ରୂପ୍ସା, ୩।୧୦(ଡି.ଏନ.ଏ.)-ବାଲେଶ୍ୱର ବନବିଭାଗ ଏବେ ବେଆଇନ ଭାବେ ଚାଲିଥିବା କରତକଳଗୁଡିକରେ ଲଗାମ ଲଗାଇବାକୁ ଉଦ୍ୟମ ଆରମ୍ଭ କରିଛି। ୫ଦିନ ମଧ୍ୟରେ ଜିଲାର ବିଭିନ୍ନ ବ୍ଲକର ୭ଟି କରତକଳରେ ଚଢ଼ାଉ କରି ୨୦ଲକ୍ଷ ଟଙ୍କାର ମିଲ୍ ଯନ୍ତ୍ରାଂଶ ଓ ମୂଲ୍ୟବାନ କାଠ ଜବତ କରିଛି। ଏହାସହ ୧୨ଜଣ ଅଭିଯୁକ୍ତଙ୍କୁ ଗିରଫ କରିବାରେ ମଧ୍ୟ ସଫଳ ହୋଇଛି। ତେବେ କରତକଳ ମାଲିକ ଓ ଚୋରା କାଠ ମାଫିଆଙ୍କ ମଧ୍ୟରେ ଏକରକମ ଛନ୍କା ପଶିଯାଇଥିବା ଚର୍ଚ୍ଚା ହେଉଛି।
ଡିଏଫ୍ଓ ବିଶ୍ୱରାଜ ପଣ୍ଡାଙ୍କ ନିର୍ଦ୍ଦେଶକ୍ରମେ ଗୁରୁବାର ବାଲେଶ୍ୱର ରେଞ୍ଜ ଅଫିସର ଦେବେନ୍ଦ୍ର ନାଥ ପାତ୍ର, ଭିଜିଲାନ୍ସ ରେଞ୍ଜ ଅଫିସର ଶ୍ୟାମ ସିଂ, ଫରେଷ୍ଟର ବିବେକାନନ୍ଦ ଜେନା ଓ ଜୀତେନ୍ଦ୍ର କୁମାର ରାଉତ ପ୍ରମୁଖ ସଦଳବଳେ ସଦର ଥାନା ଅନନ୍ତପୁର ଗ୍ରାମର ନୟନ କୁମାର ବିଶ୍ୱାଳ, ରୂପ୍ସା ଥାନା ଜାମୁନିଆ ଗ୍ରାମରେ ଥିବା ମଦନ ସିଂ ଓ ମାଧବାନନ୍ଦ ଦାସଙ୍କ ବେଆଇନ କରତକଳ ଉପରେ ଚଢ଼ାଉ କରିଥିଲେ। ୨ କରତକଳରୁ ୮ଲକ୍ଷ ଟଙ୍କାର ଯନ୍ତ୍ରାଂଶ ଓ ବହୁ ମୂଲ୍ୟବାନ କାଠ ଜବତ ହୋଇଥିଲା। ମାତ୍ର ମାଲିକମାନେ ଫେରାର ହୋଇଯାଇଥିଲେ। ସେମାନଙ୍କୁ ତୁରନ୍ତ ଗିରଫ କରାଯିବାର ବିଭାଗୀୟ ପ୍ରକ୍ରିୟା ଜାରି ରହିଛି ବୋଲି ରେଞ୍ଜ ଅଫିସର ପାତ୍ର କହିଛନ୍ତି। ଗତ ସେପ୍ଟେମ୍ବର ୨୯ ତାରିଖରେ ଭୋଗରାଇ ବ୍ଲକ ଅଞ୍ଚଳରେ ୪ଟି କରତକଳରେ ଚଢ଼ାଉ ହୋଇଥିଲା। ୧୧ଲକ୍ଷ ଟଙ୍କାର କାଠ ଓ ଯନ୍ତ୍ରାଂଶ ଜବତ ହେବା ସହ ୭ଜଣ ଅଭିଯୁକ୍ତଙ୍କୁ ଗିରଫ କରାଯାଇଥିଲା। ସେହିପରି ୩୦ ତାରିଖରେ ବାଲିଆପାଳ ବ୍ଲକ ଅଞ୍ଚଳର ଗୋଟିଏ ସ’ମିଲ୍ରେ ଚଢ଼ାଉ କରାଯାଇ ୫ଜଣ ଅଭିଯୁକ୍ତଙ୍କୁ ଗିରଫ କରାଯାଇଥିଲା। ସେଠାରୁ ୧ଲକ୍ଷ ଟଙ୍କାର କାଠ ଓ ଯନ୍ତ୍ରାଂଶ ଜବତ ହୋଇଥିଲା। ବନବିଭାଗର ଏଭଳି ଲଗାତର ଚଢ଼ାଉ କରାଯିବାକୁ ସାଧାରଣରେ ପ୍ରଶଂସା କରାଯାଇଛି।