ପୁଣେ,୧୨।୧୦(ପି.ଟି.)- ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଅନୁବନ୍ଧିତ ଆସୋସିଏଶନ ଗୁଡିକ ରବିବାର ଏକ ଅନୌପଚାରିକ ବୈଠକରେ ଏକାଠି ହେବେ। ଏହି ବୈଠକରେ ଆସୋସିଏଶନଗୁଡିକ ସେମାନଙ୍କ ନୂଆ ପଦାଧିକାରୀଙ୍କ ନାମ ନେଇ ଅନ୍ତିମ ନିଷ୍ପତ୍ତି ନେବେ। ଏହି ବୈଠକରେ ପୂର୍ବତନ ଅଧିକାରୀମାନେ ମଧ୍ୟ ଯୋଗ ଦେବେ। ୨୩ ତାରିଖରେ ବାର୍ଷିକ ସାଧାରଣ ବୈଠକ ଅନୁଷ୍ଠିତ ହେବା ପରେ ନୂଆ ପଦାଧିକାରୀମାନେ ଦାୟିତ୍ୱ ନେବେ। ତେବେ ବୋର୍ଡ ସଦସ୍ୟମାନେ ପାଦାଧୀକାରୀଙ୍କ ନାମ ନେଇ ନିଷ୍ପତ୍ତି ନେବାକୁ ପୂର୍ବତନ ବିସିସିଆଇ ଅଧ୍ୟକ୍ଷ ଅନୁରାଗ ଠାକୁର ମତ ଦେଇଛନ୍ତି।
୫ଟି ରାଜ୍ୟ ୟୁନିଟ୍ ଯଥା, ତାମିଲନାଡୁ, ହରିୟାଣା, ମହାରାଷ୍ଟ୍ର, ଉତ୍ତରପ୍ରଦେଶ ଓ ମଣିପୁରକୁ ବିସିସିଆଇ ଏଜିଏମ୍କୁ ବାରଣ କରାଯାଇଛି। ଫଳରେ ଏହି ୟୁନିଟ୍ଗୁଡ଼ିକ କୋର୍ଟକୁ ଯିବା ନିଶ୍ଚିତ ମନେ ହେଉଛି। ତେବେ ଅନ୍ୟ ଆସୋସିଏଶନଗୁଡକ ଏଜିଏମ୍ ଶୀଘ୍ର ଅନୁଷ୍ଠିତ ହେଉ ଓ ଯେତେଶୀଘ୍ର ସମ୍ଭବ ପ୍ରଶାସକ କମିଟି (ସିଓଏ)ଠାରୁ ଦାୟିତ୍ୱ ନେବାକୁ ଚାହାନ୍ତି। ତେବେ ଏହି ଅନୌପଚାରିକ ବୈଠକରେ ପୂର୍ବତନ ବୋର୍ଡ ଅଧ୍ୟକ୍ଷ ତଥା ତାମିଲନାଡୁ ଷ୍ଟ୍ରଙ୍ଗମ୍ୟାନ ଏନ୍. ଶ୍ରୀନିବାସନ ଯୋଗ ଦେଉଛନ୍ତି କି ନା ତାହା ଦେଖିବାକୁ ବାକି ରହିଲା। ଅକ୍ଟୋବର ୧୪ ତାରିଖ ସୋମବାର ନାମାଙ୍କନ ଦାଖଲ କରିବାର ଶେଷ ତାରିଖ ହୋଇଥିବାରୁ ରବିବାର ଏହି ବୈଠକ ଡକାଯାଇଛି।
ଗୁଜରାଟର ଜୟ ଶାହ, ପୂର୍ବତନ ଅଧିନାୟକ ତଥା କ୍ରିକେଟ ଆସୋସିଏଶନ ଅଫ୍ ବେଙ୍ଗଲ (ସିଏବି) ଅଧ୍ୟକ୍ଷ ସୌରଭ ଗାଙ୍ଗୁଲି, ପୂର୍ବତନ ଟେଷ୍ଟ ଖେଳାଳି ଓ କର୍ନାଟକ ନୋମିନି ବ୍ରିଜେଶ ପଟେଲ ବିଭିନ୍ନ ପଦ ପାଇଁ ଦୌଡ଼ରେ ଆଗରେ ରହିଛନ୍ତି। ଅନ୍ୟ ସଦସ୍ୟଙ୍କ ତୁଳନାରେ ପଟେଲଙ୍କ ଅଭିଜ୍ଞତା ସବୁଠାରୁ ଅଧିକ। ସେହିପରି ଅନୁରାଗ ଠାକୁରଙ୍କ ସାନ ଭାଇ ଅରୁଣ ଧୁମଲ ଓ ବରିଷ୍ଠ ଖବରଦାତା ତଥା ଦିଲ୍ଲୀ ଆସୋସିଏଶନ ଅଧ୍ୟକ୍ଷ ରଜତ ଶର୍ମା ମଧ୍ୟ ଦୌଡ଼ରେ ରହିଛନ୍ତି। କାର୍ଯ୍ୟକାରୀ ପଦ ପାଇଁ ବିଚାରକୁ ନିଆ ନ ଗଲେ ମଧ୍ୟ ଉତ୍ତରାପୂର୍ବାଞ୍ଚଳ ରାଜ୍ୟଗୁଡିକ ବିସିସିଆଇ ଅପେକ୍ସ କାଉନସିଲ୍ରେ ସାମିଲ ହେବାକୁ ଇଚ୍ଛା ଜାହିର କରିଛନ୍ତି।