ଖଲ୍ଲିକୋଟ,୧୪ା୧୨(ଡି.ଏନ.ଏ.)- ଗଞ୍ଜାମ ଜିଲା ଖଲ୍ଲିକୋଟ ବ୍ଲକ ତୁଳସୀପୁର ଗ୍ରାମ ନିକଟ ମୁଗ ବିଲରେ ଶୁକ୍ରବାର ଅପରାହ୍ନରେ ଜଣେ ଯୁବକଙ୍କ କ୍ଷତବିକ୍ଷତ ମୃତଦେହ ପଡିଥିବା ଗ୍ରାମବାସୀ ଦେଖିଥିଲେ। ଏନେଇ ଖଲ୍ଲିକୋଟ ଥାନାକୁ ଜଣାଇଥିଲେ। ପୋଲିସ ପହଞ୍ଚତ୍ ସନ୍ଧ୍ୟାରେ ମୃତଦେହ ଜବତ କରି ସ୍ଥାନୀୟ ମେଡିକାଲକୁ ନେଇଥିଲା। ମୃତ ଯୁବକ ଜଣକ ବ୍ରହ୍ମପୁର ବଡ଼ ବଜାର ଅଞ୍ଚଳର ବସନ୍ତ ସାହୁ (୨୫)। ମୃତଦେହର ବିଭିନ୍ନ ସ୍ଥାନରେ ଗଭୀର କ୍ଷତ ରହିଛି। ତାଙ୍କୁ ଧାରୁଆ ଅସ୍ତ୍ରରେ ହାଣି ହତ୍ୟା କରାଯାଇଥିବା ଅନୁମାନ କରାଯାଉଛି। ମୃତଦେହ ନିକଟରୁ କେତେଗୁଡ଼ିଏ ବ୍ଲେଡ ପୋଲିସ ଜବତ କରିଛି।
ପୋଲିସର ସୂଚନା ଅନୁଯାୟୀ, ବସନ୍ତ ଗୁରୁବାର ତାଙ୍କ ସାଙ୍ଗ ତୁଳସୀପୁର ଗ୍ରାମର କାଳୁ ପ୍ରଧାନ (୨୦)ଙ୍କ ଘରକୁ ଆସିଥିଲେ। ସନ୍ଧ୍ୟାରେ ଉଭୟେ ବିଲମାଳକୁ ଯାଇଥିଲେ। ସେଠାରେ ଚୋରି ଟଙ୍କା ଭାଗବଣ୍ଟାକୁ ନେଇ ପାଟିତୁଣ୍ଡ ହୋଇଥିବା ପୋଲିସ ଅନୁମାନ କରୁଛି। ଗୁରୁବାର ରାତିରେ କାଳୁ ପ୍ରଧାନଙ୍କ ବେକ ଧାରୁଆ ବ୍ଲେଡରେ କଟିଥିବାରୁ ସେ ମଧ୍ୟ ଖଲ୍ଲିକୋଟ ଡ଼ାକ୍ତରଖାନାରେ ଚିକିତ୍ସିତ ହେଉଛନ୍ତି। ଏନେଇ ପୋଲିସ କାଳୁଙ୍କୁ ପଚରାଉଚରା କରୁଛି।
ପ୍ରକାଶ ଯେ, ପୂର୍ବରୁ ବ୍ରହ୍ମପୁର ଜିଆର୍ପି ଏକ ଲୁଟ୍ ଘଟଣାରେ ବସନ୍ତ ଓ କାଳୁଙ୍କୁ ଗିରଫ କରିଥିଲା। ପରେ ଉଭୟେ ଜାମିନରେ ଆସିଥିଲେ। ଚୋରି ଟଙ୍କା ଭାଗ ବଣ୍ଟାକୁ ନେଇ ଏହି ଘଟଣା ଘଟିଥିବା ପୋଲିସ ପ୍ରାଥମିକ ତଦନ୍ତରୁ ଜଣାପଡିଛି ବୋଲି ଥାନା ଅଧିକାରୀ ସତ୍ୟରଞ୍ଜନ ପ୍ରଧାନ ସୂଚନା ଦେଇଛନ୍ତି। ଖବର ଲେଖା ସୁଦ୍ଧା ବସନ୍ତଙ୍କ ଘର ଲୋକେ ପହଞ୍ଚତ୍ ନାହାନ୍ତି।