ଯାଜପୁର ରୋଡ,୧୧ା୯(ନି.ପ୍ର.)- ପ୍ରଦୂଷଣ ଆଇନକୁ କଡ଼ାକଡ଼ି ଭାବେ ପାଳନ ସହିତ ପ୍ରଦୂଷଣ ସୃଷ୍ଟିକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏପରି କି ଏକ ପ୍ରଦୂଷଣ ମୁକ୍ତ ସମାଜ ଗଠନ କରିବାକୁ ବିଶ୍ୱ ମାନବାଧିକାର ସୁରକ୍ଷା ସଂଗଠନ ଆହ୍ବାନ ଦେଇଛି। ମଙ୍ଗଳବାର ସ୍ଥାନୀୟ ଏକ ହୋଟେଲରେ ରାଜ୍ୟ ସଂଯୋଜକ ପ୍ରସନ୍ନ କୁମାର ସାମଲଙ୍କ ଅଧ୍ୟକ୍ଷତାରେ ଅନୁଷ୍ଠିତ ଖବରଦାତା ସମ୍ମିଳନୀରେ ସଂଗଠନର ରାଷ୍ଟ୍ରୀୟ ଅଧ୍ୟକ୍ଷ ଅଭିନ୍ନ ହୋତା ଯୋଗ ଦେଇ ଯାଜପୁର ଜିଲା ଶିଳ୍ପ ଓ ଖଣି ଯୋଗୁ ବିଶେଷ ଭାବରେ ବାୟୁ, ଜଳ ପ୍ରଦୂଷିତ ହେଉଛି। ଏଥିପ୍ରତି ଶିଳ୍ପାନୁଷ୍ଠାନ ଓ ପ୍ରଶାସନିକ କର୍ତ୍ତୃପକ୍ଷଙ୍କ ନିଘା ନାହିଁ। ଜିଲାର ପରିବେଶକୁ ସୁସ୍ଥ ରଖିବାପାଇଁ ଏହି ସଂଗଠନ ଏବେଠାରୁ କାର୍ଯ୍ୟ କରିବ। ଆବଶ୍ୟକ ପଡ଼ିଲେ ପ୍ରଦୂଷଣ କରୁଥିବା ସଂସ୍ଥା ବିରୋଧରେ ମାନବାଧିକାର ଊଲ୍ଲଂଘନ ଆଇନ ଅନୁଯାୟୀ ହାଇକୋର୍ଟରେ ଜନସ୍ବାର୍ଥ ମାମଲା ରୁଜୁ କରାଯିବ ବୋଲି ହୋତା ସୂଚନା ଦେଇଥିଲେ। ହୋତା ବିଭିନ୍ନ ଗଣମାଧ୍ୟକୁ ସୂଚନାଦେଇ କହିଥିଲେ ଯେ ଭାରତୀୟ ସମ୍ବିଧାନର ୨୧ ଧାରା ଅନୁଯାୟୀ ସମସ୍ତଙ୍କ ବଞ୍ଚତ୍ବାର ଅଧିକାର ରହିଛି। କେହି କାହାର ବଞ୍ଚତ୍ବା ଉପରେ ବାଧା ସୃଷ୍ଟି କରିପାରିବେ ନାହିଁ। ସ୍ବଚ୍ଛ ପାନୀୟ, ବାୟୁ, ପରିବେଶ ଜୀବନକୁ ସୁସ୍ଥ ରଖିଥାଏ। ମାତ୍ର ଏବେ ପରିବେଶପ୍ରତି ବିପଦ ଘନେଇ ଆସୁଛି। ଶିଳ୍ପ କାରାଖାନା ଓ ଖଣି ମାଲିକମାନେ ବ୍ୟାପକ ଜଙ୍ଗଲ କ୍ଷୟ କରୁଛନ୍ତି। ଯେତିକି ଗଛ ନଷ୍ଟ କରୁଛନ୍ତି ସେହି ଅନୁସାରେ ଜଙ୍ଗଲ ସୃଷ୍ଟି କରୁ ନାହାନ୍ତି। କାରାଖାନାର