ବାଲେଶ୍ୱର ଅଫିସ, ୨୪।୨-ବିର୍ଲା ଟାୟାର୍ସ କାରଖାନାରେ ବିଭିନ୍ନ ଅନିୟମିତତାର ସିବିଆଇ ତଦନ୍ତ ଦାବି କରି ସୋମବାର ୱାର୍କର୍ସ ୟୁନିଅନ୍ ପକ୍ଷରୁ ଶତାଧିକ କର୍ମଚାରୀ ବାଲେଶ୍ୱର ସହର ଏଡ଼ିଏମ୍ ଛକସ୍ଥିତ ଜିଲା ଶ୍ରମ ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଛନ୍ତି।
ୟୁନିଅନ ପକ୍ଷରୁ ଅଭିଯୋଗ କରାଯାଇଛି ଯେ, ରେମୁଣା ବ୍ଲକ ବାମପଦା ଛକରେ ୧୯୯୧ରେ ବିର୍ଲା ଟାୟାର୍ସ ନିର୍ମାଣ ହୋଇଥିଲା। ରାଜ୍ୟ ଓ କେନ୍ଦ୍ର ସରକାରଙ୍କ ସମସ୍ତ ସୁବିଧା ସୁଯୋଗ ଓ ଶ୍ରମିକମାନଙ୍କ ଅକ୍ଳାନ୍ତ ପରିଶ୍ରମର ସହଯୋଗରେ କାରଖାନା ପ୍ରତିଷ୍ଠିତ ହେବା ସହ ଭଲ ଉପତ୍ାଦନ କରି ଲାଭ କରିବାରେ ସମର୍ଥ ହୋଇଥିଲା। କିନ୍ତୁ ଚଞ୍ଚକତା ପୂର୍ବକ କାରଖାନାରେ କ୍ଷତି ହେଉଥିବା ମିଥ୍ୟା ବାଲାନ୍ସ ସିଟ୍ ରାଜ୍ୟ ଓ କେନ୍ଦ୍ରସରକାରଙ୍କ ନିକଟରେ ଉପସ୍ଥାପନା କରାଯାଇଆସୁଛି। ଏନେଇ ବିଭିନ୍ନ ସମୟରେ ୱାର୍କର୍ସ ୟୁନିଅନ ପକ୍ଷରୁ ବିଭିନ୍ନ କୋର୍ଟରେ ମାମଲା ରୁଜୁ କରାଯାଇଥିବା ୱାର୍କର୍ସ ୟୁନିଅନ୍ ସଭାପତି ରାଜେନ୍ଦ୍ର ବଳ କହିଛନ୍ତି। ଅନ୍ୟପକ୍ଷରେ ଜିଲା ଶ୍ରମ ବିଭାଗ ଅଧିକାରୀଙ୍କ ପାଖରେ ବର୍ଷ ବର୍ଷ ଧରି ଅଭିଯୋଗ ପଡ଼ିରହିଥିବା ୟୁନିଅନ ପକ୍ଷରୁ ଅଭିଯୋଗ କରାଯାଇଛି। ଜିଲାରେ ଶିଳ୍ପାୟନକୁ ସୁସ୍ଥ ଓ ଦୃଢ଼ ପ୍ରଗତି କରି ଶ୍ରମିକଙ୍କ ଭବିଷ୍ୟତ ଉପରେ ଗୁରୁତ୍ୱ ଦେବା ପାଇଁ ୟୁନିଅନର ସମ୍ପାଦକ ଦିଲୀପ କୁମାର ପଣ୍ଡା, ସହସମ୍ପାଦକ କମଳାକାନ୍ତ ଗ୍ରହାଚାର୍ଯ୍ୟ, ଉପସଭାପତି ନାରାୟଣ ବେହେରା, ବରିଷ୍ଠ ସଦସ୍ୟ ଅଶୋକ କୁମାର ବେହେରା, ଅଜିତ୍ କୁମାର ଦଳାଇ ପ୍ରମୁଖ ଦାବି କରିଛନ୍ତି।
ଜିଲା ଶ୍ରମ ଅଧିକାରୀ କୁବେର ବେହେରା ମାଟ୍ରିକ ପରୀକ୍ଷାର ସୁପରିଣ୍ଟେଣ୍ଡେଣ୍ଟ ଦାୟିତ୍ୱରେ ଥିବାରୁ ସେ ଅନୁପସ୍ଥିତ ଥିଲେ। ଏ ସମ୍ପର୍କରେ ରୁରାଲ ଲେବର ଇନ୍ସପେକ୍ଟର ଦିଲ୍ଲୀପ ହାଁସଦା କହିଛନ୍ତି ଯେ, ଧାରଣାକାରୀଙ୍କ ଦାବି ସମ୍ପର୍କରେ ସିଧାସଳଖ ଭାବେ ଶ୍ରମ ଅଧିକାରୀ ହସ୍ତକ୍ଷେପ କରିଥାନ୍ତି। ଏ ବିଷୟରେ ସେ ଅବଗତ ନାହାନ୍ତି।