ନୂଆଦିଲ୍ଲୀ, ୧୭ା୬ (ପି.ଟି.)- ବିସିସିଆଇର ଏଥିକ୍ସ ଅଫିସର ଓ ଅମ୍ବୁଡ୍ସମ୍ୟାନ ଭାବେ ପୂର୍ବତନ ସୁପ୍ରିମକୋର୍ଟ ବିଚାରପତି ଡି.କେ. ଜୈନଙ୍କ କାର୍ଯ୍ୟକାଳ ମିଆଦ ଏକ ବର୍ଷ ବୃଦ୍ଧି କରିଛି ଦେଶର କ୍ରିକେଟ ବୋର୍ଡ। ଜୈନ ୨୦୧୯ ଫେବୃୟାରୀରେ ସୁପ୍ରିମକୋର୍ଟଙ୍କ ଦ୍ୱାରା ବିସିସିଆଇର ପ୍ରଥମ ଅମ୍ବୁଡ୍ସମ୍ୟାନ ଭାବେ ନିଯୁକ୍ତି ପାଇଥିଲେ। ପରେ ସେ ଏଥିକ୍ସ ଅଫିସର ଭାବେ ଅତିରିକ୍ତ ଦାୟିତ୍ୱ ଗ୍ରହଣ କରିଥିଲେ। ତାଙ୍କ କାର୍ଯ୍ୟକାଳ ଫେବୃୟାରୀ ୨୯ରେ ଶେଷ ହୋଇଥିଲା। କୋଭିଡ୍-୧୯ ଜନିତ ପରିସ୍ଥିତି ଯୋଗୁ ଗତ ସପ୍ତାହରେ ତାଙ୍କ ଚୁକ୍ତିର ନବୀକରଣ କରାଯାଇଛି। ଜୈନଙ୍କ ନିକଟରେ ଅନେକ ମାମଲା ଫଇସଲା ନ ହୋଇ ପଡ଼ି ରହିଛି। ଭାରତୀୟ କ୍ରିକେଟ ଦଳର ପୂର୍ବତନ ଲିଆଇସନ ଅଫିସର ମୟଙ୍କ ପାରିଖଙ୍କ ବିରୋଧରେ ସ୍ବାର୍ଥ ନିହିତ ମାମଲାର ରାୟ ଦିଆଯାଇ ନାହିଁ। ପାରିଖ ମୁମ୍ବାଇରେ ୬ଟି କ୍ଲବ ଚଳାଉଛନ୍ତି ବୋଲି ଅଭିଯୋଗ ହୋଇଥିଲା। ୨୦୧୯ରେ ଜୈନ ଦାୟିତ୍ୱ ଗ୍ରହଣ କରିବା ପରେ କେଏଲ୍ ରାଉଲ ଓ ହାର୍ଦ୍ଦିକ ପାଣ୍ଡ୍ୟାଙ୍କୁ ନେଇ ‘କଫି ଓ୍ବିଥ୍ କରନ’ ବିବାଦ ଆରମ୍ଭ ହୋଇଥିଲା। ଏକ ଚ୍ୟାଟ୍ ଶେଷରେ ଏହି ଦୁଇ କ୍ରିକେଟର ଆପତ୍ତିଜନକ ମନ୍ତବ୍ୟ ଦେଇଥିବାରୁ ସେମାନଙ୍କୁ ଅଷ୍ଟ୍ରେଲିଆ ଟୁର୍ରୁ ଫେରାଇ ଆଣିବା ସହ ସସ୍ପେଣ୍ଡ କରାଯାଇଥିଲା। ସେହିପରି କ୍ରିକେଟ ଉପଦେଷ୍ଟା କମିଟି (ସିଏସି) ସଦସ୍ୟ ସଚିନ ତେନ୍ଦୁୁଲକର, ବର୍ତ୍ତମାନର ବିସିସିଆଇ ସଭାପତି ସୌରଭ ଗାଙ୍ଗୁଲି ଏବଂ ଭିଭିଏସ୍ ଲକ୍ଷ୍ମଣଙ୍କ ବିରୋଧରେ ଆସିଥିବା ସ୍ବାର୍ଥ ନିହିତ ମାମଲାର ସେ ଶୁଣାଣି କରିଥିଲେ। ଏଭଳି ସମାନ ଅଭିଯୋଗ ବିଶ୍ୱକପ୍ ବିଜୟୀ ଅଧିନାୟକ କପିଳ ଦେବଙ୍କ ବିରୋଧରେ ମଧ୍ୟ ଆସିଥିଲା। ମାତ୍ର ତାହା ଅମୂଳକ ବୋଲି ଦର୍ଶାଯାଇଥିଲା।