ହାଇଦ୍ରାବାଦ,୧।୧୨: ତେଲେଙ୍ଗାନାର ମହିଳା ଡାକ୍ତରଙ୍କୁ ବଳାତ୍କାର ଓ ହତ୍ୟା ଘଟଣା ସାରା ଦେଶକୁ ଦୋହଲାଇ ଦେଇଛି। ଏହି ଘଟଣାରେ ଦୋଷୀଙ୍କୁ ଫାଶୀ ଦେବା ପାଇଁ ସାରା ଦେଶରେ ଦାବି ଉଠିଛି। ଏସବୁ ଭିତରେ ରବିବାର ତେଲେଙ୍ଗାନାର ଖମ୍ମମରେ ଜଣେ ଗ୍ରାଜୁଏଟ୍ ଛାତ୍ର ବିଲ୍ଡଂ ଉପରେ ଚଢି କହିଛନ୍ତି, ହାଇଦ୍ରାବାଦ୍ ବଳାତ୍କାର କେସ୍ରେ ଦୋଷୀଙ୍କୁ ଫାଶୀ ଦିଅ ନ ହେଲେ ଆତ୍ମହତ୍ୟା କରିବି। ଛାତ୍ର ଜଣକ ଏଭଳି ଧମକ ମିଳିବା ପରେ ପୋଲିସ ଘଟଣାସ୍ଥଳରେ ପହଞ୍ଚି ତାଙ୍କୁ ବୁଝାସୁଝା କରିଥିଲେ। ପରେ ତାଙ୍କୁ ବିଲ୍ଡିଂ ଉପରୁ ଉଦ୍ଧାର କରାଯାଇଥିଲା। ତାଙ୍କୁ ଦେଖିବା ପାଇଁ ବିଲ୍ଡିଂ ତଳେ ପ୍ରବଳ ଭିଡ ଜମିଥିଲା। ଗଣବଳାତ୍କାର ପରେ ହତ୍ୟା ମାମଲାରେ ମହିଳାଙ୍କୁ ନ୍ୟାୟ ଦାବିରେ ତେଲେଙ୍ଗାନା ସମେତ ଦେଶର ଏକାଧିକ ସ୍ଥାନରେ ନ୍ୟାୟ ପାଇଁ ଲୋକମାନେ ରାଜରାସ୍ତାକୁ ଓହ୍ଲାଇଛନ୍ତି। ସୂଚନାଯୋଗ୍ୟ, ଗୁରୁବାର ରଙ୍ଗାରେଡ୍ଡୀ ଜିଲାର ଜଣେ ମହିଳା ଡାକ୍ତରଙ୍କୁ ୪ ଜଣ ଗଣବଳାତ୍କାର କରିବା ପରେ ତାଙ୍କୁ ପୋଡି ହତ୍ୟା କରିଥିଲେ। ପୋଲିସ ଏହି ଘଟଣାରେ ୪ ଅଭିଯୁକ୍ତଙ୍କୁ ଗିରଫ କରିଛି।
