ନୂଆଦିଲ୍ଲୀ,୨୫ା୪(ପି.ଟି.): ବେଆଇନ ଗ୍ରାନାଇଟ୍ ଖନନ ମାମଲାରେ ନିଲମ୍ବିତ ଡିଏମ୍କେ ନେତା ଏମ୍.କେ. ଆଲାଗିରିଙ୍କ ପୁଅ ଆଲାଗିରି ଦୟାନିଧିଙ୍କ ଘରେ ବୁଧବାର ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ପକ୍ଷରୁ ଚଢ଼ାଉ କରାଯାଇଛି। ଇଡି ଅଧିକାରୀମାନେ ମନିଲଣ୍ଡରିଂ ଆଇନ ବଳରେ ତାଙ୍କର ୨୫ଟି ସ୍ଥାବର ଓ ଅସ୍ଥାବର ସମ୍ପତ୍ତି ବାଜ୍ୟାପ୍ତ କରିଛନ୍ତି, ଯାହାର ମୂଲ୍ୟ ୪୦.୩୪ କୋଟି ଟଙ୍କା ହେବ। ଅଲିମ୍ପସ୍ ଗ୍ରାନାଇଟ୍ସ ପ୍ରାଇଭେଟ ଲିମିଟେଡ୍ ନାମରେ ଥିବା ମଦୁରାଇ ଓ ଚେନ୍ନାଇର କୋଠାକୁ ବାଜ୍ୟାପ୍ତ କରିବା ସହ କେତେକ ବ୍ୟାଙ୍କରେ ଥିବା ଫିକ୍ସଡ୍ ଡିପୋଜିଟକୁ ମଧ୍ୟ ଜବତ କରାଯାଇଛି।
ଇଡି ପକ୍ଷରୁ କୁହାଯାଇଛି ଯେ, କମ୍ପାନୀର ଅଂଶୀଦାର ଏସ୍. ନାଗରାଜନ୍ ଓ ଆଲାଗିରି ଦୟାନିଧିଙ୍କ ସମେତ ଅନ୍ୟ ଅଭିଯୁକ୍ତମାନେ ଆପରାଧିକ ଷଡ଼ଯନ୍ତ୍ର କରି ତାମିନ୍ ଲିଜ୍ ଜମିରେ ବେଆଇନ ଭାବେ ଗ୍ରାନାଇଟ୍ ଖନନ କରିଥିଲେ। ଏଥିଯୋଗୁ ସରକାରୀ ରାଜକୋଷକୁ କ୍ଷତି ସହିବାକୁ ପଡ଼ିଥିବାବେଳେ ସେମାନେ ନିଜେ ଲାଭବାନ ହୋଇଥିଲେ। ତାମିଲନାଡୁ ପୋଲିସ ଏନେଇ ତଦନ୍ତ କରି କମ୍ପାନୀ, ଏହାର ପ୍ରମୋଟର, ନିର୍ଦ୍ଦେଶକ ଓ ଅନ୍ୟ କେତେଜଣ ବ୍ୟକ୍ତିଙ୍କ ବିରୋଧରେ ଏଫ୍ଆଇଆର୍ ଦାଏର କରିଥିଲା।