇଲ୍ ବ୍ୟାଙ୍କକୁ ଯାଇଥିଲେ। ବ୍ୟାଙ୍କ କର୍ତ୍ତୃପକ୍ଷ ଉକ୍ତ ଟଙ୍କାକୁ ଗ୍ରହଣ କରି ନ ଥିଲେ। ଏହା ପରେ ସେ ରିଜର୍ଭ ବ୍ୟାଙ୍କକୁ ମଧ୍ୟ ଟଙ୍କା ଗ୍ରହଣ କରିବାକୁ ଅନୁରୋଧ କରିଥିଲେ। ତେବେ ଏହି ଟଙ୍କା ଆଉ ଗ୍ରହଣ କରାଯାଇପାରିବ ନାହିଁ ବୋଲି ରିଜର୍ଭ ବ୍ୟାଙ୍କ ଗତମାସରେ ରମଣଙ୍କୁ ଜଣାଇଥିଲା ବୋଲି ସେ ପିଟିଶନରେ ଉଲ୍ଲେଖ କରିଛନ୍ତି।