ଭୁବନେଶ୍ୱର, ୧।୧୦(ବ୍ୟୁରୋ): ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା, ବିଜୁ କୃଷକ କଲ୍ୟାଣ ଯୋଜନା (ବିକେକେୱାଇ) ଏବଂ ଓଡ଼ିଶା ଷ୍ଟେଟ୍ ଟ୍ରିଟ୍ମେଣ୍ଟ୍ ଫଣ୍ଡ୍ ଆଦି ଯୋଜନା ଦ୍ୱାରା ଗରିବଙ୍କୁ ମାଗଣାରେ ଚିକିତ୍ସା ଯୋଗାଇଦେବାର ବ୍ୟବସ୍ଥା କରିଛନ୍ତି ରାଜ୍ୟ ସରକାର। ଏହିସବୁ ଯୋଜନାରେ ରାଜ୍ୟର ବିଭିନ୍ନ ଘରୋଇ ହସ୍ପିଟାଲରେ ଆର୍ଥିକ ଅନଗ୍ରସର ରୋଗୀ ଚିକିତ୍ସିତ ହେଉଥିବାବେଳେ ଏ ବାବଦ ଅର୍ଥ କିନ୍ତୁ ସରକାର ପୈଠ କରିବାରେ ବିଫଳ ହୋଇଛନ୍ତି। ଏ ପର୍ଯ୍ୟନ୍ତ ବାକି ପଡ଼ିଥିବା ୨୫କୋଟି ଟଙ୍କା ଘରୋଇ ହସ୍ପିଟାଲ୍କୁ ଦେଇନାହାନ୍ତି ରାଜ୍ୟ ସରକାର। ତେଣୁ ସରକାରଙ୍କ ପ୍ରଚଳିତ କୌଣସି ସ୍ବାସ୍ଥ୍ୟ ବୀମା ଯୋଜନାରେ ସହଭାଗିତା ଯୋଗାଇଦେବ ନାହିଁ ବୋଲି ଚେତାବନୀ ଦେଇଛି ଅଲ୍ ଓଡ଼ିଶା ପ୍ରାଇଭେଟ୍ ମେଡିକାଲ୍ ଏଷ୍ଟାବ୍ଲିଶ୍ମେଣ୍ଟ ଫୋରମ୍।
ଫୋରମ୍ ପକ୍ଷରୁ ସୋମବାର ଆଇଏମ୍ଏ ଭବନରେ ଏକ ଗୁରୁତ୍ୱପୂର୍ଣ୍ଣ ବୈଠକ ଡକାଯାଇ ସ୍ବାସ୍ଥ୍ୟସେବା ସହ ଜଡ଼ିିତ ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା କରାଯାଇଥିଲା। ଅନ୍ୟ ସମସ୍ୟା ମଧ୍ୟରେ ୨୦୧୪ରୁ ୭୫% ଘରୋଇ ଡାକ୍ତରଖାନାର ପଞ୍ଜୀକରଣ ଓ ନବୀକରଣ ଦରଖାସ୍ତ ପଡ଼ି ରହିଥିଲେ ବି ସରକାର ଏଥିପ୍ରତି ଦୃଷ୍ଟି ଦେଉନାହାନ୍ତି ବୋଲି ଫୋରମ୍ ଅଭିଯୋଗ କରିଛି। ଅନ୍ୟ ରାଜ୍ୟରେ ଉଭୟ ସରକାରୀ ଓ ବେସରକାରୀ ଡାକ୍ତରଖାନା କ୍ଲିନିକାଲ୍ ଏଷ୍ଟାବ୍ଲିଶ୍ମେଣ୍ଟ ଆଇନ୍ରେ ପଞ୍ଜୀକୃତ ହେଉଥିବାବେଳେ ଓଡ଼ିଶାରେ କେବଳ ବେସରକାରୀ ଡାକ୍ତରଖାନାକୁ ଏହି ଆଇନ୍ ଅନ୍ତର୍ଭୁକ୍ତ କରାଯାଇଛି। ସରକାରୀ ଡାକ୍ତରଖାନାକୁ ଏହି ଆଇନ୍ର ଅଗ୍ନିଶମ ଓ ପ୍ରଦୂଷଣ ପରି ନିୟାମକରୁ ବାହାରେ କାହିଁକି ରଖାଯାଇଛି ବୋଲି ଫୋରମ୍ ସଭାପତି ଡା. ଅଜୟ କୁମାର ମିଶ୍ର କହିଛନ୍ତି। ଅନ୍ୟପକ୍ଷରେ ଡାକ୍ତରଙ୍କ ସୁରକ୍ଷା ପାଇଁ ରାଜ୍ୟରେ କୌଣସି ସ୍ବତନ୍ତ୍ର ବ୍ୟବସ୍ଥା ନ ଥିବାବେଳେ ଅନେକ ସମୟରେ ଡାକ୍ତରମାନେ ଆକ୍ରମଣର ଶିକାର ହେଉଛନ୍ତି। ଏନେଇ ଫୋରମ୍ ପକ୍ଷରୁ ବାରମ୍ବାର ସ୍ବାସ୍ଥ୍ୟମନ୍ତ୍ରୀ, ସଚିବଙ୍କୁ ଅଭିଯୋଗ କରାଗଲେ ମଧ୍ୟ କୌଣସି ସ୍ଥାୟୀ ପ୍ରତିକାର କରାଯାଇ ନ ଥିବା ସେ କହିଛନ୍ତି। ଡା. ମିଶ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ଫୋରମ୍ର ସଦସ୍ୟଙ୍କ ସହ ରାଜ୍ୟ ଆଇଏମ୍ଏ ସଭାପତି ଡା. ପୂର୍ଣ୍ଣଚନ୍ଦ୍ର ମହାପାତ୍ର, ସମ୍ପାଦକ ଡା. ଜନ୍ମେଜୟ ମହାପାତ୍ର, ସହସମ୍ପାଦକ ଡା. ମୃତ୍ୟୁଞ୍ଜୟ ମହାପାତ୍ର ପ୍ରମୁଖ ଉପସ୍ଥିତ ଥିଲେ।