ବାରିପଦା ଅଫିସ, ୩ା୪- କରୋନା ଭାଇରସ୍ ସଂକ୍ରମଣକୁ ରୋକିବା ପାଇଁ ଶୁକ୍ରବାର ସକାଳୁ ବାରିପଦା ସହରରେ ବିଶୋଧନ କାର୍ଯ୍ୟ ଆରମ୍ଭ ହୋଇଛି। ପ୍ରଥମ ପର୍ଯ୍ୟାୟରେ ଶୁକ୍ରବାର ଅଗ୍ନିଶମ ବିଭାଗ ପକ୍ଷରୁ ଷ୍ଟିଲ ଗୋଲେଇଠାରୁ ବାଲେଶ୍ୱର ଗୋଲେଇ ପର୍ଯ୍ୟନ୍ତ ରାସ୍ତାର ଉଭୟ ପାର୍ଶ୍ୱକୁ ସାନିଟାଇଜ କରାଯାଇଥିଲା। ସୋଡ଼ିୟମ ହାଇପୋକ୍ଲୋରାଇଟ କେମିକାଲ ମିଶା ପାଣିକୁ ଅଗ୍ନିଶମ ବିଭାଗର କର୍ମଚାରୀମାନେ ସହରରେ ସିଞ୍ଚନ କରିଥିଲେ। ଅନ୍ୟ ଏକ ଗାଡ଼ିରେ ବାରିପଦା ପିଆରଏମ୍ ମେଡିକାଲକୁ ମଧ୍ୟ ସାନିଟାଇଜ କରାଯାଇଥିଲା। ପ୍ରଥମ ପର୍ଯ୍ୟାୟରେ ଏହି ସାନିଟାଇଜ କାର୍ଯ୍ୟ ଆରମ୍ଭ ହୋଇଥିବା ବେଳେ ଲକଡାଉନ ପର୍ଯ୍ୟନ୍ତ ସହରର ବିଭିନ୍ନ ସ୍ଥାନରେ ଏହା ଜାରି ରହିବ। ଶନିବାର ବାଲେଶ୍ୱର ଗୋଲେଇ ଠାରୁ ପାଲବଣି , ରବିବାର ଷ୍ଟେଶନ ବଜାର ଏହା ପରେ ସହରର ବିଭିନ୍ନ ସ୍ଥାନରେ ସାନିଟାଇଜ କରାଯିବ ବୋଲି ଜିଲା ଅଗ୍ନିଶମ ଅଧିକାରୀ ପ୍ରକାଶ ଜେନା ସୂଚନା ଦେଇଛନ୍ତି।