ଖଣ୍ଡପଡ଼ା,୨୧ା୬(ସ୍ବ.ପ୍ର.): ନୟାଗଡ଼ ଜିଲା ଖଣ୍ଡପଡ଼ା ଥାନା ବୋଦସା ପଞ୍ଚାୟତ ଗୋଲା ସାହିରେ ଗତ ୧୫ ତାରିଖରେ ବିଷାକ୍ତ ଖାଦ୍ୟ ଖାଇ ଦମ୍ପତି ଭାଗୀରଥି ସ୍ବାଇଁ(୬୦) ଓ ତାଙ୍କ ସ୍ତ୍ରୀ କୌଶଲ୍ୟା(୫୪)ଙ୍କ ହୋଇଥିବା ମୃତ୍ୟୁ ଘଟଣାର ପର୍ଦ୍ଦାଫାଶ ହୋଇଛି। ଜାଗା ବିବାଦକୁ ନେଇ ଦମ୍ପତିଙ୍କୁ ଖାଦ୍ୟରେ ବିଷ ଦିଆଯାଇ ହତ୍ୟା କରାଯାଇଥିବା ସ୍ପଷ୍ଟ ହୋଇଛି। ଭାଗୀରଥିଙ୍କ ସାନଭାଇ ଲକ୍ଷ୍ମୀଧରଙ୍କ ସ୍ତ୍ରୀ ନର୍ମଦା ଏହି କାଣ୍ଡ ଘଟାଇଛନ୍ତି। ସେ ତାଙ୍କ ଭଉଣୀଭିଣୋଇଙ୍କ କଥାରେ ଏପରି କରିଥିବା ସ୍ବୀକାର କରିଛନ୍ତି। ଏନେଇ ଥାନାରେ ମୃତ ଦମ୍ପତିଙ୍କ ବଡ଼ପୁଅ ସୁବାସ ଅଭିଯୋଗ କରିଛନ୍ତି। ପୋଲିସ ମାମଲା (ନଂ-୧୬୨/୨୦) ରୁଜୁ କରିବା ସହ ଘଟଣାରେ ସମ୍ପୃକ୍ତ ନର୍ମଦା ଓ ତାଙ୍କ ଭଉଣୀଭିଣୋଇଙ୍କୁ ଅଟକ ରଖି ଅଧିକ ତଦନ୍ତ ଜାରି ରଖିଛି।
ସୂଚନା ଅନୁସାରେ, ଦମ୍ପତିଙ୍କ ଏପରି ମୃତ୍ୟୁ ପରେ ଗ୍ରାମସଭାରେ ସବୁକଥା ଆଲୋଚନା ହୋଇଥିଲା। ଫଳରେ ଗ୍ରାମବାସୀଙ୍କ ଚାପରେ ଭାଗୀରଥିଙ୍କ ଭାଇବୋହୂ ନର୍ମଦା ଘଟଣା ସମ୍ପର୍କରେ ବର୍ଣ୍ଣନା କରିଥିଲେ। ନର୍ମଦାଙ୍କ କହିବା ଅନୁସାରେ, ତାଙ୍କ ଭଉଣୀ ସୁକାନ୍ତି ପ୍ରଧାନ ଓ ଭିଣୋଇ ହରିହର ପ୍ରଧାନ ସେହି ଗ୍ରାମର ବାସିନ୍ଦା। ତେଣୁ ହରିହରଙ୍କ ଘର ନିକଟରେ ଭାଗୀରଥିଙ୍କ ଏକ ଖାଲି ଜାଗା ଥିବାରୁ ଏହାକୁ କେନ୍ଦ୍ରକରି ସବୁବେଳେ ହରିହରଙ୍କ ସହ ଭଗୀରଥିଙ୍କ ପାଟିତୁଣ୍ଡ ହୋଇ ଆସୁଥିଲା। ତେଣୁ ନର୍ମଦାଙ୍କ ଜରିଆରେ ଭାଗୀରଥି ଓ ତାଙ୍କ ସ୍ତ୍ରୀ କୌଶଲ୍ୟାଙ୍କୁ ବିଷଦେଇ ମାରି ଦେବା ପାଇଁ ହରିହର ଏବଂ ତାଙ୍କ ସ୍ତ୍ରୀ ସୁକାନ୍ତି ଚକ୍ରାନ୍ତ କରିଥିଲେ। ତେଣୁ ନର୍ମଦା ଖାଦ୍ୟରେ ଦମ୍ପତିଙ୍କୁ କୀଟନାଶକ ଦେଇଥିବା ନେଇ ଗ୍ରାମବାସୀଙ୍କ ଆଗରେ ପ୍ରକାଶ କରିଥିଲେ। ଗ୍ରାମବାସୀ ହରିହର ଓ ସୁକାନ୍ତିଙ୍କୁ ଅଟକରଖି ଶନିବାର ରାତିରେ ଖଣ୍ଡପଡା ପୋଲିସକୁ ଖବର ଦେଇଥିଲେ। ଖଣ୍ଡପଡା ଥାନା ଆଇଆଇସି ବିମଳ କୁମାର ମଲ୍ଲିକ ସଦଳବଳ ଗ୍ରାମରେ ପହଞ୍ଚତ୍ ହରିହର, ତାଙ୍କ ସ୍ତ୍ରୀ ସୁକାନ୍ତି ଓ ନର୍ମଦାଙ୍କୁ ଥାନାକୁ ଆଣିଥିଲେ। ଅନ୍ୟପକ୍ଷରେ ସୁରଟରେ ରହୁଥିବା ହରିହରଙ୍କ ସାନଭାଇ ଯୋଗୀନାଥ ଘଟଣାର ମୁଖ୍ୟ ଅଭିଯୁକ୍ତ ବୋଲି କୁହାଯାଉଛି। କାରଣ ଯୋଗୀନାଥ ମଝିରେମଝିରେ ଗ୍ରାମକୁ ଆସି ଭାଇ ଭାଉଜଙ୍କୁ କୁମନ୍ତ୍ରଣା ଦେଉଥିବା ଅଭିଯୋଗ ହେଉଛି। ସୂଚନାଯୋଗ୍ୟ, ଦମ୍ପତି ବିଷାକ୍ତ ଖାଦ୍ୟ ଖାଇବା ପରେ ଅସୁସ୍ଥ ହୋଇ ପଡ଼ିଥିଲେ। ସେମାନଙ୍କୁ ପ୍ରଥମେ ଜିଲା ମୁଖ୍ୟ ଚିକିତ୍ସାଳୟ ଓ ପରେ ଭୁବନେଶ୍ୱର କ୍ୟାପିଟାଲ ହସ୍ପିଟାଲକୁ ନିଆଯାଇଥିଲା। ସେଠାରେ ଉଭୟଙ୍କ ମୃତ୍ୟୁ ହୋଇଥିଲା। ବିଷକ୍ରିୟା ଯୋଗୁ ଦମ୍ପତିଙ୍କ ମୃତ୍ୟୁ ହୋଇଥିବା ବ୍ୟବଚ୍ଛେଦ ରିପୋର୍ଟରୁ ଜଣା ପଡ଼ିଥିଲା।