ସିଡ୍ନୀ, ୧୬ା୪ (ଏଏଫ୍ପି)-ଦେଶରେ କୋଭିଡ୍-୧୯ ଲକ୍ଡାଉନ୍ ଚାଲିଥିବାବେଳେ ଅଷ୍ଟ୍ରେଲିଆର ଜଣେ ରୋୟର ଇନ୍ଡୋର୍ ହାଫ୍ ମାରାଥନରେ ବିଶ୍ୱ ରେକର୍ଡ ଭଙ୍ଗ କରିଛନ୍ତି। ଅଷ୍ଟ୍ରେଲିଆ ଦଳର ଅନ୍ୟମାନଙ୍କ ଭଳି ଜର୍ଜି ରୋଓ୍ବି ସିଡ୍ନୀସ୍ଥିତ ବାସଗୃହରେ ଟ୍ରେନିଂ ଜାରି ରଖିଛନ୍ତି। ଚଳିତବର୍ଷ ଜାପାନରେ ଟୋକିଓ ଅଲିମ୍ପିକ୍ସ ଆୟୋଜିତ ହୋଇ ନ ପାରିବାରୁ ତାଙ୍କ ମନ ଭାରି ଦୁଃଖ। ୨୭ ବର୍ଷୀୟା ରୋଓ୍ବି ଏକ କନସେପ୍ଟ-୨ ରୋଇଂ ମେଶିିନ୍ରେ ଅଭ୍ୟାସ କରୁଛନ୍ତି। ଏହି ମେଶିନ ଦ୍ୱାରା ଜଣେ ଆଥଲେଟଙ୍କ ବେଗ ଓ ଦୂରତା ମାପି ହୋଇଥାଏ। ରୋଓ୍ବି ୨୧, ୦୯୭ ମିଟର ଦୂରତାକୁ ୧ ଘଣ୍ଟା, ୧୯ ମିନିଟ୍ ୨୮.୪ ସେକେଣ୍ଡ ଟାଇମିଂରେ କଭର କରିଥିଲେ। ଏହାଦ୍ୱାରା ହେଭିଓ୍ବେଟ୍ ମହିଳା ହାଫ୍ ମାରାଥନରେ ୫ ବର୍ଷ ପୂର୍ବେ ଆମେରିକୀୟ ରୋୟର ଇସ୍ଥର ଲୋଫ୍ଗ୍ରେନ୍ଙ୍କ ପ୍ରତିଷ୍ଠିତ ରେକର୍ଡକୁ ସେ ଭଙ୍ଗ କରିଦେଇଛନ୍ତି। ଲୋଫ୍ଗ୍ରେନ୍ଙ୍କଠାରୁ ସେ ୪୦ ସେକେଣ୍ଡ ଆଗୁଆ ରେସ୍ ଶେଷ କରିଥିଲେ।