ବୁଏନ୍ସ ଏରିଜ୍, ୭।୧ (ଏଏଫ୍ପି)- ବିଶ୍ୱକପ୍ ବିଜେତା ଭେଟେରାନ ଇଟାଲୀ ଫୁଟ୍ବଲ ଖେଳାଳି ଡାନିଏଲ ଡି ରୋସି ଅବସର ଘୋଷଣା କରିଛନ୍ତି। ୩୬ ବର୍ଷୀୟ ରୋସି ୬ ମାସ ପୂର୍ବେ ଆର୍ଜେଣ୍ଟିନା ଭିତ୍ତିକ କ୍ଲବ ବୋକା ଜୁନିୟର୍ସରେ ଯୋଗ ଦେଇଥିଲେ। କିନ୍ତୁ ପରିବାରକୁ ଅଧିକ ସମୟ ଦେବା ଲାଗି ସେ ଏହି ନିଷ୍ପତ୍ତି ନେଇଛନ୍ତି। ‘ମୋତେ ଘରକୁ ଯିବା ଜରୁରୀ ହୋଇଛି। ମୁଁ ମୋ ପରିବାରକୁ ଏବଂ ସେମାନେ ମୋତେ ମଧ୍ୟ ମିସ୍ କରୁଛନ୍ତି। ଏଥିଲାଗି ବୋକା ଓ ଫୁଟ୍ବଲ ଛାଡ଼ିବାକୁ ପଡ଼ିଲା’ ବୋଲି ଇଟାଲିର ଫ୍ରଫେସନାଲ ଫୁଟ୍ବଲ କ୍ଲବ ରୋମା’ର ଏହି ପୂର୍ବତନ ମିଡ୍ଫିଲ୍ଡର ଅବସର ଘୋଷଣା ପରିପ୍ରେକ୍ଷୀରେ କହିଛନ୍ତି। ୨୦୦୪ରେ ଇଟାଲୀ ପକ୍ଷରୁ ପଦାର୍ପଣ କରିଥିବା ରୋସି ୨୦୧୭ ପର୍ଯ୍ୟନ୍ତ ଜାତୀୟ ଦଳ ପାଇଁ ୧୧୭ ମ୍ୟାଚ୍ରେ ପ୍ରତିନିଧିତ୍ୱ କରିଛନ୍ତି। ୨୦୦୬ରେ ବିଶ୍ୱକପ୍ ବିଜୟୀ ଇଟାଲୀ ଦଳର ସେ ପ୍ରମୁଖ ସଦସ୍ୟ ରହିଥିଲେ। ଇଟାଲୀ ପକ୍ଷରୁ ସର୍ବାଧିକ ମ୍ୟାଚ୍ ଖେଳିବାରେ ସେ ୪ର୍ଥ ସ୍ଥାନରେ ରହିଛନ୍ତି। ରୋସି ତାଙ୍କ କ୍ୟାରିୟରର ୧୮ ବର୍ଷ ରୋମା କ୍ଲବ ପକ୍ଷରୁ ଖେଳିଥିଲେ। ରୋମା ପକ୍ଷରୁ ସେ ୬୧୬ ମ୍ୟାଚ୍ ଖେଳିଛନ୍ତି। ବୋକା କ୍ଲବ ସହ ନୂଆ ଚୁକ୍ତି ପୂର୍ବରୁ ତାଙ୍କୁ ରୋମାର ନିର୍ଦ୍ଦେଶକ ପଦ ଅଫର ଦିଆଯାଇଥିଲା। କିନ୍ତୁ ସେ ଏହାକୁ ଅଗ୍ରାହ୍ୟ କରିଦେଇଥିଲେ।