ପର୍ଲା, ୯।୩ (ଡି.ଏନ୍.ଏ.)- କଳାହାଣ୍ଡି ଜିଲା ଧର୍ମଗଡ଼ ବ୍ଲକ ଛଞ୍ଚାଣବାହାଲି ପଁଚେତ୍ ବେହେରାଗୁଡ଼ା ଗଁାର ବୁରୁଧ୍ ବିଧବା ଲୋଚନୀ ନାଏକ(୮୦)। ବଏସର ଶେଷ ମୁଡ଼ସାକେ ପୁହୁଁଚିଲେନ। ଗୋଡ଼ହାତ ଥରି ଯାଉଛେ। ଆଏଁଖ୍କେ ଭଲଭାବେ ଦିଶ୍ବାର ନାଇଁ। ହେଲେ ସଖାଲ ପାଏଲେ ଲୋଚନୀକୁଁ ମାନସିକ ଭିନ୍ନକ୍ଷମ ଝି’ର ଚିନ୍ତା ଖାଇଯାଉଛେ। ଇଆଡ଼େ ଝି’ ମାନସିକ ଭିନ୍ନକ୍ଷମ ହେଇଥିଲେ ବି ସବୁପରକାର ସରକାରୀ ସୁବିଧା ସୁଯୋଗରୁ ବଁଚିତ୍ ହେଇ ରହିଛନ୍।
ସୂଚନା ଅନ୍ସାରେ ବେହେରାଗୁଡ଼ାର ଲୋଚନୀ ନାଏକ(୮୦)କଁର ପରିବାର କହେଲେ ଦୁଇ ଝି’ ସପୁର(୬୧), ମନ୍ଦରା(୫୫) ଆର ପୁଓ ପଶ୍ଚିମଧର(୫୦)କୁଁ ନେଇ ସଁସାର। ଆଏଜ୍କେ ୧୫ ବଛର ତଲେ ଆପ୍ନେ ଆରପାରକେ ଚାଲିଯାଇଛନ୍। ଇଆଡ଼େ ପରିବାରଟା ନିହାତି ଗରିବ୍, ଜମିବାଡ଼ି, ଧନ୍ ସଁପତି ବଲି କିଛି ନାଇଁ। ଲୋଚନୀ ଦୁଖ୍ସୁଖ କରି ସାନ ଝି’ ମନ୍ଦରା ଆର ପୁଓ ପଶ୍ଚିମଧରକୁଁ ବିହାଚୁରା କରିଛନ୍। ବିହାଚୁରା ହେଲା ଉତାରୁ ଝି’ପୁଓ ନିଜର ନିଜର ବାଟେ ରହୁଛନ୍। ଲୋଚନୀ ଇ ବୁଢ଼ୀ ବଏସେ ନିଜର ଭଂଗା ଦଦ୍ରା କୁରିଆରେ ମାନସିକ ଭିନ୍ନକ୍ଷମ ଝି’ ସପୁରକଁର ସଂଗେ ରହୁଛନ୍। ରହୁଥିବାର ଘରରଟାର ଅବସ୍ତା ଏନ୍ତା ଯେ ସଖାଲ ପାଏଲେ ସୂର୍ଯ୍ୟ ଆର ରାଏତ୍ ହେଲେ ଚନ୍ଦ୍ର, ତାରା ଦେଖାଯାଉଛନ୍। ଇଆଡ଼େ ଲୋଚନୀ ବଏସର ଶେଷ ମୁଡ଼ସାକେ ପୁହୁଁଚି ସାରିଛନ୍। ଏନ୍ତା ଅବସ୍ତାରେ ସେ ମାନସିକ ଭିନ୍ନକ୍ଷମ ଝି’ ସପୁରକଁର ଦେଖ୍ଭାଲ ପାଲପୋଷ କରୁଛନ୍। ଫିଦିନ ସଖାଲ ପାଏଲେ ଲୋଚନୀ ଦିବ୍ୟାଙ୍ଗ ଝି’କେ ଧରି ଗଁା ଗଁା ବୁଲି ମୁଢ଼ି ବିକୁଛନ୍। ସେଥ୍ରୁ ଯାହା ମିଲୁଛେ ମା’ଝି ଦୁଖେ କଷ୍ଟେ ଚଲୁଛନ୍। ସରକାରୀ ସାହାଯ୍ କହେଲେ ଲୋଚନୀ ମାସିକ ପାଉଥିବାର ଭତା ଆର ୫ କେ.ଜି. ଚାଉଲ ସାହାଭରସା। ଇଆଡ଼େ ଝି’ ସପୁର ଝନେ ମାନ୍ସିକ ଭିନ୍ନକ୍ଷମ। ବଏସ୍ ବି ୬୦ ଟପି ଗଲାନ। ହେଲେ ଭୋଟର କାର୍ଡ, ଆଧାର କାର୍ଡରେ ଭୁଲଭଟକା ଲାଗି ସେ ସବୁପରକାର ସରକାରୀ ଯୋଜନାରୁ ବଁଚିତ୍ ହେଇ ରହିଛନ୍। ଇ ଘଟନାକେ ନେଇ ଗଁାବାସୀକର ଭିତରେ ବି ଅସନ୍ତୋଷ ଦେଖାଦେଇଛେ। ଇଆଡ଼େ ଲୋଚନୀ ଝି’କେ ଭତା ଆର ସରକାରୀ ଯୋଜନାରେ ଘରଖଁଡ଼େ ଯୁଗେଇ ଦେବାକେ ସମିତି ସଭ୍ୟନୁ ସରପଁଚ୍ ତକ ଗୁହାରି କରି ନିରାଶ ହେଇଥିବାର କହିଛନ୍। ଯେତେ ଜଲଦି ହେବା ଇ ଦୁଇ ମା’ଝି’କୁଁ ଆବାସ ଯୋଜନାରେ ଘରଖଁଡ଼େ, ଅନ୍ତ୍ୟୋଦୟ ଯୋଜନାରେ ମାସିକ ୩୫ କେ.ଜି. ଚାଉଲ ଆର ସପୁରକୁଁ ଭିନ୍ନକ୍ଷମ ଭତା ଯୁଗେଇ ଦେବାକେ ଗଁାବାସୀ ଦାବି କରିଛନ୍। ଇ ବାବ୍ଦେ ଧର୍ମଗଡ଼ ବିଡିଓ ଗୋପାଳ କୃଷ୍ଣ ମିଶ୍ରକୁଁ ପଚ୍ରାଲାରୁ ହିତାଧିକାରୀ ଆସି ଅଫିସରେ ଆବେଦନ କଲେ ସବୁପରକାର ବେବସ୍ତା କରାଯିବା ବଲି ସେ କହିଥିଲେ।