କଲମ୍ବୋ, ୧୬ା୫ (ପି.ଟି.)-କୋଭିଡ୍-୧୯ ମହାମାରୀ ଯୋଗୁ ଭାରତୀୟ କ୍ରିକେଟ ଦଳର ଶ୍ରୀଲଙ୍କା ଟୁର୍ ନେଇ ଅନିଶ୍ଚିତତା ଦେଖାଦେଇଛି। ତେବେ ଏହି ସୀମିତ ଓଭର ବିଶିଷ୍ଟ ସିରିଜକୁ ଜୁଲାଇରେ କରାଇବା ଲାଗି ଦେଶର କ୍ରିକେଟ ବୋର୍ଡ (ଏସ୍ଏଲ୍ସି) ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡକୁ ଅନୁରୋଧ କରିଛି। ପୂର୍ବ ନିର୍ଦ୍ଧାରିତ କାର୍ଯ୍ୟସୂଚୀ ଅନୁସାରେ ଭାରତ ଜୁନ୍-ଜୁଲାଇରେ ଶ୍ରୀଲଙ୍କା ଗସ୍ତରେ ଯାଇଥାନ୍ତା। ଦଳ ସେଠାରେ ୩ ଦିନିନିଆ ଏବଂ ସମାନ ସଂଖ୍ୟକ ଅନ୍ତର୍ଜାତୀୟ ଟି୨୦ ମ୍ୟାଚ ଖେଳିଥାନ୍ତା। ମାତ୍ର ବର୍ତ୍ତମାନ ସମଗ୍ର ବିଶ୍ୱରେ ସ୍ବାସ୍ଥ୍ୟ ସଂକଟ ଦେଖା ଦେଇଥିବାରୁ ଏହି ସିରିଜ ଖେଳାଯିବା ନେଇ ଅନିଶ୍ଚିତତା ଦେଖା ଦେଇଛି। କରୋନାଭାଇରସ୍ ଦ୍ୱାରା ସମଗ୍ର ବିଶ୍ୱରେ ୪୦ଲକ୍ଷରୁ ଊର୍ଦ୍ଧ୍ୱ ଲୋକ ସଂକ୍ରମିତ ହୋଇ ସାରିଲେଣି। ଫଳରେ କ୍ରିକେଟ ଖେଳ ବନ୍ଦ ରହିଛି। ଏସ୍ଏଲ୍ସି ବିସିସିଆଇକୁ ଏକ ଇ-ମେଲ୍ ପଠାଇଛି। ଖେଳପ୍ରେମୀଙ୍କ ସୁରକ୍ଷା ପାଇଁ ଏହି ସିରିଜ ରୁଦ୍ଧଦ୍ୱାରରେ ଖେଳାଯାଇପାରେ। କ୍ୱାରାଣ୍ଟାଇନ୍ ନିୟମକୁ କଡ଼ାକଡ଼ି ପାଳନ କରିବା ଲାଗି ଶ୍ରୀଲଙ୍କା ନିର୍ଭର ପ୍ରତିଶ୍ରୁତି ଦେଇଥିବା ପ୍ରକାଶ। ବିସିସିଆଇ କିନ୍ତୁ ଏହାର ଆଭିମୁଖ୍ୟକୁ ପୂର୍ବରୁ ସ୍ପଷ୍ଟ କରିସାରିଛି ଯେ, ସରକାରଙ୍କଠାରୁ ସବୁଜ ସଂକେତ ନ ମିଳିଲେ କିଛି ସମ୍ଭବ ନୁହେଁ। ଇଂଲଣ୍ଡ ୩ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଖେଳିବା ପାଇଁ ଶ୍ରୀଲଙ୍କା ଟୁର୍ରେ ଯାଇଥିଲା। ମାତ୍ର କରୋନାଭାଇରସ୍ ଯୋଗୁ ଦ୍ୱିତୀୟ ଓ୍ବାର୍ମଅପ୍ ମ୍ୟାଚ ଅଧାରୁ ଟୁର୍କୁ ବାତିଲ କରିଦିଆଯାଇଥିଲା। ଭାରତ ଯଦି ଟୁର୍ରେ ନ ଯାଏ ତେବେ ଏସ୍ଏଲ୍ସିର ଆର୍ଥିକ ସଂକଟ ବୃଦ୍ଧି ପାଇବ। କରୋନାଭାଇରସ୍ ମହାମାରୀ ଯୋଗୁ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ୧୩ତମ ସଂସ୍କରଣ ଅନିର୍ଦ୍ଦିଷ୍ଟକାଳ ପାଇଁ ସସ୍ପେଣ୍ଡ ରହିଛି। ଏହି ଟୁର୍ନାମେଣ୍ଟର ଆୟୋଜନ ପାଇଁ ଶ୍ରୀଲଙ୍କା ପୂର୍ବରୁ ଅଫର ଦେଇଥିଲା।