ଲଣ୍ଡନ,୧୩।୭(ପି.ଟି.)- ରବିବାର ଖେଳାଯିବାକୁ ଥିବା ବିଶ୍ୱକପ୍ ଫାଇନାଲ ମ୍ୟାଚ୍ ଦେଖିବାକୁ ପ୍ରଶଂସକଙ୍କ ମଧ୍ୟରେ ପ୍ରବଳ ଆଗ୍ରହ ଦେଖାଦେଇଛି। ଆୟୋଜକ ଇଂଲଣ୍ଡ ସେମିଫାଇନାଲରେ ପାରମ୍ପରିକ ପ୍ରତିଦ୍ୱନ୍ଦ୍ୱୀ ଅଷ୍ଟ୍ରେଲିଆକୁ ହରାଇ ଫାଇନାଲରେ ପ୍ରବେଶ କରି ପ୍ରଥମଥର ପାଇଁ ବିଶ୍ୱକପ୍ ଜିତି ଇତିହାସ ସୃଷ୍ଟି କରିବାର ସମ୍ଭାବନା ସୃଷ୍ଟି କରିଛି। ଫଳରେ ଟିକେଟ କିଣିବା ପାଇଁ ପ୍ରଶଂସକଙ୍କ ମଧ୍ୟରେ କଡ଼ା ପ୍ରତିଦ୍ୱନ୍ଦ୍ୱୀତା ଦେଖିବାକୁ ମିଳିଛି। ତେବେ ଟିକେଟ କ୍ରୟ ନେଇ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ପ୍ରଶଂସକମାନେ ଯେପରି ଠକାମିର ଶିକାର ନ ହୁଅନ୍ତି ସେ ନେଇ ସତର୍କ କରାଇଦେଇଛି। ଅନଅଫିସିଆଲ ଓ୍ବେବ୍ସାଇଟ୍ ମାଧ୍ୟମରେ ଟିକେଟ୍ କ୍ରୟ ନ କରିବାକୁ କୁହାଯାଇଛି। ଟାଇଟଲ ଫାଇନାଲରେ ଇଂଲଣ୍ଡ ଓ ନ୍ୟୁଜିଲାଣ୍ଡ ମୁହଁାମୁହିଁ ହେବେ। ଅଧିକାଂଶ ଟିକେଟର ମୂଲ୍ୟ ୧୨୫୦ ଡଲାରରୁ ଊର୍ଦ୍ଧ୍ୱ ରହିଛି। ଆଉ କେତେକ ଟିକେଟ୍ର ମୂଲ୍ୟ ୫୦୦୦ ଡଲାରରୁ ମଧ୍ୟ ଅଧିକ ବୋଲି କୁହାଯାଇଛି। ଅନ୍ୟ କୌଣସି ସଂସ୍ଥା ଯେପରି ଟିକେଟ ବିକ୍ରି କରି ପ୍ରଶଂସକଙ୍କୁ ନ ଠକାଏ ସେ ନେଇ ଆଇସିସି କଡ଼ା ନଜର ରଖିଛି। କେବଳ ଅଫିସିଆଲ ସାଇଟ୍ ମାଧ୍ୟମରେ ଟିକେଟ କିଣିବାକୁ ପ୍ରଶଂସକଙ୍କୁ ଆଇସିସି କହିଛି।