ପାଜାର୍ଡଝିକ୍ (ବୁଲ୍ଗେରିଆ ), ୧୨ା୮ (ପି.ଟି.)-ବୁଲ୍ଗେରିଆନ ଜୁନିୟର ଇଣ୍ଟରନ୍ୟାଶନାଲ ବ୍ୟାଡ୍ମିଣ୍ଟନ ଚାମ୍ପିୟନଶିପ୍ରେ ଭାରତୀୟ ଖେଳାଳିମାନେ ପ୍ରଭାବୀ ପ୍ରଦର୍ଶନ ସହ ୩ ସ୍ବର୍ଣ୍ଣ, ୧ ରୌପ୍ୟ ଏବଂ ୨ ବ୍ରୋଞ୍ଜ ସହ ମୋଟ ୬ଟି ପଦକ ଜିତିଛନ୍ତି। ମହିଳା ସିଙ୍ଗଲ୍ସ କାଟେଗୋରିରେ ସାମିୟା ଇମାଦ୍ ଫାରୁକି ରୁଷିଆର ଆନାସ୍ତାସିଆ ଶାପୋଭାଲୋଭାଙ୍କୁ ୯-୨୧, ୨୧-୧୨, ୨୨-୨୦ରେ ହରାଇ ସ୍ବର୍ଣ୍ଣ ପଦକ ଲାଭ କରିଛନ୍ତି। ସେହିପରି ମିକ୍ସଡ ଡବଲ୍ସ ଫାଇନାଲରେ ଏଡ୍ଭିନ ଜୟ ଓ ଶ୍ରୁତି ମିଶ୍ର ଯୋଡ଼ି ଦ୍ୱିତୀୟ ସିଡ୍ ବ୍ରିଟିଶ ଯୋଡ଼ି ବ୍ରାଣ୍ଡନ ଝି ହାଓ ଓ ଆବିଗେଲ୍ ହାରିସଙ୍କୁ ୨୧-୧୪, ୨୧-୧୭ରେ ପରାସ୍ତ କରି ସ୍ବର୍ଣ୍ଣ ପଦକ ଲାଭ କରିଛନ୍ତି। ମହିଳା ଡବଲ୍ସରେ ଭାରତୀୟ ଯୋଡ଼ି ତନିଶା କ୍ରାଷ୍ଟୋ ଏବଂ ଅଦିତି ଭଟ୍ଟ ସେମାନଙ୍କ ପ୍ରଭାବୀ ପ୍ରଦର୍ଶନ ଜାରି ରଖି ସ୍ବର୍ଣ୍ଣ ପଦକ ହାସଲ କରିଛନ୍ତି। ଏହି ଯୋଡ଼ି ଫାଇନାଲରେ ଟପ୍ ସିଡ୍ ବେଙ୍ଗିିସୁ ଏର୍ସେଟିନ୍ ଓ ଜେହରା ଏର୍ଡଫିମ୍ଙ୍କୁ ୨୧-୧୫, ୧୮-୨୧ ୨୧-୧୮ରେ ହରାଇ ଦେଇଛନ୍ତି। ପୁରୁଷ ଡବଲ୍ସ ଯୋଡ଼ି ଈଶାନ୍ତ ଭଟ୍ଟନାଗର ଏବଂ ବିଷ୍ଣୁବର୍ଦ୍ଧନ ଫାଇନାଲରେ ବ୍ରିଟିଶ ଯୋଡ଼ ଓ୍ବିଲିୟମ ଜୋନ୍ସ ଏବଂ ବ୍ରାଣ୍ଡନ ଝି ହାଓଙ୍କଠାରୁ ୧୯-୨୧, ୧୮-୨୧ରେ ପରାସ୍ତ ହେବା ଦ୍ୱାରା ରୌପ୍ୟ ପାଇଥିଲେ। ଅନ୍ୟ ସିଙ୍ଗଲ୍ସ ଇଭେଣ୍ଟଗୁଡ଼ିକରେ ମାଳବିକା ବନ୍ସୋଡ୍ ସେମିଫାଇନାଲରେ ଦ୍ୱିତୀୟ ସିଡ୍ ଆନାସ୍ତାସିଆ ଶାପୋଭାଲୋଭାଙ୍କଠାରୁ ୧୩-୨୧, ୧୫-୨୧ରେ ପରାସ୍ତ ହୋଇ ବ୍ରୋଞ୍ଜ ପଦକ ପାଇଛନ୍ତି। ସେହିପରି ମିରାବା ଲୁଓ୍ବାଙ୍ଗ ରୁଷିଆର ଗେଓର୍ଗି କାପରୋଭଙ୍କଠାରୁ ୧୯-୨୧, ୨୧-୧୨, ୧୮-୨୧ରେ ପରାଜିତ ହୋଇ ବ୍ରୋଞ୍ଜରେ ସନ୍ତୁଷ୍ଟ ହୋଇଛନ୍ତି।