ଅମରପାଲି, ୨୬ା୩(ଡି.ଏନ.ଏ.): ତୀର୍ଥ କରିବାକୁ ଯାଇଥିବା ସୁବର୍ଣ୍ଣପୁର, ବୌଦ୍ଧ ଓ ଦେବଗଡ଼ ଜିଲାର ୬୦ ଜଣ ତୀର୍ଥଯାତ୍ରୀ ଏବେ ଉତ୍ତରପ୍ରଦେଶର ବୃନ୍ଦାବନରେ ଫସି ରହିଛନ୍ତି। ସେମାନଙ୍କ ମଧ୍ୟରୁ ୨୮ ଜଣ ମହିଳା। ଲକ୍ଡାଉନ ଯୋଗୁ ସେମାନେ ଏବେ ଫେରି ପାରୁ ନ ଥିବା କହିଛନ୍ତି। ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଳକ ବଡ଼ଖମାରସ୍ଥିତ ବରାହପଦର ମଠର ମହନ୍ତ ଖେଳାକୃଷ୍ଣ ଦାଶ, ବାବା ନିତ୍ୟଗୋପାଳ ଦାଶ, ଭିକାରୀ ମେହେର, ବ୍ରହ୍ମାନନ୍ଦ ପାଣିଗ୍ରାହୀଙ୍କ ନେତୃତ୍ୱରେ ଉକ୍ତ ଶ୍ରଦ୍ଧାଳୁମାନେ ମଥୁରା ଓ ବୃନ୍ଦାବନକୁ ତୀର୍ଥରେ ଯାଇଥିଲେ। ସେମାନେ ୨୫ମାର୍ଚ୍ଚ ସୁଦ୍ଧା ଘରକୁ ଫେରି ଆସିବାର ଥିଲା। ମାତ୍ର ଏବେ ଲକ୍ଡାଉନ ଯୋଗୁ ଗାଡ଼ି ଚଳାଚଳ ଓ ଟ୍ରେନ ସେବା ବାତିଲ ପାଇଁ ସେମାନେ ଆସି ପାରୁନାହାନ୍ତି। ଏବେ ସେମାନେ ବୃନ୍ଦାବନର କୌଣସି ଏକ ମଠରେ ଅଛନ୍ତି। ସେମାନଙ୍କ ପାଖରେ ଟଙ୍କା ନ ଥିବାରୁ ଖାଇବା ପିଇବାରେ ବହୁତ ଅସୁବିଧା ହେଉଥିବା ଆମ ପ୍ରତିିନିଧିଙ୍କୁ ଫୋନ୍ ଯୋଗେ ଜଣାଇଛନ୍ତି। ଏନେଇ ସେମାନେ ଉତ୍ତରପ୍ରଦେଶ ପୋଲିସକୁ ନିଜର ସମସ୍ୟା ଜଣାଇଥିଲେ ମଧ୍ୟ କୌଣସି ସହଯୋଗ ମିଳି ପାରିନାହିଁ। ଉକ୍ତ ତୀର୍ଥଯାତ୍ରୀ ଦଳରେ ସୁବର୍ଣ୍ଣପୁର ଜିଲା ବୀରମହାରାଜପୁର ଅଞ୍ଚଳର ୨୫ ଜଣ, ଉଲୁଣ୍ଡା ବ୍ଲକର ୧୦, ବିନିକା ବ୍ଳକରୁ ୫, ଦେବଗଡ଼ ଜିଲାରୁ ୧୦ ଓ ବୌଦ୍ଧ ଜିଲାର ୭ ତୀର୍ଥଯାତ୍ରୀଙ୍କ ସହିତ ମହନ୍ତ ଓ ବାବା ମିଶି ୬୦ ଜଣ ରହିଛନ୍ତି। ଉକ୍ତ ତୀର୍ଥଯାତ୍ରୀମାନେ ଉଦ୍ଧାର ପାଇଁ ମନ୍ତ୍ରୀ ତଥା ବୀରମହାରାଜପୁର ବିଧାୟକ ପଦ୍ମନାଭ ବେହେରାଙ୍କୁ ଅନୁରୋଧ କରିଛନ୍ତି। ମନ୍ତ୍ରୀ ବେହେରା ସେମାନଙ୍କୁ ଉଦ୍ଧାର କରିବା ପାଇଁ ବ୍ୟବସ୍ଥା କରାଯାଉଛି ବୋଲି ପ୍ରତିଶ୍ରୁତି ଦେଇଥିବା ତୀର୍ଥଯାତ୍ରୀ ମାନେ ପ୍ରକାଶ କରିଛନ୍ତି।
