ଫୁଲବାଣୀ ଅଫିସ, ୧୫ା୫-କନ୍ଧମାଳ ଏକ ପାହାଡିଆ ଅଞ୍ଚଳ ହୋଇଥିବାରୁ ଏଠାରେ ପାଣିର ଘୋର ଅଭାବ| ଲୋକଙ୍କୁ ପାନୀୟ ଜଳ ଯୋଗାଇ ଦେବା ପାଇଁ ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗ(ଆରଡବ୍ଲ୍ୟୁଏସ୍ଏସ୍) ପକ୍ଷରୁ ବହୁ ପ୍ରକଳ୍ପ କରାଯାଇଛି। ଏବେ ପ୍ରବଳ ଗ୍ରୀଷ୍ମ ପ୍ରବାହ ଜାରି ରହିଛି ା ଚାରିଆଡ଼ ଶୁଖିଲା ପଡ଼ିଛି। ପ୍ରକଳ୍ପ ଥାଇ ବି ଲୋକେ ପାଣି ପାଇଁ ଡହଳବିକଳ ହେଉଛନ୍ତି। ଫୁଲବାଣୀ ସହରଠାରୁ ମାତ୍ର ୫/୬ କିମି ଦୂର ତୁଡିପାଜୁ ପଞ୍ଚାୟତରେ ଏଭଳି ଘଟଣା ଦେଖିବାକୁ ମିଳିଛି ା ଏହି ପଞ୍ଚାୟତ ଅଧୀନ ବୁଢ଼ାଦାନୀ ଗ୍ରାମର ୪ ୱାର୍ଡର ଲୋକେ ନିକଟସ୍ଥ ନାଳରୁ ପାଣି ଆଣି ପିଇବାକୁ ବାଧ୍ୟ ହେଉଛନ୍ତି।
ଆରଡବ୍ଲ୍ୟୁଏସ୍ଏସ୍ ପକ୍ଷରୁ ପ୍ରାୟ ୧୦ ଲକ୍ଷ ଟଙ୍କା ବ୍ୟୟରେ ବୁଢ଼ାଦାନୀରେ ଏକ ପାନୀୟ ଜଳ ପ୍ରକଳ୍ପ ହୋଇଥିଲା ା ଗ୍ରାମର ବିଭିନ୍ନ ୱାର୍ଡକୁ ପାଇପ ବିଛାଯାଇ ପାଣି ମଧ୍ୟ ଯୋଗାଇ ଦିଆଯାଉଥିଲା ା ତେବେ ୬ ମାସ ହେଲା ଏହା ଅଚଳ ହୋଇପଡିଛି ା କମ୍ ଭୋଲଟେଜ ଯୋଗୁ ମୋଟର ଚାଲି ପାରୁନାହିଁ। ତେଣୁ ନାଳର ଦୂଷିତ ପାଣି ପିଇବାକୁ ବାଧ୍ୟ ହେଉଛୁ ବୋଲି ସରପଞ୍ଚ ମୃତ୍ୟୁଞ୍ଜୟ କହଁର ପ୍ରକାଶ କରିଛନ୍ତି। ଜଳକୁ ବିଶୁଦ୍ଧ କରିବାକୁ ଜନସ୍ବାସ୍ଥ୍ୟ ବିଭାଗ ପକ୍ଷରୁ ହେଲୋଜିନ୍ ବଟିକା ଉପଲବ୍ଧ ହେଉନି ା ଲୋକେ ଦୂଷିତ ପାଣି ପିଇ ରୋଗାକ୍ରାନ୍ତ ହେଉଛନ୍ତି। ପାନୀୟ ଜଳ ଯୋଗାଣ ପାଇଁ ଯେଉଁ ପାଇପ ବିଛା ଯାଇଥିଲା ତାହା ଫାଟି ଗଲାଣି ା ଗ୍ରାମରେ ପଦରସାହିରେ ଥିବା ଦୁଇଟି ନଳକୂପରୁ ଲୌହ ମିଶ୍ରିତ ପାଣି ବାହାରୁଥିବାରୁ ତାହା ପିଇବା ଉପଯୋଗୀ ନୁହେଁ ା ପାନୀୟ ଜଳ ପାଇଁ ପଦରସାହି, ଝାରୁକୁମ୍ପା, ସାତା ସାହି, ତଳ ସାହିର ୧୫୦ରୁ ଊର୍ଦ୍ଧ୍ୱ ପରିବାରର ପ୍ରାୟ ୧୦୦୦ ଲୋକେ ପାନୀୟ ଜଳ ପାଇବାରୁ ବଞ୍ଚିତ ହେଉଥିବା ପୂର୍ବତନ ସମିତି ସଭ୍ୟ ବିନାୟକ ଗଣ୍ଡା ପ୍ରକାଶ କରିଛନ୍ତି। ସେହିପରି ତିଳୋତ୍ତମା ବେହେରା, କୁନୀ ଗଣ୍ଡା, ନବୀନ ବେହେରା, ଗୁପ୍ତେଶ୍ୱର ଗଣ୍ଡା, ରଦିନା ଗଣ୍ଡା, ବିକ୍ରମ ବେହେରା ପ୍ରମୁଖ ପାଣି ପାଇଁ ଗ୍ରାମଠାରୁ ଅଧ କିମି ଦୂର ନାଳକୁ ଯାଉଥିବା କହିଛନ୍ତି। ରାତିରେ ପାଣି ଆବଶ୍ୟକ ପଡିଲେ ସକାଳ ଯାଏ ଅପେକ୍ଷା କରିବାକୁ ପଡେ। ପ୍ରକଳ୍ପ ତୁରନ୍ତ କାର୍ଯ୍ୟକ୍ଷମ ହେଲେ ଉପକୃତ ହେବୁ ବୋଲି ସେମାନେ କହିଛନ୍ତି। ଏ ସମ୍ପର୍କରେ ଆରଡବ୍ଲ୍ୟୁଏସ୍ଏସ୍ ସହକାରୀ ନିର୍ବାହୀ ଯନ୍ତ୍ରୀ ଦେବହରି ପ୍ରଧାନଙ୍କୁ ପଚାରିବାରୁ ସେ ବିଦ୍ୟୁତ୍ ସମସ୍ୟା ଥିବା ସ୍ବୀକାର କରିଛନ୍ତି। ଆଉ କ’ଣ ସମସ୍ୟା ରହିଛି ଏବଂ ପ୍ରକଳ୍ପ କିପରି କାର୍ଯ୍ୟକାରୀ ହେବ ତାହା ଦେଖିବା ପରେ ଠିକ୍ କରି ପାଣି ଯୋଗାଇ ଦେବେ ବୋଲି ପ୍ରକାଶ କରିଛନ୍ତି।
(ରାକେଶ କୁମାର ରାଉତ)
