ନୂଆଦିଲ୍ଲୀ,୧୩।୬: କରୋନା ଯୋଗୁ ଦେଶ ମଧ୍ୟରେ ଆର୍ଥତ୍କ କାର୍ଯ୍ୟକଳାପ କ୍ଷତିଗ୍ରସ୍ତ ହୋଇଛି। କାରବାର ପ୍ରଭାବିତ ହୋଇଥିବା ଲୋକମାନେ ସାମଗ୍ରୀ ଓ ସେବା ଟିକସ (ଜିଏସ୍ଟି) ଫାଇଲିଂ କରିବାରେ ନାନା ସମସ୍ୟା ସାମ୍ନା କରୁଛନ୍ତି। ଏହାକୁ ବିଚାର କରି ସରକାର ଟିକସଦାତାଙ୍କ ଲାଗି କିଛି ବିକଳ୍ପ ବ୍ୟବସ୍ଥା କରିଛନ୍ତି। ବାର୍ଷିକ ୫ କୋଟି ଟଙ୍କାର କାରବାର କରୁଥିବା ବ୍ୟକ୍ତିବିଶେଷଙ୍କ ଲାଗି ବିଳମ୍ବରେ ଜିଏସ୍ଟି ରିଟର୍ନ ଫାଇଲ ଉପରେ ଆଶ୍ୱସ୍ତି ମିଳିଛି। ଶୁକ୍ରବାର ବସିଥିବା ଜିଏସ୍ଟି ପରିଷଦ ବୈଠକରେ ବିଳମ୍ବ ଜିଏସ୍ଟି ଫାଇଲିଂ କ୍ଷେତ୍ରରେ ଲାଗୁଥିବା ସୁଧକୁ ୯%କୁ ହ୍ରାସ କରାଯାଇଛି। ଏହି ସୁଧ ହାର ପୂର୍ବରୁ ୧୮% ରହିଥିଲା। ଫେବୃୟାରୀ, ମାର୍ଚ୍ଚ ଏବଂ ଏପ୍ରିଲ ମାସ ଲାଗି ଏହି ସୁବିଧା ଉପଲବ୍ଧ ହେବ। ସେହିଭଳି ଚଳିତ ବର୍ଷ ସେପ୍ଟେମ୍ବର ଯାଏ ଲୋକଙ୍କୁ ରିଟର୍ନ ଫାଇଲ କରିବା ନେଇ ସୁବିଧା ଦିଆଯାଇଛି। ମେ, ଜୁନ ଏବଂ ଜୁଲାଇ ମାସ ଲାଗି ରିଟର୍ନ ଫାଇଲ କରିବା ଅବଧିକୁ ମଧ୍ୟ ସେପ୍ଟେମ୍ବର ଯାଏ ବୃଦ୍ଧି କରାଯାଇଛି। ଏହି ସମୟ ଅବଧି ଲାଗି ବିଳମ୍ବ ଦେୟରେ କୌଣସି ସୁଧ କିମ୍ବା ଚାର୍ଜ ଲାଗୁ ହେବ ନାହିଁ ବୋଲି ଅର୍ଥମନ୍ତ୍ରୀ ନିର୍ମଳା ସୀତାରାମନ ଜିଏସ୍ଟି ପରିଷଦ ବୈଠକ ଶେଷ ହେବା ପରେ ସୂଚନା ଦେଇଛନ୍ତି।
ସେ କହିଛନ୍ତି ଯେ, ଜୁଲାଇ ୨୦୧୭ଠାରୁ ଜାନୁୟାରୀ ୨୦୨୦ ମଧ୍ୟରେ ପଞ୍ଜୀକୃତ କମ୍ପାନୀଗୁଡ଼ିକର କୌଣସି ଟିକସ ଦେୟ ନ ଥିଲେ ବିଳମ୍ବରେ ଜିଏସ୍ଟି ଫାଇଲିଂ କଲେ ମଧ୍ୟ କୌଣସି ଜରିମାନା ଲାଗୁ ହେବ ନାହିଁ। ଅନ୍ୟ ଟିକସଦାତା ମାସିକ ସେଲ୍ସ ରିଟର୍ନ ଫାଇଲ କରି ନ ଥିଲେ ବିଳମ୍ବ ଦେୟ ଜନିତ ଜରିମାନାକୁ ହ୍ରାସ କରାଯାଇ ସର୍ବୋଚ୍ଚ ୫୦୦ ଟଙ୍କା ରଖାଯାଇଛି। ଜୁଲାଇ ୨୦୧୭ ଠାରୁ ଜାନୁୟାରୀ ୨୦୨୦ ସମୟ ଅବଧିରେ ଏହା ଲାଗୁ ହେବ। କରୋନା ପ୍ରଭାବ ନେଇ ଜିଏସ୍ଟି ପରିଷଦ ବୈଠକରେ ଆଲୋଚନା ହୋଇଥିବା ସେ ସ୍ପଷ୍ଟ କରିଛନ୍ତି। ଜିଏସ୍ଟି ସଂଗ୍ରହରେ ଉପୁଜିଥିବା ବାଧା , ଜୋତା, ସାର, ଏବଂ ଟେକ୍ସଟାଇଲ ସାମଗ୍ରୀ ଉପରେ ଟିକସକୁ ନେଇ ବିଚାର କରାଯିବା ଭଳି ପ୍ରସଙ୍ଗ ବୈଠକରେ ସାମିଲ ରହିଥିଲା। ଆଗାମୀ ବୈଠକଗୁଡିକରେ ପାନମସଲା ଉପରେ ଟିକସକୁ ମଧ୍ୟ ଆଲୋଚନା ପରିସରଭୁକ୍ତ କରାଯିବ। ସେହିଭଳି ରାଜ୍ୟଗୁଡିକୁ ପ୍ରଦାନ କରାଯାଉଥିବା ଜିଏସ୍ଟି କ୍ଷତିପୂରଣ ଆବଶ୍ୟକତା ଉପରେ ବିଚାର କରାଯିବ ବୋଲି ଜଣାପଡ଼ିଛି।