ଢେଙ୍କାନାଳ ଅଫିସ,୨୦।୬ – ଢେଙ୍କାନାଳ ଜିଲା ଯୋରନ୍ଦା ନିକଟ ତେରମାଇଲ ଛକସ୍ଥିତ ଯାତ୍ରୀ ବିଶ୍ରାମାଗାରରୁ ବୁଧବାର ସକାଳ ୫ଟା ୨୦ରେ ଅସହାୟ ଅବସ୍ଥାରେ ପଡ଼ିଥିବା ଏକ ନବଜାତ ଶିଶୁକନ୍ୟାକୁ ଅଞ୍ଚଳବାସୀ ଉଦ୍ଧାର କରିଛନ୍ତି। ଢେଙ୍କାନାଳ ଯିବା ପାଇଁ ବସ୍କୁ ଅପେକ୍ଷା କରିଥିବା କେତେଜଣ ଯାତ୍ରୀ ନବଜାତକର କାନ୍ଦିବା ଶବ୍ଦ ଶୁଣିଥିଲେ। ଖୋଜାଖୋଜି କରିବା ପରେ ଏକ ମାଟି ଖପରାରେ କନାରେ ଗୁଡ଼ାଯାଇଥିବା ଅବସ୍ଥାରେ ଶିଶୁକନ୍ୟାକୁ ସେମାନେ ଠାବ କରିଥିଲେ। ସ୍ଥାନୀୟ ଯୁବକ ସମର ମହାନ୍ତି ନବଜାତକକୁ ପ୍ରଥମେ ସ୍ଥାନୀୟ ଅଙ୍ଗନୱାଡି କର୍ମୀଙ୍କୁ ହସ୍ତାନ୍ତର କରିଥିଲେ। ପରେ ଶିଶୁକନ୍ୟାକୁ ଯୋରନ୍ଦା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରକୁ ନିଆଯାଇଥିଲା। ସୂଚନାପାଇ ଜିଲା ଚାଇଲ୍ଡ ଲାଇନ ଏବଂ ଶିଶୁ ସୁରକ୍ଷା ବିଭାଗ ଅଧିକାରୀ ପହଞ୍ଚତ୍ ଶିଶୁକୁ ନିଜ ହେପାଜତ୍କୁ ନେଇଛନ୍ତି। ଅଧିକ ଚିକିତ୍ସା ପାଇଁ ଶିଶୁକୁ ଜିଲା ମୁଖ୍ୟ ଚିକିତ୍ସାଳୟର ଏସ୍ଏନ୍ସିଏଲ ବିଭାଗରେ ରଖାଯାଇଛି। ଏ ସମ୍ପର୍କରେ ଜିଲା ଶିଶୁ କଲ୍ୟାଣ ସମିତିକୁ ପତ୍ର ମାଧ୍ୟମରେ ଅବଗତ କରାଯାଇଥିବା ଚାଇଲ୍ଟ ଲାଇନ କେନ୍ଦ୍ର ସଂଯୋଜିକା ମନ୍ଦାକିନୀ ରାଉତ ସୂଚନା ଦେଇଛନ୍ତି। ତେବେ ଶିଶୁ କନ୍ୟା ବିଶ୍ରାମାଗାରକୁ କିପରି ଆସିଲା ସେ ନେଇ କୌଣସି ସ୍ପଷ୍ଟ ସୂଚନା ମିଳିନାହିଁ।
