ନୂଆଦିଲ୍ଲୀ, ୧୧ା୮ (ପି.ଟି.)-ସୁଇଜରଲାଣ୍ଡର ବାସେଲଠାରେ ଆସନ୍ତା ସପ୍ତାହରେ ଅନୁଷ୍ଠିତ ହେବାକୁଥିବା ବିଶ୍ୱ ଚାମ୍ପିୟନଶିପ୍ ପାଇଁ ବ୍ୟାଡ୍ମିଣ୍ଟନ ଓ୍ବାଲର୍ଡ ଫେଡେରେଶନ (ବିଡବ୍ଲ୍ୟୁଏଫ୍) ପକ୍ଷରୁ ଡ୍ର’ ଅନୁଷ୍ଠିତ ହୋଇଯାଇଛି। ଟୁର୍ନାମେଣ୍ଟର ପ୍ରାରମ୍ଭିକ ରାଉଣ୍ଡଗୁଡ଼ିକରେ ଯଦି ବିଜୟ ଲାଭ କରନ୍ତି ତେବେ ଭାରତର ଦୁଇ ଷ୍ଟାର ବ୍ୟାଡ୍ମିଣ୍ଟନ ଖେଳାଳିଙ୍କର ସେମିଫାଇନାଲରେ ଭେଟ ହୋଇପାରେ। ଖବର ଅନୁସାରେ ମହିଳା ସିଙ୍ଗଲ୍ସ ତାଲିକାରେ ଜଣେ ଖେଳାଳିଙ୍କ ନାମ ଭୁଲକ୍ରମେ ସ୍ଥାନ ପାଇବା ଦ୍ୱାରା ପ୍ରତିଯୋଗିତାରେ କିଏ କାହାକୁ ଭେଟିବ ସେ ନେଇ ଆଉ ଥରେ ଡ୍ର’ ଅନୁଷ୍ଠିତ ହୋଇଥିଲା। ଦୁଇଥର ବିଶ୍ୱ ଚାମ୍ପିୟନଶିପ୍ ରୌପ୍ୟ ବିଜୟିନୀ ସିନ୍ଧୁଙ୍କୁ ଏଠାରେ ୫ମ ସିଡ୍ ମାନ୍ୟତା ମିଳିଛି। ସେ ପ୍ରଥମ ରାଉଣ୍ଡ ବାଇ ପାଇଛନ୍ତି। ସିନ୍ଧୁ ଚାଇନିଜ ତାଇପେର ପାଇ ୟୁ ପୋ କିମ୍ବା ବୁଲ୍ଗେରିଆର ଲିଣ୍ଡା ଜେଚ୍ରୀ ବିପକ୍ଷରେ ଖେଳି ଟୁର୍ନାମେଣ୍ଟରେ ତାଙ୍କ ଅଭିଯାନ ଆରମ୍ଭ କରିପାରନ୍ତି। ସେହିପରି ୮ମ ସିଡ୍ ସାଇନା ମଧ୍ୟ ପ୍ରଥମ ରାଉଣ୍ଡରେ ବାଇ ପାଇଛନ୍ତି। ଦ୍ୱିତୀୟ ରାଉଣ୍ଡରେ ସେ ସୁଇଜରଲାଣ୍ଡର ସାବ୍ରିନା ଜାକ୍ୱେଟ ଏବଂ ନେଦରଲାଣ୍ଡର ସୋରାୟା ଡି’ ଭିସ୍କ୍ ଇଜବର୍ଜେନଙ୍କ ମଧ୍ୟରେ ଖେଳାଯିବାକୁଥିବା ମ୍ୟାଚର ବିଜେତାଙ୍କୁ ଭେଟିବେ। ଭାରତର ଦୁଇ ଖେଳାଳି ଯଦି ସେମାନଙ୍କ ମ୍ୟାଚରେ ବିଜୟ ହାସଲ କରନ୍ତି ତେବେ ତୃତୀୟ ରାଉଣ୍ଡରେ ସିନ୍ଧୁ ଆମେରିକାର ବିଓ୍ବେନ ଝାଙ୍ଗ୍ ଏବଂ ସାଇନାଙ୍କର ଡେନ୍ମାର୍କର ମିଆ ବ୍ଲିଚ୍ଫିଲ୍ଡଙ୍କ ସହିତ ଭେଟ ହେବାର ସମ୍ଭାବନା ରହିଛି। ଭାରତୀୟ ଖେଳାଳି ଦ୍ୱୟଙ୍କର ଚାଇନାର ଚେନ୍ ୟୁ ଫେଇ ଏବଂ ଚାଇନିଜ ତାଇପେର ତାଇ ଜୁ ୟିଙ୍ଗ୍ଙ୍କ ସହିତ ମଧ୍ୟ ମୁକାବିଲା ହୋଇପାରେ। ପୁନର୍ବାର ଡ୍ର’ କରାଯିବା ପଛରେ କି କାରଣ ରହିଛି ବିଡବ୍ଲ୍ୟୁଏଫ୍ ତରଫରୁ ତାହାର ବିସ୍ତୃତ ତଥ୍ୟ ଦିଆଯାଇନାହିଁ। ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁସାରେ, ବିଡବ୍ଲ୍ୟୁଏଫ୍ ଭୁଲକ୍ରମେ ମହିଳା ସିଙ୍ଗଲ୍ସ ପାଇଁ ପ୍ରବେଶିକା ତାଲିକାରେ ମରିସସ୍ର କେଟ୍ ଫୁ କୁନେଙ୍କ ନାମ ସ୍ଥାନ ପାଇଥିଲା। ଏହି ଖେଳାଳି ଜଣକ ଡୋପିଂ ଅଭିଯୋଗରେ ଜୁଲାଇରେ ସସ୍ପେଣ୍ଡ ହୋଇଛନ୍ତି। ଚାମ୍ପିୟନଶିପ୍ର ଅନ୍ୟ ଚାରୋଟି ବିଭାଗ ଲାଗି ପୂର୍ବରୁ ହୋଇଥିବା ଡ୍ର’ ଅପରିବର୍ତ୍ତିତ ରହିଛି।