ପିଲାଠାରୁ ବୁଢ଼ା ପର୍ଯ୍ୟନ୍ତ ସମସ୍ତେ ଜାଣନ୍ତି ରକ୍ତର ରଙ୍ଗ ଲାଲ୍। ହେଲେ ଆପଣମାନେ ଶୁଣିଲେ ଆଶ୍ଚର୍ଯ୍ୟ ହେବେ, ଏମିତି କିଛି ଜୀବ ଅଛନ୍ତି, ଯେଉଁମାନଙ୍କ ରକ୍ତର ରଙ୍ଗ ଲାଲ ପରିବର୍ତ୍ତେ ସବୁଜ, ହଳଦିଆ ଏବଂ ନୀଳ ରହିଛି। ଜାଣିବା ସେସବୁ ଜୀବଙ୍କ ବିଷୟରେ:
ଅକ୍ଟୋପସ୍: ଏହା ଏକ ସାମୁଦ୍ରିକ ଜୀବ। ଏହାକୁ କିଛି ଦେଶର ଲୋକେ ଖାଇଥାନ୍ତି। ୮ ଗୋଡ଼ବିଶିଷ୍ଟ ଏହି ଜୀବର ରକ୍ତର ରଙ୍ଗ ନୀଳ। ଏହାର କାରଣ ହେଲା ଅକ୍ଟୋପସ୍ ରକ୍ତରେ ତମ୍ବାର ପରିମାଣ ଅଧିକ ଥାଏ। ଏହି କାରଣରୁ ସେମାନଙ୍କ ରକ୍ତର ରଙ୍ଗ ନୀଳ।
ସି-କୁକୁମ୍ବର: ଏହା ଏକ ସାମୁଦ୍ରିକ ଜୀବ। ଏହି ଜୀବ ଦେଖିବାକୁ ସବୁଜ ରଙ୍ଗର । ମାତ୍ର ଏହାର ରକ୍ତ ହଳଦିଆ ରଙ୍ଗର। ଏହା ପଛର କାରଣ ଆଜି ପର୍ଯ୍ୟନ୍ତ ବୈଜ୍ଞାନିକମାନେ ଜାଣିପାରିନାହାନ୍ତି।
ପିନଟ ଓ୍ବାର୍ମ: ପିନଟ ଓ୍ବାର୍ମ ପୋକର ରଙ୍ଗ ବାଇଗଣୀ। ଏହାର ଶରୀରରେ ଥିବା ହିମୋରିଥରିନ ନାମକ ପ୍ରୋଟିନ୍ରେ ଯେତେବେଳେ ଅକ୍ସିକରଣ (କଳଙ୍କି ଲାଗିଯାଏ) ହୋଇଥାଏ ସେତେବେଳେ ତା’ର ରଙ୍ଗ ବାଇଗଣୀ ଏବଂ ବେଳେବେଳେ ଗୋଲାପି ମଧ୍ୟ ହୋଇଥାଏ।
ନ୍ୟୁ ଜିନିଆ: ନ୍ୟୁ ଜିନିଆ ନାମକ ବହୁରୂପୀ ଏଣ୍ଡୁଅ ରକ୍ତର ରଙ୍ଗ ହେଉଛି ସବୁଜ। ଏହି କାରଣରୁ ଏହି ଏଣ୍ଡୁଅର ମାଂସପେଶୀ ଏବଂ ଜିଭର ରଙ୍ଗ ମଧ୍ୟ ସବୁଜ।
କ୍ରୋକୋଡାଇଲ ଆଇସ୍ଫିଶ୍: ଏହା ଏକପ୍ରକାର ମାଛ। ବିଶେଷକରି ଆଣ୍ଟାର୍କଟିକା ମହାସାଗରରେ ଏହା ଦେଖାଯାଇଥାଏ। ଏହି ମାଛର ରକ୍ତ ରଙ୍ଗହୀନ। ଆଇସ୍ଫିଶ୍ର ରକ୍ତରେ ହିମୋଗ୍ଲୋବିନ ଏବଂ ହିମୋସାଇନିନ ନ ଥାଏ। ଏହି କାରଣରରୁ ଏହି ମାଛର ରକ୍ତର କୌଣସି ରଙ୍ଗ ନ ଥାଏ।