କଟକ,୩।୧: କଟକରେ ଏକ ଶ୍ରଦ୍ଧାଞ୍ଜଳି ସଭାରେ ଯୋଗଦେଇଥିଲେ ପୂର୍ବତନ ବିଧାୟକ ପ୍ରଭାତ ବିଶ୍ବାଳ। ତେବେ ସେଠାରେ ପ୍ରଭାତ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି,କିଛି ଲୋକ ମୋ ଗୋଡ଼ ଟାଣିଛନ୍ତି। ଯେଉଁମାନେ ମୋ ଗୋଡ଼ ଟାଣିଛନ୍ତି ସେମାନଙ୍କ କଥା ଜଗନ୍ନାଥ ବୁଝିବେ। ରାମାୟଣରେ ରାମ ଓ ରାବଣ, ମହାଭାରତରେ କୃଷ୍ଣ ଓ କଂସ ଅଛନ୍ତି। ସେହିପରି ରାଜନୀତିରେ ବି ଅଛନ୍ତି, ତା’ର ନମୁନା ବିଭିନ୍ନ ସମୟରେ ଦେଇଛି।
ତେବେ ପୂର୍ବରୁ ବିଜେଡି ଶୋଚନୀୟ ପରାଜୟକୁ ନେଇ ଦଳର ବରିଷ୍ଠ ନେତା ପ୍ରଭାତ ବିଶ୍ୱାଳ ପ୍ରଣବ ପ୍ରକାଶ ଦାସ (ବବି )ଓ କାର୍ତ୍ତିକ ପାଣ୍ଡିଆନଙ୍କୁ ସମାଲୋଚନା କରିଥିଲେ। ପରେ ରାଜ୍ୟ ସଭା ଏମ୍ପି ଦେବାଶିଷ ସାମନ୍ତରାୟ ମୁହଁ ଖୋଲି କହିଥିଲେ, ସିବିଆଇ ମାମଲାରୁ ବର୍ତ୍ତିବାକୁ ପ୍ରଭାତ ଭାଜପା ଆଡ଼କୁ ଢଳୁଥିବା ଲାଗୁଛି। ପ୍ରଭାତ ବାବୁ ଦରକାର ପଡ଼ିବା ବେଳେ ପାଣ୍ଡିଆନ, ବବି ପାଖକୁ ଦୌଡୁଥିଲେ। ପାଣ୍ଡିଆନ କାମ କଲା ବେଳେ ତ ପ୍ରଭାତ ତାଙ୍କୁ ସମାଲୋଚନା କରୁନଥିଲେ। ପରାଜୟ ନେଇ ଏବେ ସେ ପ୍ୟାରୀ ବାବୁଙ୍କ ଲୁହ ପଡ଼ିଲା ବୋଲି କହୁଛନ୍ତି। ପ୍ୟାରୀଙ୍କ ଷଡ଼ଯନ୍ତ୍ର ବେଳେ ଏ ବାବୁଙ୍କ ପ୍ରମୁଖ ଭୂମିକା ଥିବା ସ୍ପଷ୍ଟ ହେଉଛି।
ତେବେ ନିକଟରେ ପ୍ରଭାତଙ୍କ ଝିଅଙ୍କ ବିବାହ ହୋଇଥିଲା। ଯେଉଁଥିରେ ବିରୋଧୀ ଦଳ ନେତା ତଥା ବିଜେଡି ସୁପ୍ରିମୋ ଯୋଗ ଦେଇଥିଲେ। ଅନ୍ୟପକ୍ଷେ ନିର୍ବାଚନ ପରେ ପ୍ରଥମେ କାର୍ତ୍ତିକ ପାଣ୍ଡିଆନଙ୍କୁ ଉକ୍ତ ବିବାହ ଭୋଜିରେ ଦେଖିବାକୁ ମିଳିଥିଲା। ପୂର୍ବତନ ବିଜେଡି ବିଧାୟକ ପ୍ରଭାତ ରଞ୍ଜନ ବିଶ୍ବାଳଙ୍କ ଝିଅ ତଥା ଚୌଦାର-କଟକ ବିଧାୟକ ସୌଭିକ ବିଶ୍ୱାଳଙ୍କ ଭଉଣୀ ବାହାଘରରେ ନଜର ଆସିଥିଲେ ପାଣ୍ଡିଆନ । ବିବାହ ମଣ୍ଡପରେ ଉପସ୍ଥିତ ଅତିଥି ଓ ପ୍ରଭାତ ବିଶ୍ବାଳଙ୍କ ସମ୍ପର୍କୀୟଙ୍କମଧ୍ୟରେ ତାଙ୍କୁ ଦେଖିବାକୁ ମିଲିଥିଲା । ପାଣ୍ଡିଆନ ଲୋକଙ୍କ ସହ କଥାବାର୍ତ୍ତା କରୁଥିବା ମଧ୍ୟ ନଜର ଆସିଥିଲେ।
