ଲାଠୋର, ୯ା୬ (ଡି.ଏନ୍.ଏ): ସରକାର ୬୦ ବଛର୍ରୁ ଅଧ୍କା ବୁଢ଼ାବୁଢ଼ି, ବିଧବା, ଦିବ୍ୟାଙ୍ଗମାନକୁ ମାସିକ ୫ଶହ ଟଁକା ଭତା ଯୁଗେଇ ଦେଉଛନ୍। ସେନ୍ତା ୮୦ ବଛର୍ରୁ ଅଧ୍କା ବୁଢ଼ାବୁଢ଼ିକୁ ମାସିକ ୭ଶହ ଟଁକା ଯୁଗେଇ ଦେଉଛନ୍। ହେଲେ ଅନେକ ଜାଗାରେ ପରଶାସନିକ ଅବହେଲାର ଲାଗି ବୁଢ଼ାବୁଢ଼ି, ଦିବ୍ୟାଙ୍ଗ ଭତା ପାଏବାରୁ ବଁଚିତ୍ ହେଉଥିବାର ଦେଖ୍ବାକେ ମିଲୁଛେ। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଅଧୀନ ଲାଠୋର ଗଁାରେ।
ସୂଚନା ଅନ୍ସାରେ ଲାଠୋର ଗଁାର ବିଧବା ମହିଲା କୁଆଦେଇ କରୁଅଁା(୮୦)। ଆପ୍ନେ ବେଠିଆ କରୁଅଁା ଆରପାରକେ ଚାଲିଯିବାର ଆଏଜ୍କେ ୩୦ ବଛର ବିତିଗଲାନ। କୁଆଦେଇ ବନେ ବଛରକେତେ ଲାଠୋର ସରସ୍ବତୀ ଶିଶୁ ବିଦ୍ୟାମନ୍ଦିରରେ ଆୟା ହିସାବେ କାଯ୍କରି ନିଜର ପେଟ୍ ପାଲୁଥିଲେ। ହେଲେ ବଏସ୍ ଅଧ୍କା ହେଲାରୁ ସେ କାମ୍ କରି ନାଇଁପାରଲେ। ସ୍କୁଲ ଛାଡ଼ିଦେଲା ଉତାରୁ ସେ ଉପେ ଶୂଇନ୍ ହେଇ ନିଜର ବିଧବା ଝି’ ଘରେ ଆଶ୍ରେ ନେଇଛନ୍। ସରକାରୀ ସାହାଯ୍ କହେଲେ ପଁଚେତ୍ରୁ ପାଉଥିବାର ୧୦ କେ.ଜି ଚାଉଲକେ ଛାଡ଼ିଦେଲେ ବାକି କେହେନ୍ସି ସୁବିଧା ନାଇଁ ପାଏବାର। ତାକର ବଏସ୍କେ ଦେଖ୍ଲେ ସେ ଏହେଦେ ୭ ଶହ ଟଁକା ବୁଢ଼ାବୁଢ଼ି ଭତା ପାଏବାର କଥା। ଭତା ପାଏବାର ଲାଗି ଲାଠୋର ପଁଚେତ୍ରେ ଗୁହାରି ବି କରିଥିଲେ। ହେଲେ ଭୋଟ ପରିଚଏ ପତର ଆର ଆଧାର କାର୍ଡ ଅଭାବୁ ପଁଚେତ୍ କତୁରପକ୍ଷ ତାହାକୁ ଫିରେଇ ଦେଇଥିଲେ। ଇଆଡ଼େ ଭୋଟ ପରିଚଏ ପତର ଆର ଆଧାର କାର୍ଡ କେନେ୍ଥେଇ ସୁବିଧାରେ ଗଁାଗଁଲିର ଲୋକ୍ ପାଇପାରବେ ସେଥିରଲାଗି କେନ୍ଦ୍ର ଆର ରାଏଜ୍ ସରକାର ସବୁବେଲେ ଚେଷ୍ଟା କରୁଛନ୍। ହେଲେ ଇ କମ୍ରେ ନିୟୋଜିତ ଥିବାର କରମଚାରୀମାନ୍କର ଅବହେଲାର ଲାଗି ଆଜି ଇ ନିସାହା ବୁରୁଧ୍ ବିଧବା ମହିଲା ଝନ୍କ ସବୁପରକାର ସରକାରୀ ସୁବିଧାରୁ ବଁଚିତ୍ ହେଇଛନ୍। ଇ ବାବ୍ଦେ ଲାଠୋର ସରପଁଚ୍ ପ୍ରବିଣ ଅଗ୍ରଓ୍ବାଲକୁଁ ପଚରାଲାରୁ କୁଆଦେଇକଁର ପାସେ ଦରକାରୀ କାଗଜପତର ନଁାଇଁନ। ଯେନ୍ଥିରଲାଗି ସେ ସରକାରୀ ସୁବିଧା ପାଏବାରୁ ବଁଚିତ୍ ହେଇଛନ୍। ମୋର ଦୁଆରା ଯାହା ହେଇପାରବା ନିହାତି ଚେଷ୍ଟା କରମି ବଲି ସେ କହିଥିଲେ। ହେଲେ ନିସାହା କୁଆଦେଇ କେନ୍ଥେଇ ସୁବିଧାରେ ଭୋଟ ପରିଚଏପତର ଆର ଆଧାର କାର୍ଡ ପାଇପାରବେ ସେ ଦିଗେ ଉଭଏ ପଁଚେତ୍ ଆର ବ୍ଲକ ପରଶାସନ ଦୁରୁଷ୍ଟି ଦେଇ ତାହାକୁ ସହଯୋଗ କରବାକେ ଜନସାଧାରନ୍ରେ ଦାବି ହେଉଛେ।