ନାସିକରେ ଅଟକିଛନ୍ତି ୨୮ ଓଡ଼ିଆ
ଜଳେଶ୍ୱର, ୨୫।୩(ସ୍ବ.ପ୍ର): ତୀର୍ଥଯାତ୍ରା କରିବାକୁ ଯାଇଥିବା ବାଲେଶ୍ୱର ଜିଲାର ୨୮ଜଣ ଯାତ୍ରୀ ୪ ଦିନ ଧରି ମହାରାଷ୍ଟ୍ରର ନାସିକ ସହରରେ ଅଟକି ରହିଛନ୍ତି। ସେମାନଙ୍କୁ ଉଦ୍ଧାର କରିବାପାଇଁ ପରିବାରବର୍ଗ ବୁଧବାର ମୁଖ୍ୟମନ୍ତ୍ରୀଙ୍କ ସମେତ ମୁଖ୍ୟ ଶାସନ ସଚିବ ଓ ବାଲେଶ୍ୱର ଜିଲାପାଳଙ୍କ ଦୃଷ୍ଟି ଆକର୍ଷଣ କରିଛନ୍ତି। ଗତ ୩ ତାରିଖରେ ତୀର୍ଥଯାତ୍ରାରେ ଯାଇଥିବା ଏହି ଲୋକେ ବୃନ୍ଦାବନ, ଜୟପୁର, ଆଜମୀର, ଦ୍ୱାରିକା, ମାଉଣ୍ଟଆବୁ, ଉଜ୍ଜୟିନୀ, ସୋମନାଥ ମନ୍ଦିର ବୁଲିସାରି ନାସିକର ପଞ୍ଚବଟିରେ ପହଞ୍ଚିିଥିଲେ। ଗତ ୨୨ ତାରିଖରେ ସେମାନଙ୍କର ଫେରିବା କାର୍ଯ୍ୟକ୍ରମ ରହିଥିଲା। କିନ୍ତୁ ସେଦିନ ଜନତା କର୍ଫ୍ୟୁ ଡାକରା ଯୋଗୁଁ ସେମାନେ ଫେରି ପାରି ନ ଥିଲେ।
ତିରୁପତିରେ ବି ୧୪ ତୀର୍ଥଯାତ୍ରୀ
କେନ୍ଦ୍ରାପଡ଼ା ଅଫିସ,୨୫।୩: କେନ୍ଦ୍ରାପଡ଼ା ଜିଲାର ୨ ଜଣ ସମେତ ଯାଜପୁର ଜିଲାର ମୋଟ ୧୪ ତୀର୍ଥଯାତ୍ରୀ ତିରୁପତିଠାରେ ଫସିରହିଛନ୍ତି। ସେମାନଙ୍କୁ ଉଦ୍ଧାର କରିବା ପାଇଁ ଏକ ଭିଡିଓ ମାଧ୍ୟମରେ ଆକୁଳ ନିବେଦନ କରିଛନ୍ତି। ଏହି ଭିଡିଓ ଏବେ ଜିଲାରେ ଭାଇରାଲ ହେବାରେ ଲାଗିଛି। ତୀର୍ଥଯାତ୍ରୀମାନେ ସେମାନଙ୍କୁ ଉଦ୍ଧାର ପାଇଁ କେନ୍ଦ୍ରାପଡ଼ା ଜିଲା ପ୍ରଶାସନ, ଯାଜପୁର ବିଧାୟକ ପ୍ରଣବପ୍ରକାଶ ଦାସ, ଜିଲା ବିଜେଡି ସଭାପତି ସରୋଜ ମହାପାତ୍ରଙ୍କ ଦୃଷ୍ଟି ଆକର୍ଷଣ କରିଛନ୍ତି।