ଧୂଆଁରେ ବାୟୁମଙ୍ଗଣ୍ଡଳ ଦୂଷିତ ହେଉଛି। କାରଖାନାର ଦୂଷିତ ପାଣି ଓ ବର୍ଜ୍ୟବସ୍ତୁଗୁଡ଼ିକ ଗଣ୍ଡାନାଳ ଓ ନଦୀରେ ଛାଡ଼ି ଦିଆଯାଉଛି ଫଳରେ ଜଳ ପ୍ରଦୂଷିତ ହେଉଛି। ବିଶେଷକରି ଜିଲାର କଳିଙ୍ଗନଗର ଶିଳ୍ପାଞ୍ଚଳ ସୁକିନ୍ଦା ଖଣି ଉପତ୍ୟକାରେ ପ୍ରଦୂଷଣମାତ୍ରା ବୃଦ୍ଧି ପାଉଛି। ଫଳରେ ଲୋକଙ୍କ ଜୀବନ ବିପଦରେ ପଡ଼ୁଛି। ଏପରି କି ଅକାଳରେ ଅନେକ ଲୋକ ମୃତ୍ୟୁବରଣ କରୁଛନ୍ତି। ପରିବେଶକୁ ସୁସ୍ଥ ରଖିବାପାଇଁ ଏହି ସଂଗଠନ ଜିଲାର ପ୍ରତେକ ପଞ୍ଚାୟତସ୍ତରରେ ସଂଗଠନକୁ ସୁଦୃଢ କରିବାପାଇଁ ନିଷ୍ପତି ନେଇଛି। ପ୍ରଦୂଷଣ କରୁଥିବା ସଂସ୍ଥା ଉପରେ ଲଗାମ ଲଗାଇବା ପାଇଁ ଜିଲା ପ୍ରଶାସନ ଓ ରାଜ୍ୟ ସରକାରଙ୍କ ନିକଟରେ ଦାବି କରାଯିବ ବୋଲି ହୋତା କହିଛନ୍ତି। ବୈଠକରେ ଢେଙ୍କାନାଳ ଓ ଅନୁଗୋଳ ଜିଲା ମାନବାଧିକାର ସୁରକ୍ଷା ସଂଗଠନ ସଭାପତି ରାମଚନ୍ଦ୍ର ରାଉତ ରାଏ, କଟକ ଜିଲା ସଭାପତି ସନ୍ତୋଷ କୁମାର ବଳ, ବାଲେଶ୍ୱର ଜିଲା ସଭାପତି ସଂଘମିତ୍ରା ମହାନ୍ତି, ରାଷ୍ଟ୍ରୀୟ ସଂଯୋଜକ ଆଇନ୍ଜୀବୀ ପ୍ରଦୀପ୍ତ ହୋତା, ଯାଜପୁର ଜିଲା ସଂଯୋଜକ ମନୋରଞ୍ଜନ ବେହେରା ପ୍ରମୁଖ ଯୋଗଦେଇ ରାଜ୍ୟରେ ପ୍ରଦୂଷଣ ଦିନକୁ ଦିନ କିପରି ବୃଦ୍ଧିପାଉଛି ଏବଂ ଏହାକୁ କିପରି ହ୍ରାସ କରାଯାଇପାରିବ ସେନେଇ ଆଲୋକପାତ କରିଥିଲେ। ଅନ୍ୟମାନଙ୍କ ମଧ୍ୟରେ ସୁରେଶ ହୋତା, ତପନ ଦେଓ, ଗୋପାଳ ଖଣ୍ଡଲୱାଲ, ଆତୁତୋଷ ଲେଙ୍କା, ରଶ୍ମୀକାନ୍ତ ସ୍ବାଇଁ, ନାନକ ପରିଡା, ସୁରେଶ ଧଳ, ବିଷ୍ଣୁ ଦେଓ, ପ୍ରଦୀପ ବଳ, ତୁଷାରକାନ୍ତ ଷଣ୍ଡ, ପୁଷ୍ପକ ମହାପାତ୍ର, ହରେକୃଷ୍ଣ ଭଞ୍ଜ, ନିରୋଧ ମହାପାତ୍ର ପ୍ରମୁଖ ଆଲୋଚନାରେ ଅଂଶ ଗ୍ରହଣ କରିଥିଲେ।