ଦୟା ଜୀବନକୁ ବଦଳାଇଦିଏ। ଏହା ଆନନ୍ଦର ଅଗ୍ରଦୂତ। ଯେଉଁମାନେ ଦୟାର ଅଲୌକିକତା ଅନୁଭବ କରିଛନ୍ତି ସେମାନେ ସବୁବେଳେ ଦୟାଳୁ। ଦୟା ଭାବ ମାନବ ଜୀବନର ଏକ ମୌଳିକ ଅଂଶ। ଏହା ଜାତି, ଧର୍ମ,ସମ୍ପ୍ରଦାୟ, ଲିଙ୍ଗଗତ ପାର୍ଥକ୍ୟ ତଥା ରାଜନୀତିର ବାଦ ବିବାଦକୁ ସହଜରେ ସମାଧାନ କରିପାରେ। ଏଣୁ ଦୟାଳୁ କାର୍ଯ୍ୟ ଦ୍ୱାରା ବିଶ୍ୱକୁ ଏକ ସୁନ୍ଦର ସ୍ଥାନରେ ପରିଣତ କରିବା ଲାଗି ବ୍ୟକ୍ତିଗତ ତଥା ଆନୁଷ୍ଠାନିକ ସ୍ତରରେ ପ୍ରତିବର୍ଷ ୧୩ ନଭେମ୍ବରରେ ପାଳନ କରାଯାଉଛି ‘ବିଶ୍ୱ ଦୟା ଦିବସ’। ଦୟା ଉପରେ ବିଶ୍ୱାସ ରଖୁଥିବା ବିଭିନ୍ନ ଦେଶର ସଂଗଠନଗୁଡିକ ଦ୍ୱାରା ୧୯୯୭ରେ ଗଠିତ ‘ଓ୍ବଲର୍ଡ କାଇଣ୍ଡ୍ନେସ୍ ମୁଭ୍ମେଣ୍ଟ’ ଦ୍ୱାରା ୧୯୯୮ରେ ପ୍ରଥମେ ଏହି ଦିବସ ପାଳନ କରାଯାଇଥିଲା। ଏହି ସଂଗଠନଗୁଡିକ କୌଣସି ଧାର୍ମିକ କି ରାଜନୈତିକ ମୁଭ୍ମେଣ୍ଟ ସହ ଅନୁବନ୍ଧିତ ହୋଇନାହାନ୍ତି। ଏବେ ଏହି ମୁଭ୍ମେଣ୍ଟରେ ୨୮ଟି ଦେଶ ଜଡିତ ରହିଛନ୍ତି। ବିଶ୍ୱ ଦୟା ଦିବସ ଲୋକମାନଙ୍କୁ ତଥା ରାଷ୍ଟ୍ରଗୁଡିକୁ ଏକ ଦୟାପୂର୍ଣ୍ଣ ବିଶ୍ୱ ନିର୍ମାଣ କରିବା ପାଇଁ ପ୍ରେରଣା ଯୋଗାଇଥାଏ। ଓ୍ବାଲର୍ଡ କାଇଣ୍ଡ୍ନେସ୍ ମୁଭ୍ମେଣ୍ଟ ଦୟା ଦିବସକୁ ଆଧିକାରିକ ସ୍ତରରେ ସ୍ବୀକୃତି ହେବା ଲାଗି ଅନୁରୋଧ କରାଯିବା ପରେ ଜାତିସଂଘ ବିଶ୍ୱସ୍ତରରେ ଏହାକୁ ପାଳନ କରାଯିବା ପାଇଁ ଘୋଷଣା କରିଥିଲା। ‘ବିଶ୍ୱ ଦୟା ଦିବସ’ କାନାଡା, ନାଇଜେରିଆ, ଜାପାନ, ଅଷ୍ଟ୍ରେଲିଆ ଓ ସଂଯୁକ୍ତ ଆରବ ସଂଘ ସମେତ ବିଭିନ୍ନ ଦେଶରେ ଏହା ପାଳନ କରାଯାଉଛି। ୨୦୦୯ରେ ସିଙ୍ଗାପୁର ପ୍ରଥମେ ଏହି ଦିବସ ପାଳନ କରିଥିଲା। ସେହି ବର୍ଷ ଭାରତ ଓ ଇଟାଲୀରେ ଏହା ପାଳନ କରାଯାଇଥିଲା। ୨୦୧୦ରେ ‘କାଇଣ୍ଡ୍ନେସ୍ ୟୁକେ’ ଦ୍ୱାରା ଇଂଲଣ୍ଡରେ ଦୟା ଦିବସ ପାଳନ କରାଯାଇଥିଲା। ଏହାପରେ ପ୍ରତିବର୍ଷ ଲୋକପ୍ରିୟତା ଲାଭ କରିବା ସହ ଏଥିରେ ଅଧିକ ବ୍ୟକ୍ତି, ସ୍କୁଲ୍ , ସ୍ବେଚ୍ଛାସେବୀ ସଂଗଠନ ଓ ବ୍ୟବସାୟୀ ସଂସ୍ଥାର ଯୋଗଦାନ ବୃଦ୍ଧି ପାଇବାରେ ଲାଗିଲା। ଏହି ଦିବସ ଅବସରରେ ଅନେକ ସ୍ଥାନରେ ଲୋକମାନେ ଦୟା କାର୍ଡ ମଧ୍ୟ ବାଣ୍ଟିଥାନ୍ତି। ଏନ୍ଜିଓ ରେସ୍ପୋଏଣ୍ଟ ଭାରତର୧୩ଟି ରାଜ୍ୟରେ ୧୭,୦୦୦ ପିଲାଙ୍କୁ ଫୁଡ୍ ବ୍ୟାଙ୍କ ମାଧ୍ୟମରେ ଖାଇବାକୁ ଦେଉଛି। ବିଭିନ୍ନ ଆଶ୍ରୟସ୍ଥଳୀ, ଶିକ୍ଷାନୁଷ୍ଠାନ ତଥା ବସ୍ତିର ଶିଶୁଗୃହକୁ ଏହା ଖାଦ୍ୟ ଯୋଗାଉଛି। ଦୟାର ପରିସରକୁ ବି କ୍ୟାନ୍ସର ରୋଗୀଙ୍କ ପାଖକୁ ପହଞ୍ଚାଇଛନ୍ତି ୩୫ବର୍ଷୀୟା ଅଞ୍ଚଳ ଶର୍ମା। କ୍ୟାନ୍ସରରୁ ମୁକ୍ତି ପାଇଥିବା ଏହି ବ୍ୟକ୍ତି ଜଣକ ପ୍ରତିଦିନ ୫୦୦ ଅସହାୟ ଲୋକଙ୍କୁ ଖାଇବାକୁ ଦେଉଛନ୍ତି। ଏହାର ଖର୍ଚ୍ଚ ନିଜେ ବହନ କରୁଛନ୍ତି। ଏହାବାଦ୍ ପୁଖରାଜ ଗତ ୭ ବର୍ଷ ହେବ ସପ୍ତାହରେ ୩ଦିନ ଏଆଇଆଇଏମଏସକୁ ଯାଇ କ୍ୟାନ୍ସର ରୋଗୀଙ୍କ ଜୀବନ ସଂଗ୍ରାମର କଥା ଶୁଣୁଛନ୍ତି। ସେମାନଙ୍କୁ କୋଳେଇ ନେଉଛନ୍ତି ଯାହା ଦ୍ୱାରା ସେମାନେ ସୁଖଦ ଅନୁଭବ କରୁଛନ୍ତି। କୁହାଯାଏ ,ଦୟା ଏକାଥରକେ ଜୀବନକୁ ସ୍ପର୍ଶ କରିଥାଏ। ଏଭଳି ସ୍ନେହ ଓ ଭଲପାଇବା ରୋଗୀମାନଙ୍କ ସାମାଜିକ ଓ ମାନସିକ ଯନ୍ତ୍ରଣା ଲାଘବ କରିପାରୁଛି। ଆସନ୍ତୁ ବିଶ୍ୱରେ ଦୟା ପରିବେଶ ଆଣିବା ପାଇଁ ଏହି ଦିବସରେ ଏଭଳି ସବୁ କାର୍ଯ୍ୟ ଆରମ୍ଭ କରିବା। ଘରେ , କାର୍ଯ୍ୟକ୍ଷେତ୍ର,ସ୍କୁଲ ଓ ଆମେ ରହୁଥିବା ଜାଗାରୁ ଖାଦ୍ୟ ସଂଗ୍ରହ କରି ତାହାକୁ ଅସହାୟ ପିଲାମାନଙ୍କୁ ବି ଖୁଆଇ ପାରିବା।