ନୂଆଦିଲ୍ଲୀ,୨୦ା୬ (ଆଇଏଏନ୍ଏସ୍) : ବିଶ୍ୱର ଶ୍ରେଷ୍ଠ ୨୦୦ ବିଶ୍ୱବିଦ୍ୟାଳୟ ମଧ୍ୟରେ ଭାରତର ମାତ୍ର ୩ଟି ବିଶ୍ୱବିଦ୍ୟାଳୟ ସ୍ଥାନ ପାଇଛି। ଆଇଆଇଟି ବମ୍ବେ, ଆଇଆଇଟି ଦିଲ୍ଲୀ ଓ ଇଣ୍ଡିଆନ୍ ଇନ୍ଷ୍ଟିଚ୍ୟୁଟ୍ ଅଫ୍ ସାଇନ୍ସ (ଆଇଆଇଏସ୍ସି) ବାଙ୍ଗାଲୋର ଏଥିରେ ସ୍ଥାନ ପାଇଛନ୍ତି। ଲଣ୍ଡନ୍ରେ ବୁଧବାର ୨୦୨୦ କ୍ୱାକ୍କ୍ୱାରେଲ୍ଲି ସାଇମଣ୍ଡ୍ସ୍ (କ୍ୟୁଏସ୍) ଓ୍ବାଲର୍ଡ ର଼୍ୟାଙ୍କିଙ୍ଗ୍ ନେଇ ଏ ସମ୍ପର୍କରେ ଘୋଷଣା କରାଯାଇଛି।
ବମ୍ବେ କ୍ରମାଗତ ଦ୍ୱିତୀୟ ଥର ଲାଗି ଭାରତର ଶ୍ରେଷ୍ଠ ବିଶ୍ୱବିଦ୍ୟାଳୟଭାବେ ସ୍ଥାନ ପାଇଛି। ଗତ ଥର ବିଶ୍ୱ ର଼୍ୟାଙ୍କିଙ୍ଗରେ ଏହାକୁ ୧୬୨ତମ ସ୍ଥାନ ମିଳିଥିବାବେଳେ ଏଥର ୧୫୨ତମ ସ୍ଥାନ ମିଳିଛି। ଆଇଆଇଏସ୍ସି ଗତବର୍ଷ ଭାରତର ଦ୍ୱିତୀୟ ଶ୍ରେଷ୍ଠ ବିଶ୍ୱବିଦ୍ୟାଳୟଭାବେ ସ୍ଥାନ ପାଇଥିବାବେଳେ ଚଳିତବର୍ଷ ଏହାକୁ ତୃତୀୟ ସ୍ଥାନ ମିଳିଛି। ଆଇଆଇଟି ଦିଲ୍ଲୀକୁ ଏଥର ଦ୍ୱିତୀୟ ସ୍ଥାନ ମିଳିପାରିଛି।
ର଼୍ୟାଙ୍କିଙ୍ଗର ୧୦୦୦ ବିଶ୍ୱବିଦ୍ୟାଳୟ ମଧ୍ୟରେ ସ୍ଥାନ ପାଇଥିବା ଭାରତର ୨୩ଟି ବିଶ୍ୱବିଦ୍ୟାଳୟ ମଧ୍ୟରୁ ନୂଆଭାବେ ଓପି ଜିନ୍ଦଲ ଗ୍ଲୋବାଲ ୟୁନିଭର୍ସିଟି ସ୍ଥାନ ପାଇଛି। ଆଇଆଇଟି ବମ୍ବେ ଏହାର ଗବେଷଣା ଦକ୍ଷତା ବୃଦ୍ଧି କରିପାରି ଥିବାରୁ ଏହା ର଼୍ୟାଙ୍କିଙ୍ଗରେ ୧୦ଟି ସ୍ଥାନ ଉପରକୁ ଉଠିବାରେ ସଫଳ ହୋଇଛି। କିନ୍ତୁ ସାମୂହିକଭାବେ ଭାରତର ବିଶ୍ୱବିଦ୍ୟାଳୟଗୁଡ଼ିକ ଶିକ୍ଷାଦାନ/ ଛାତ୍ର ଅନୁପାତ ଓ ଅନ୍ତର୍ଜାତୀୟ ଛାତ୍ର ଅନୁପାତ ତୁଳନାରେ ହାରାହାରି ୧୨ ପ୍ରତିଶତ କମ ପ୍ରଦର୍ଶନ କରିଥିବା ଜଣାପଡ଼ିଛି। କେତେକ ପ୍ରମୁଖ କ୍ଷେତ୍ରରେ ଭାରତର ଉଚ୍ଚ ଶିକ୍ଷା ଅଗ୍ରଗତି କରୁଥିବା ଅନ୍ତର୍ଜାତୀୟ ବିଶ୍ୱବିଦ୍ୟାଳୟ ର଼୍ୟାଙ୍କିଙ୍ଗରୁ ଜଣାପଡ଼ିଛି। ଗବେଷଣା ଓ ଶିକ୍ଷା କ୍ଷେତ୍ରରେ ରଣନୀତିକ ପୁଞ୍ଜିନିବେଶର ଆବଶ୍ୟକତା ରହିଛି ବୋଲି ରିପୋର୍ଟରେ ଦର୍ଶାଯାଇଛି।
