ନୂଆଦିଲ୍ଲୀ,୧୭ା୫(ପିଟି)- ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର କ୍ରିକେଟ ଅପରେଶନ୍ସର ସାଧାରଣ ସମ୍ପାଦକ ସବା କରିମ ଓ ଭାରତ ଏ’ ଦଳର ଫିଲ୍ଡିଂ କୋଚ୍ ଅଭୟ ଶର୍ମା ଚଳିତ ମାସର ପରବର୍ତ୍ତୀ ଭାଗରେ ମାଳଦ୍ୱୀପ ଗସ୍ତ କରିବେ। ମାଳଦ୍ୱୀପ ରାଷ୍ଟ୍ରପତି ଇବ୍ରାହିମ ମହମ୍ମଦ ସୋଲି ଗତ ମାସରେ ଆଇପିଏଲ ଦେଖିବାକୁ ବେଙ୍ଗାଲୁରୁ ଆସିଥିଲେ। ଏଣୁ ଦୁଇ ଦେଶ ମଧ୍ୟରେ କ୍ରିକେଟ ସମ୍ପର୍କ ବୃଦ୍ଧି କରିବା ଲାଗି ବିସିସିଆଇ ଦକ୍ଷିଣ ଏସୀୟ ଦେଶକୁ ଏକ ଦଳ ପଠାଇବାକୁ ଯୋଜନା କରିଛି। କେନ୍ଦ୍ର ସରକାର ବିସିସିଆଇ ପଦାଧିକାରୀଙ୍କ ଗସ୍ତ ଲାଗି ସମସ୍ତ ପ୍ରକାର ବ୍ୟବସ୍ଥା କରିଛି। ଅନ୍ୟ ଦେଶରେ କ୍ରିକେଟର ଉନ୍ନତି ଲାଗି ବିସିସିଆଇ ସହାୟତାର ହାତ ବଢ଼ାଇବା କିଛି ନୂଆ କଥା ନୁହେଁ। ପୂର୍ବରୁ ଆଫଗାନିସ୍ତାନ ଓ ନେପାଳ ଭଳି ଦେଶକୁ ସହାୟତା କରିଆସିଛି। ଆଫଗାନିସ୍ତାନ ଏବେ ଏକ ପ୍ରତିଷ୍ଠିତ କ୍ରିକେଟ ଦେଶ ହୋଇସାରିଛି। ସେମାନଙ୍କୁ ଡେରାଡୁନଠାରେ ଏକ ଘରୋଇ ଗ୍ରାଉଣ୍ଡ ମଧ୍ୟ ଦିଆଯାଇଛି। ମାଳଦ୍ୱୀପ କ୍ରିକେଟକୁ ସହାୟତା କରିବା ଲାଗି ସରକାର ପ୍ରସ୍ତାବ ଦେଇଥିଲେ। ଆମେ ଏଥିରେ ଖୁସି। ବିସିସିଆଇ ଅଫିସିଆଲ ଗସ୍ତ କରି କେଉଁଭଳି ତାଙ୍କ କ୍ରିକେଟର ଉନ୍ନତିରେ ଯୋଗଦାନ କରାଯାଇ ପାରିବ ତାହା ପରଖିବେ ବୋଲି ବିସିସିଆଇ ଅଫିସିଆଲ କହିଛନ୍ତି। ଉଲ୍ଲେଖଥାଉ କି, ଆଇପିଏଲ ମ୍ୟାଚ୍ ଅବସରରେ ଭାରତୀୟ କ୍ରିକେଟ ଆଇକନ ବିରାଟ କୋହଲି ଓ ମହେନ୍ଦ୍ର ସିଂ ଧୋନୀ ଦଳୀୟ ଜର୍ସି ପ୍ରଦାନ କରିଥିଲେ।