ଖୋର୍ଦ୍ଧା ଅଫିସ,୧୬।୮: ଯେଉଁ ମା’ବାପା ସନ୍ତାନର ସୁଖ ପାଇଁ ନିଜକୁ ଜଳାଞ୍ଜଳି ଦେଇଥାନ୍ତି, କିନ୍ତୁ ପରବର୍ତ୍ତୀ ସମୟରେ ସେହି ସନ୍ତାନମାନେ ସେମାନଙ୍କ କର୍ତ୍ତବ୍ୟକୁ ଭୁଲିଯାଇଥାନ୍ତି। ବାର୍ଦ୍ଧକ୍ୟରେ ଉପନୀତ ମା’ବାପାଙ୍କୁ ବୋଝ ବୋଲି ଭାବିବା ସହ ନିର୍ଯାତନା ଦେବାକୁ ମଧ୍ୟ ପଛାନ୍ତି ନାହିଁ। ଏଭଳି ଏକ ଘଟଣା ଦେଖିବାକୁ ମିଳିଛି ଖୋର୍ଦ୍ଧା ଜିଲା ବେଗୁନିଆ ବ୍ଳକ ଗୁଡୁମ୍ ଗ୍ରାମରେ। ପୁଅବୋହୂଙ୍କ ନିର୍ଯାତନା ସହି ନ ପାରି ଶେଷରେ ଗ୍ରାମର ଅନନ୍ତ ଚରଣ ଦାଶ ସ୍ତ୍ରୀଙ୍କ ସହ ଶୁକ୍ରବାର ଜିଲାପାଳଙ୍କ କାର୍ଯ୍ୟାଳୟରେ ପହଞ୍ଚି ଇଛାମୃତ୍ୟୁ ପାଇଁ ଆବେଦନ କରିଛନ୍ତି।
ଅନନ୍ତ ଜଣେ ଅବସର ପ୍ରାପ୍ତ ସରକାରୀ କର୍ମଚାରୀ। ତାଙ୍କର ୨ ଝିଅ ଓ ୧ପୁଅ। ଉଭୟଙ୍କ ବିବାହ ସରିଥିବା ବେଳେ ପୁଅଙ୍କ ଗୋଟିଏ ଝିଅ ମଧ୍ୟ ରହିଛି। ତେବେ ବୋହୁ ଆସିବାର କିଛି ବର୍ଷ ପରେ ପୁଅବୋହୂ ମିଳିତ ଭାବେ ନିର୍ଯାତନା ଦେଇଥିଲେ। ପ୍ରଥମେ ସେମାନେ ଲୋକଲଜ୍ଜା ଭୟରେ ପ୍ରତିବାଦ କରୁ ନ ଥିଲେ। ସହିବାର ସୀମା ଟପିଯିବା ପରେ ଅନନ୍ତ, ସ୍ତ୍ରୀଙ୍କ ସହ ଘର ଛାଡ଼ି ଯାଇ ଭୁବନେଶ୍ୱର ସୁନ୍ଦରପଦାର ଏକ ବୃଦ୍ଧାଶମରେ ରହୁଥିଲେ। ଶାରିରିକ ଅସୁସ୍ଥତା ବଢ଼ିଯିବା ପରେ ସୁନ୍ଦରପଦା ଛାଡି ଖୋର୍ଦ୍ଧାରେ ଆସି ଭଡାରେ ରହୁଛନ୍ତି । ହେଲେ ଏବେ ଦମ୍ପତିଙ୍କ ଅବସ୍ଥା ବିଗଡିବାରେ ଲାଗିଛି। ବାର୍ଦ୍ଧକ୍ୟ ଅବସ୍ଥାରେ ପୁଅବୋହୂ ପଚାରୁ ନ ଥିବାରୁ ସରକାର ଓ ପ୍ରଶାସନର ସହଯୋଗ ଲୋଡିଛନ୍ତି ଦମ୍ପତି। ପୁଅବୋହୁଙ୍କୁ ଉଚିତ୍ ଶିକ୍ଷା ଦେବା ପାଇଁ ସ୍ଥାବର ଅସ୍ଥାବର ସମ୍ପତ୍ତିକୁ ସ୍ବେଚ୍ଛାସେବୀ ଅନୁଷ୍ଠାନକୁ ଦାନ କରିବାକୁ ଚାହୁଁଛନ୍ତି ଅନନ୍ତ ଓ ତାଙ୍କ ସ୍ତ୍ରୀ । ଏଥିରେ ପ୍ରଶାସନିକ ସହଯୋଗ ନ ମିଳିଲେ ଇଚ୍ଛାମୃତ୍ୟୁ ପାଇଁ ଉଭୟେ ଆବେଦନ କରିଛନ୍ତି ।